قه‌ره‌برويت بيئه‌قڵی

شفق نيوز

 خودای خاوه‌ن ميهره‌بانی و كه‌ره‌مدار، له‌وه‌ختيگ ئی رووحه‌ خسته‌وه‌ر ئاده‌ميزاد، ئه‌را ئه‌وه‌سه‌ وه‌پی بژيه‌يدو بيقه‌وڵی فه‌رمايشه‌يلی نه‌كريه‌يد، وه‌لی چه‌ بويشيد وه‌ل ئه‌وانه‌ك له‌ڕی راس لادانه‌و ريڕه‌و شه‌يتان گرتنه‌سه‌وه‌ر و بوينه‌سه‌ بايس قه‌تڵوعامكردن مه‌ردم بيتاوان له‌ی رووژگار مه‌ترسيداره‌و له‌ی عراق خويناويه‌.

ئای له‌ی دونيای ناجوور و چه‌پگه‌رده‌، ئای له‌ی ژيان كوڵه‌مه‌رگ و خويناويه‌ ك هاته‌سه‌ تويش ئی ملله‌ت سته‌مديده‌ی عراقه‌، چار چه‌س؟ مه‌گه‌ر خودا خوه‌ی بزانيد ئی ته‌قينه‌وه‌و خوينڕشيان و كوشتن و رواكانن و سه‌ربڕينه‌ كه‌ی كووتا وه‌پی تيه‌يد.

ئيسه‌ وه‌ڕاسی شاريگ جوور به‌غدا ك پايته‌خت عراق و شوون مه‌زارگه‌ی پڕ له‌ حورمه‌ت سه‌يد و شێخ و ئيمامه‌يل ئه‌هل به‌يته‌، نيشتن له‌تی ناچاريه‌و دی مه‌ردمه‌گه‌ی ره‌سينه‌سه‌ ئه‌وپه‌ڕی ناڕه‌حه‌تی و له‌گيان خوه‌يان جاڕس بوينه‌ له‌تاو ئی هه‌مگه‌ كاره‌سات دڵته‌زنه‌ ك رووژانه‌ له‌ناوچه‌يل جياجيای شاره‌گه‌ رويده‌يد، ته‌نانه‌ت بڕيگ له‌ پاريزگايه‌يل عراقيش هيمان بوو خوين له‌ليان ئه‌يادو خوينڕشيان له‌تيان وه‌رده‌وامه‌.

وه‌لی من له‌يرا ئه‌ڵڵاجه‌ويم تيه‌يد له‌ ئه‌قڵ كه‌سه‌يليگ ك خوه‌يان كه‌نه‌ قه‌ره‌برويت بيئه‌قڵی و له‌بان فه‌توای شه‌يتانه‌يل گه‌ورايان مينڕيژ خوه‌يان كه‌ن و له‌ناو مزگفت و پسه‌و شوونه‌يل قه‌ره‌باڵغی خوه‌يان ته‌قننه‌ مه‌ردم بيتاوان و كووتايی وه‌ گيان مناڵ و ژن و پير و جوان ئه‌يه‌رن وه‌و مه‌رامه‌ ك شام وه‌ل په‌يغه‌مبه‌ر بكه‌ن سڵام خودا له‌لی!!

من له‌يرا پرسيار ئه‌وه‌ كه‌م و ئويشم: ئايا ئی جووره‌ كه‌سه‌يليگ وه‌ چ ئه‌قڵيگه‌و باوه‌ڕ وه‌و جووره‌ فه‌توايه‌يل ناهه‌ق و ناڕه‌وا ده‌ن ك دوشمن خودا و ئنسانيه‌ته‌؟ ئايا ئه‌يه‌ چ جهاديگه‌و دژ كييه‌؟ ئايا ئی ره‌فتار به‌دكارانه‌ی قاعيده‌و مه‌ردمه‌يلی گومڕايی نيه‌ له‌ حزوور خودای گه‌وره‌و خاوه‌ن ده‌سڵات؟ خوينڕشانن و كوشتن ئاده‌ميزاد وه‌بی تاوان له‌ كام ئايين و كتاو ئاسمانی ڕی وه‌پی درياگه‌؟ ئه‌ی مه‌گه‌ر خودا له‌ سوره‌ی "ئه‌لمائده"‌ فه‌رمايش نه‌كردگه‌و ئويشيد(من قتل نفسا بغير نفس أو فساد في الأرض فكأنما قتل الناس جميعا ومن أحياها فكأنما أحيا الناس جميعا)، يه‌يش وه‌و مانا ك هه‌ركه‌سيگ كه‌سيگ وه‌بی تاوان بكوشيد و يا خوين كه‌سيگ بيتاوان رشانه‌ بان خاك جوور ئه‌وه‌سه‌ گشت مه‌ردم كوشتويدو ئه‌وه‌كيش ژيان به‌خشا كه‌سيگ جوور ئه‌وه‌سه‌ ژيان گشت ئاده‌ميزاد زينگه‌و كردويد. ئه‌ی دی له‌وه‌رچه‌ ترۆريست و خودكوشه‌يل وه‌ چه‌وه‌اشه‌ی فه‌رمايش خودا ره‌فتار ئه‌كه‌ن؟ ئايا له‌يانه‌ بيئه‌قڵتر هه‌س ك خوازن وه‌ ئه‌نجامداين ئی كرده‌وه‌و كاره‌ساته‌يل دڵته‌زن و خويناليكردن مه‌ردم بيتاوانه‌ كليل به‌هه‌يشت بگرنه‌ ده‌س! ئايين موسڵمان كه‌ی وتگه‌ هاوئايين خوه‌د بكوش و سه‌ربوڕ تا بچيده‌ به‌هه‌يشت و بويده‌ هاونشين و هاوسای په‌يغه‌مبه‌ر.

ئا ئه‌يه‌سه‌ بيئه‌قڵی به‌دكار و له‌ڕی لاده‌ره‌يل، ك نوير موحه‌مه‌دی له‌ناو چه‌وه‌يليان نيه‌و بوينه‌سه‌ بايس كوشتن و له‌ناوبردن رووح سه‌دان و هه‌زاران و بگر مليۆنه‌ها كه‌س له‌بان ئی گووشه‌ی زه‌ويه‌، وه‌تايبه‌ت له‌ناوچه‌يل ئسلامی.

جه‌ماڵ ئه‌ركه‌وازی