ساڵ تازەو نزاى مەویسەیل

شفق نيوز

  لە گشت کتاوەیل ئاینى ریەیل هەق دیارى کریاگەو ئیمەیش زانیم ک دوعاو نزاى ئەوانەک زوڵم و سەتەم لەلیان کریاگە گیراسەو خوداى پەروەردگار هەمیشە ها وەل زوڵملیکریاگ لە دژ زاڵم.

ئیمە ئەگەر باس لە ساڵەیل گوزەیشتەو چوینیەتى فەوتانن و زەفتکردنن و تاڵانکردن هەقەیل مللەت مەویس عراق بکەیم ک چوین خوریاو چوین غەدر لەى مەردم عراقە کریاگە، ئەوە بیگومان چشتەیل فریەیگ بایەسە باس بکەیم و ئمڕوویش هەرچەنى شکایەت دڵ هەڵڕشن کەسیگ نیە وە دڵسووزیەو گووش لەلى بتەکنید لەناو دەسڵات حکوومەت نادادگەر عراق.

وەلى ئەوەک تویەنیم بخەیمنەى وەر باس و جوور ئازاریگ لە قویلایى دڵ و دەروینەو دەریخەیم تەنیا ئەو حەسرەت کاڵ و پشت بەساننەسە وەو دوعاو نزاى داڵگەیل جگەرسزیاگ و مەویسەیلەسە ک تا ئیسەیش خەو جوراوجوور وە هەقەیلیان دوینن.

دیارە ئى مەردم ستەمدیدەى عراقە ئەوەنە تویش ستەم و ماڵویرانى هاتنە لە دویا چرکەیل ماڵئاواییکردن لە ساڵ 2013 خیزانەیل فریەیگ چەوەڕى ئەوە کردن وە دەسەیل پڕ لە نزاى و لاڵکیانەو پیشوازى لە ساڵ 2014 بکەن، لەوەر ئەوەک ئى ساڵە بوودە مایەى خەیر و خوەشى و سەرهەڵداین چمگ هەقدارى و لاوەکردن لە نزویرەى بەسەزوانەیل و کەمدرامەت و ترس لە دڵەیل تەقینەوەو کوشت و کوشتارەیل پڕ خویناوى، ک گشت وەختیگ ئەزرەت ئارامى و سەقامگیرى کەن و ساڵەیل فریەیگە پەنا وەساى خوەشى نەوردنەو هەر وەو خاتریشە وە نزاى فریەیگەو دواکارن لە خوداى گەورا ساڵ نوو ئەرایان بکادە ساڵ بنبڕکردن ژان و ئازارەیل و لەناوبردن زوڵم و ستەم و جیگیرکردن ئارامى و ئاسایش و پەیابوین متمانەو جمداین وە وژدان ئەو نوێنەرەیلە ک ساڵەهاى ساڵە لەبان ماڵ مەردم مەویس خوەن و ژیەن وەبى ئەوەک قانجازیگ ئەڕایان داشتوون یا خزمەتگوزارییگ ئەرایان پیشکەش بکەن.

بەڵى لە سەعات یانزەو 59 دەقەى شەو 31/ 12/ 2013 گشت مەویسەیل و موسڵمانەیل ئى وڵاتە دەس دوعاو نزا ئەرا خودا بەرزەو کردن و لەلى داواکار ئەوە بوین ک وە رەحمەت خوەى واران رەحمەت بوارنیدو لەى ساڵ 2014 رەوڕەوەى ژیان لەى عراقە وەرەو خەیر و خوەشى و سەقامگیرى ئاڵشت بوود، چوینکە تەنیا چەکیان ئەرا وەدیهاورن و دابینکردن گشت ئى خواست و ئارەزووەیلە تەنیا نزاو لاڵکیانە لە خودا.

رەزا سەرمەد

ج . أ