له‌ یاد 37 ساڵه‌ى شه‌هید نه‌مر له‌یلا قاسم بووك كوردستان

شفق نيوز

قاره‌مانیه‌تى و گیانفدایى ژنه‌یل كوردمان هێماى شانازى و سه‌ربه‌رزیمان بووك كوردستان له‌یلا قاسم، گشت ساڵیگ له‌ى رووژه‌ ك رووژ له‌ سێداره‌داین خوه‌ى و هاوڕێیه‌یلیه‌ وه‌ئه‌وپه‌ڕ رێزه‌وه‌ سه‌ر رێز ونه‌وازش ئه‌را رووح پاك شه‌هید له‌یلا قاسم چه‌منیم.

له‌یلا قاسم حه‌سه‌ن ئه‌ركه‌وازى له‌ بنه‌ماڵه‌یگ كورد فه‌یلیه‌ ك وه‌دڵسووزى و كورد و كوردستان په‌روه‌رى ناسریانه‌ له‌ 27 كانوون یه‌كم ساڵ 1952 له‌ ئاواى بانمیل هه‌ڵكه‌فتگ له‌بان چه‌م ئه‌ڵوه‌ن له‌ شار خانه‌قین له‌ داڵگ بویه‌.

باوگى كارگه‌ر نه‌فتپاڵوو  وه‌ند له‌ كواتر بویه‌، له‌یلا قاسم له‌ ساڵ 1958 چیه‌سه‌ مه‌دره‌سه‌ى سه‌ره‌تایى خانه‌قى و تا ئاماده‌یى هه‌ر له‌و شاره‌ ته‌واو كردگه‌، له‌یلا قاسم خوه‌ندكاریگ زیره‌ك و ئارام و ژیر بویه‌، هه‌ر له‌ قوناغ ناوه‌ندى یاموته‌وه‌سته‌ رووح كوردایه‌تى و خوه‌شه‌ویستى و سووز كوردستان تێكه‌ڵ وه‌ل خوینى بویه‌، باوگى پیشبینى ئه‌وه‌ له‌لى كردگه‌ ك له‌یلا له‌ ئاینده‌ بووده‌ مایه‌ى رێز و شانازى ئه‌را ملله‌ته‌گه‌مان.

شه‌و و رووژ هویر له‌ ئازادى كورد و كوردستان كردگه‌ له‌ قوناغ ئاماده‌یى بویه‌سه‌ ئه‌ندام یه‌كیه‌تى قووتابیان كوردستان، له‌ ساڵ 1970 له‌ڕێ براگه‌یه‌و شه‌هید سام په‌یوه‌ندى كه‌ێده‌ رێكخستنه‌یل پارت دیموكرات كوردستان و له‌ ئه‌نجام چالاكیه‌گانى له‌ ماوه‌یگ كوڵ بووده‌ ئه‌ندام پارتى و تا ئه‌و رووژه‌گ وه‌نامه‌ردى له‌ سێداره‌ دریا له‌یلا نموونه‌ى خه‌بات و ئازایه‌تى و كوڵ نه‌داین بوى.

له‌یلا قاسم له‌ ساڵ 1971 له‌ زانكۆ به‌غدا كولێژ ئاداب به‌ش كومه‌ڵایه‌تى قه‌بوول كریا و چالاكیه‌گانى فراوانتره‌و كرد و نه‌خش وه‌رچه‌ویگ داشت و له‌لایه‌ن به‌عسیه‌یل شوڤێنى و ده‌زگایل ئه‌منى ناو زانكۆ چه‌ودێرى ئه‌كریا.

له‌یلا قاسم هه‌م فه‌ره‌ خوه‌نستیاد و هه‌میش فه‌ره‌ نویسیاد، له‌ ساڵ 1974 داوا كرد رێ وه‌پى بدریه‌ى گوڤاریگ وه‌هه‌ردو زووان كوردى و عه‌ره‌بى ده‌ربكا وه‌لى رێ وه‌پى نه‌یان. ئه‌و شانه‌ یا خه‌لیه‌ى پارتى ك له‌یلا قاسم له‌تى ئه‌ندام بوى هه‌فت نه‌فه‌ر بوین ك سه‌ره‌نجام له‌ لایه‌ن ده‌زگایل ئه‌منى به‌عس گیریان و وه‌چه‌ندین تاوان درو و هه‌ڵبه‌سریاگ و بى بنه‌ما تاوانبار كریان جوور دانان بومب له‌ سینه‌ما ئه‌تله‌س و له‌ ته‌یاره‌خانه‌ى به‌غدا و ئه‌ڵگردن چه‌ك و ته‌قه‌مه‌نى، وه‌لى ئى تاوانه‌یله‌ گشتى درو و پیلان ده‌زگایل ئه‌منى به‌عس بوین، یه‌یش له‌ وه‌ختیگه‌ ك مێژوو خه‌بات ملله‌ته‌گه‌مان نیشان ده‌یگ كورد قه‌د ئه‌را ره‌سین وه‌مافه‌یل ره‌واى خوه‌ى هه‌رگز ده‌س نه‌یاسه‌ توندو تیژى. جه‌لاده‌یل به‌عس وه‌ دڕندانه‌ترین شیوه‌ شكه‌نجه‌ و ئازار جه‌سته‌یى و ده‌روینى له‌یلا و هاوڕێه‌گانى ئه‌دان و هه‌ر كامیان له‌ زندانیگ تاكه‌كه‌سى یا ئنفرادى بوین ئه‌را ئه‌وه‌گ زوى دگان بنه‌نه‌ ئه‌و تاوانه‌یل هه‌ڵوه‌سیاگ و دروه‌ و ئه‌وه‌یش ئاشكرا بكه‌ن ك كیه‌یل تر هانله‌ رێكخستنه‌گه‌یان تا بگرنه‌یان، وه‌لى گشت ئه‌ندامه‌یل شانه‌گه‌ وه‌تایبه‌ت له‌یلا وه‌ئه‌وپه‌ڕ ئازایه‌تى ته‌حه‌مول شكه‌نجه‌گان كردن و ناو هویچ كه‌سیگ ئاشكرا نه‌كردن و ئى ئازایه‌تیه‌ به‌عسیه‌گان تویش شۆك كرد و زیاتر تویڕه‌یان كرد، سه‌ره‌نجام دوان له‌ خه‌باتكاره‌یل وه‌ناوه‌یل ره‌شاد سه‌برى خوه‌شناو و شیروان حه‌سه‌ن ره‌شید هومه‌رى ئازاد كریان و ئه‌و په‌نج نه‌فه‌ره‌گه‌ى تر دلێرانه‌ چینه‌ ژیر په‌ت سێداره‌ و گیان خوه‌یان فداى كورد و كوردستان كردن ك ئه‌وانه‌یش:

