گشت شعريگ شعر نيه‌

شفق نيوز

  تا راده‌يگ تويه‌نيم بويشيم به‌هره‌ی شعر له‌ ئاده‌ميزاد به‌هره‌يگه‌ خودايی، شعر زاينده‌ی هس ئاده‌ميزاده‌و زووان سووز و خوه‌شه‌ويسی و خه‌ياڵه‌، دره‌وشانيگه‌ له‌ئاسمان هونه‌ر، ك ئه‌رك شاعر له‌تی ده‌رخستن سيماو روخسار وشه‌يليه‌ له‌بان بنه‌مای جوانی و مه‌يليكيشان مه‌ردم وه‌ره‌و خوه‌ندنه‌وه‌ی.

ئنجا هه‌ر شاعريگ و جووره‌ سروشتيگ ره‌نگامه‌ له‌ شعره‌يلی تيه‌ريده‌ كار له‌ڕی وه‌كارهاوردن هونه‌ر و داناين شيواز گوزارشكردن له‌و چشته‌ ك پڕ وه‌دڵ هه‌وڵ جوانكردنی ده‌يدو جوور زه‌ڕينه‌و سيمينه‌ تا له‌ ئاسمان شعر و ئه‌ده‌ب وه‌جوانترين ره‌نگ بدره‌وشيه‌يده‌و.

بيگومان له‌ وه‌خت داناين شعر مه‌زه‌نه‌ی توانای ئه‌و شاعره‌ ئه‌ياده‌ ده‌س و راده‌ی هونه‌ركاريه‌گه‌ی ئه‌راد ده‌ركه‌فيد، چوينكه‌ شاعر يا ئه‌وه‌سه‌ ته‌نيا هه‌ر وه‌ناو شاعره‌ يا ئه‌وه‌سه‌ به‌هره‌ی شعری ديريد و كانياو ده‌روينی پڕه‌ له‌ ئحساس جوانی ك هه‌ميشه‌ شعره‌يلی وه‌تام، وه‌ ئشق و جوانی،‌ باڵه‌فڕه‌ی نيشتنه‌وه‌ی ناو گوڵه‌باخه‌يل ئه‌ده‌ب ئه‌كا وه‌خاتر ئه‌وه‌ك چه‌رداخيگ له‌ناو لاپه‌ڕه‌ی ئه‌ده‌ب ئه‌را خوه‌ی بسازيدو بووده‌ گوڵكار له‌ناو باخ و چه‌مه‌ن هونه‌ر ئه‌ده‌ب‌، ك هه‌ر له‌وه‌ر ئه‌وه‌يش دوينيد شوون شعر خوه‌ی دياری كردگه‌و هه‌گبه‌ی شعره‌يلی پڕه‌ له‌راز و نياز و ئه‌زه‌ره‌ت دڵيشی ئه‌كاده‌ قوبڵه‌نمای ئشق و خه‌ياڵ.

وه‌لی دوينيم له‌ناو دونيای شعرو ئه‌ده‌ب ئمڕوو جووريگ له‌ ده‌مه‌تاری و دوباره‌كردنه‌وه‌ی شعر و شيوانن كيش و قافيه‌ی ئاشكرايگ هه‌س، ئنجا ئه‌و كه‌سه‌ ك خوه‌ی خه‌ريك ناكا وه‌ خاسسازيكردن ئه‌و كه‌م و كوڕيه‌و له‌ شعره‌يلی و وه‌رگ جوانيگ له‌وه‌ری ناپووشيدو ناكه‌فيده‌ی مينه‌ی وشه‌يليگ ته‌ڵايی ئه‌رای تا له‌ناو شعره‌يل جريوه‌جاو بكا، نوڕيد ته‌نيا له‌وه‌ر رازيكردن يار و دوڵبه‌رهه‌ر وشه‌و گوزارشيگ كه‌فته‌ ده‌سی كه‌ڵه‌كه‌چنی ئه‌كا وه‌بی ئه‌وه‌ك بنته‌مه‌ڵ خاسيگ ئه‌رای بنه‌يد، ك يه‌يش هه‌ر يه‌ك دو رووژيگه‌و خورميه‌يده‌و، چوينكه ئه‌گه‌ر ته‌ماشای بنه‌ڕه‌ت و قويلايی گوزاره‌ی ئه‌و شعره‌ بكه‌يم فره‌ له‌ شعره‌و دويره‌!، وه‌ل ئه‌وه‌يشا وشه‌يليگ ناڕيك و ناپوخت كه‌فنه‌ وه‌رچه‌و، ك هويچ سفه‌تيگ جوانی و هويچ ره‌ونه‌قيگ شعری له‌تيان ده‌رناكه‌فيد.

يا دوينيد كه‌سه‌يليگ خوازيار ئه‌وه‌نه‌ وه‌ زوور خوه‌يان بكه‌نه‌ مه‌له‌وان له‌ناو ده‌ريای شعر، وه‌لی ئه‌گه‌ر بنوڕيمنه‌ ئه‌و گفته‌يل ناهاوسه‌نگ و ناجووره‌ ك وه‌ زوور لكننه‌ی له‌ناو خه‌ته‌ شعره‌يل ئه‌وه‌ بيگومان هه‌ر ئيواره‌ خنكيانه‌و بيئاگان له‌وه‌ك مه‌له‌وانيكردن له‌ناو ئه‌و ده‌ريای بی په‌يه په‌يوه‌سه‌ وه‌ شاره‌زايی و به‌هره‌و رووح هونه‌ری و شاعرێتی، ك تويه‌نيم بويشيم گشت شعريگ شعر نيه‌، چوينكه‌ شعريش ياساو ده‌ستوور و كه‌سه‌يل به‌هره‌دار خوه‌ی ديريد.

ره‌نجده‌ر مامنه‌يی

ج . أ