عێراق یه‌كپارچه نییه

شفق نيوز

ئەوە باس وڵاته‌یل عەرەبی هه‌ر ناكريه‌ێ ك نەك كاردانەوە نیشان نەيان ته‌نانه‌ت وەجوورێگ لەجوورەگان خوه‌شحاڵی خوه‌یان ئه‌ڕا ئەو دەوڵەتە نيشاندان، ئەویش وە ده‌سمەيه‌ت فره‌ێ چەك و جبەخانە و كۆمەك دارایی، وە ئاستێگ ئه‌گەر ئەمریكا و رووژئاوا نەوياتان ك زوی هاتنە سەرخەت، هویچ وەدوير نەئەزانريا ك دگانیش وەو "دەوڵەتە" بنه‌ن و ئاڵوگۆڕ دیپلۆماسی وه‌ليا بكەن.

وه‌لێ وه‌ختێگ باس بڕیارداين چارەنويس ملله‌ت كوردستان لە باشوور كريه‌ێد ك نزیكەی يه‌ك سه‌ده‌س وە زوورەملی و وه‌بێ خواست خوه‌ێ وە لكنرياسه‌ عێراقەو و داواێ ماف رەواێ خوه‌ێ لە بان خاك خوه‌ێ ئەكا، دی حكوومەت عێراقی و دەروهاوسا كەفنە كۆتان بەیت و بالورەێ مقه‌يه‌تيكردن له‌ یەكپارچەیی عێراق و پیرۆزی مقه‌يه‌تيكردن له‌ ئەو یەكپارچەییە. ئەوەسه‌ سیاسەتمەدارێگ باڵاێ هاوسامان تازە ئويشێ، عێراق وڵاتێگ یەكپارچەس و ملله‌تێگ یەكگرتگ دێرێ.

یەكپارچەیی هاكوو، ئەوەسه‌ یەك لەبان سێ خاك دەوڵەت عێراق ها دەس داعش و هویچ دەسەڵاتێگ حكوومەت عێراقی له‌تێ نییە و ئەوان حوكم قەرەقوشی خوه‌یانی له‌تێ كەن، ئەوە كوردیشە لە ساڵ 1992ەو خوه‌ێ ناوچەیل خوه‌ێ به‌ێده‌ ڕێيه‌و و حكوومەت عێراقی لە بەغداد هویچ وەرپرسیاریەتییگ سەبارەت وە هەرێم نه‌ێرێ، ئاسانترینیان بودجە و موچەس ك نيه‌ێده‌ كوردستان و خوه‌یان هەرێم وە بەشێگ لە عێراق نيه‌زانن و وە كردار جوور هەرێمێگ نەیار تماشامان كەن و رەفتار وه‌لمانا كەن.

سەبارەت وە ئه‌وه‌گ عێراق ملله‌تێگ یەكگرتگ دێرێ! يەيش وه‌و جووره‌ نییە و ئيسه‌ گشت لایەنێگ وە دەوڵەته‌یل هاوسايشه‌و زانن ك ئيسه‌ (3) پێكهاتەی سەرەكی فره‌ لەیەك جیاواز لە عێراق هەس ك ئەویش عەرەب شیعە و سوننەی عەرەب و كوردە، يە بێجگە لە پێكهاتەیل تر جوور توركمان و ئاسووری و كلدانی.

يه‌ بێجگه‌ له‌ مەزهەب جیاواز و ئایین جیاواز. لە عێراق ملله‌تێگ یەكگرتگ نییە و يە شاردنەوەێ راسییگ مێژوویی حاشاهەڵنەگرە. لە عێراق چه‌ن ملله‌تێگ هه‌س ك خاوەن زووان و مێژوو و كلتوور و ئایین جیاوازن. بەریتانییەيل فره‌ ته‌قالا كردن عێراق بكەنە نەتەوە، وه‌لێ له‌شوون چەنه‌ها دەیە لەو راسییە ڕه‌سينه‌و ك ئەوە مەحاڵە و ئەو پێكهاتەيل جیاوازە وە هویچ جوورێگ هاميته‌ ناكريه‌ن و لە ناو یەكتری نيه‌تاويه‌نەو.

وه‌يخاتره‌ خاسترین چارەسەر هەر ئەوەسە ك ئی وڵات وەزوور دروسكريايە لە لایەن ئینگلیزەو بكريه‌ێدە (3) دەوڵەت، چوينكە شیعە و سوننە و كورد لە عێراق جارێگتر ناتويه‌نن وه‌يه‌كەو لە ناو یەك دەوڵەت بژیه‌ن. نموونەێ ئی چەن ساڵە وه‌رينه‌، خاسترین شاهد حاڵە، شیعە و سوننە تويه‌نن لە دو دەوڵەت سەروەخوه‌ێ جوور هاوسا هەڵبكەن، جوور دەوڵەت شیعەێ ئيران وه‌ل دەوڵەت سوننی سعودیه‌ - چوينكە دو دەوڵەت سەروەخوه‌يانن.

ئەوە كوردیش ئه‌ڕا خۆی و لەبان خاك دێرين خوه‌ێ تويه‌نێد دەوڵەت خوه‌ێ دابمەزرنێ و وە ئاشتی وه‌ل هاوسايه‌يليا بژيه‌ێد. ئەو بڕیاريشە بايه‌د ئەو پێكهاته‌يلە خوه‌یان بیەنه‌ێ، چوينكە هەر ئەوانن ك چەنه‌ها ساڵە وەدەس ئی گرفتەو ناڵنن.

سەلام عەبدوڵا

ا. ج