1-         له‌یلا قاسم

2-         جواد موراد مه‌حه‌مه‌د هه‌مه‌وه‌ندى ده‌زویران له‌یلا قاسم

3-         ئازاد سلێمان بایز میران

4-         نه‌ریمان فوئاد مارف مه‌تى

5-         حه‌سه‌ن حه‌مه‌ ره‌شید

وه‌رجله‌ له‌ سێداره‌داینیان خوه‌شكه‌گه‌ى له‌یلا و داڵگى دو جار سه‌ردانى كردن ك له‌ جار یه‌كم له‌یلا قاسم له‌ خوه‌شكه‌گه‌ى تواست ئه‌گه‌ر ئه‌را جار دیوم هاتنه‌ ئه‌را سه‌ردانى قه‌یچییگ و ده‌سیگ جنگ تازه‌ ئه‌راى بارن، سه‌ره‌نجام قه‌یچى و جنگه‌گه‌ ئه‌راى هاوردن و له‌یلا وه‌قه‌یچیه‌گه‌ كوتیگ له‌ گیس خوه‌ى بڕى و داره‌ى خوه‌شكه‌گه‌ى و وت: ئى كوته‌ له‌ گیسم وه‌یادگارى لاى خوه‌د ئه‌ڵگر، خوه‌شكه‌گه‌ى  وته‌پى ئه‌ى جنگه‌گان ئه‌را چه‌ده‌؟

له‌یلا وه‌ زه‌رده‌خه‌نه‌یه‌گه‌و  جوواوى ده‌یگ و ئویشیگ: خوه‌شكم من چه‌ن رووژتر بوومه‌ عه‌روس كوردستان و خاك پیرۆز كوردستان پیشوازى له‌لیم ئه‌كا وه‌ى خاتره‌ توام وه‌ئه‌وپه‌ڕ جوانیه‌و خاكه‌گه‌م بگریگه‌مه‌ باوش.

به‌ڵێ له‌یلا قاسم راسى ئه‌و په‌ند كوردیه‌ ئه‌رامان سه‌لماند ك شێر له‌ لانه‌ ده‌رچوود ئمجا چ نێر و چ ما ، راسه‌ ژیان خوه‌شه‌ و گیان شرینه‌ وه‌لى له‌یلا قاسم سه‌رله‌نوو ئه‌وه‌ سه‌لماند ك مردن له‌رێ ملله‌ت و نیشتمان خوشتره‌ و شه‌هیدبوین له‌ڕێ ئازادى به‌رزترین گوزارشته‌ له‌ فداكارى.

به‌ڵێ له‌یلا قاسم دویه‌ت ملله‌تیگ نه‌وى ك سه‌ر ئه‌را دوژمن شووڕ بكا و له‌ خه‌بات و قاره‌مانیه‌تى په‌شیمان بووده‌و هه‌ر وه‌ى خاتره‌ له‌ وه‌خت ئاماده‌كردن په‌ت سێداره‌ پڕ وه‌ده‌م هاوار كردیاد (بژیه‌ى كورد و كوردستان و بڕمێ رژیم به‌عس، ئویشن له‌ى وه‌خته‌ یه‌كیگ له‌ جه‌لاده‌گان به‌عس یه‌كسه‌ر حه‌ربه‌یگ ده‌ركه‌یگ و كه‌یگه‌ى چه‌و له‌یلاى قاره‌مان وه‌رجله‌ له‌ سێداره‌داینى و خوین له‌ سه‌راپاى باڵاى له‌یلا شووڕه‌و بوود وه‌ره‌و خوار. وه‌لى له‌یلا وه‌ڕوییگ خوه‌ش و زه‌رده‌خه‌نه‌یگ وه‌ل خوه‌نستن سروود ئه‌ى ره‌قیب چووده‌ ژیر په‌ت سێداره‌ و خوه‌ى هاوڕێه‌گانى گیان خوه‌یان كه‌نه‌ فداى كورد و كوردستان.