وه‌یه‌ك ده‌س چه‌پڵه‌ نیه‌كوتیه‌ێ!!

شفق نيوز

جووریگ ده‌س و په‌نجه‌ نه‌رم كردگه‌ و ئه‌را ره‌سین وه‌ئازادى و ئامانجه‌ ره‌واگانى قوروانى فه‌ره‌یگ داگه‌ و تویش كوشتن و بڕین و زندان و شكه‌نجه‌ و كووچ زووره‌مللى هاتگه‌، وه‌ڕاسى ئه‌گه‌ر هاوكارى جه‌ماوه‌ر و لایه‌نه‌یل سیاسى كوردستانى له‌ خه‌بات بى وچان نه‌ویاتاگ و جه‌ماوه‌ر پاڵپشت هێز پێشمه‌رگه‌ى كوردستان و لایه‌نه‌یل سیاسى نه‌ویاتاگ ئمڕوو كیشه‌ى كورد نه‌ڕه‌سیه‌ ئى ئاسته‌ له‌ هه‌رێمه‌گه‌ و له‌ ناوه‌نده‌یل ناوده‌وڵه‌تى.  ئه‌گه‌ر ئمڕوو حكوومه‌ت هه‌رێم كوردستان و په‌رله‌مانیگ و ده‌زگایه‌یل یاسایى و شه‌رعى له‌ هه‌رێم كوردستان دیریم و باشوور كوردستان بویه‌سه‌ بنه‌وا و بنه‌ڕه‌ت و ئومید راسكانییگ ئه‌را دامه‌زرانن ده‌وڵه‌تیگ سه‌روه‌خوه‌ى كوردى له‌ ئاینده‌، یه‌ له‌یوا وه‌بیهووده‌ ناتگه‌سه‌ دى و هوكاره‌یل فه‌ره‌ى ناوخوه‌یى و هه‌رێمى و ناوده‌وڵه‌تى له‌ پشت دامه‌زرانن ئى كیان نیمچه‌ ره‌سمیه‌ بویه‌، وه‌لى هوكار سه‌ره‌كى ئى ده‌سكه‌فت گه‌ورا له‌ میژووى هاوچه‌رخ كورد هه‌مان یه‌كگردن و یه‌كده‌نگى و یه‌كدڵى ناونى سه‌ركردایه‌تى و جه‌ماوه‌ر بویه‌، ئه‌گه‌ر ئمڕوو كورد له‌ توركیه‌ پڕ وه‌ده‌م هاوار ئه‌كا و داواى ماف ره‌واى خوه‌ى كه‌ێد، ئه‌گه‌ر كورد له‌ شاره‌یل كوردنشین و سه‌رجه‌م شاره‌یل سووریه‌ بویه‌سه‌ پیشه‌نگ داواكردن ئازادى و دیموكراسى، ئه‌گه‌ر كورد له‌ ئیران ئمڕوو بویه‌سه‌ ئومیدیگ ئه‌را به‌رقه‌رارى ئازادى و دیموكراسى راسكانى له‌ى وڵاته‌ گشت یانه‌ یه‌كم نیاز وه‌یه‌كیه‌تى و ته‌بایى و یه‌كخستن رزه‌یل ملله‌ته‌گه‌مان و له‌ شوون ئه‌وه‌ وه‌پشتگیرى ناوده‌وڵه‌تى دیرێ، وه‌لى وه‌داخه‌و له‌ هه‌رێم كوردستان ك بویه‌سه‌ جى ئومید هه‌ر كورد و ئازادیخوازیگ دوینیم ئۆپۆزسیون په‌نجه‌ ناسه‌ بان هه‌سیارترین و گرنگترین خاڵ ك ئه‌ویش له‌یه‌ك چه‌كانن یه‌كیه‌تى رزه‌یل ملله‌ته‌گه‌مانه‌ ك ئى مه‌به‌سه‌ له‌ رویداگه‌یل ئى چه‌ن مانگ دویاخره‌ له‌ ره‌فتار لایه‌نه‌یل ئۆپۆزسیون ره‌نگ داگه‌سه‌و . وه‌راسى ئمڕوو ئه‌رك هه‌ر تاكیگ كورد، سیاسه‌تمه‌دار و رووشنهویر و جفتیار و كارگه‌ر و كاسب و حزبه‌یل و رێكخراوه‌یل سیاسى كوردستانیه‌ و هه‌میش ئه‌رك هه‌ر كه‌سیگه‌ ك خوه‌ى وه‌دڵسووز ملله‌ت و نیشتمان و خه‌مخوه‌ر دویاڕووژ ملله‌ته‌گه‌مان و نه‌وه‌یل ئاینده‌ زانیگ بایه‌د ته‌قالا بكه‌یم هه‌رچى زیاتر یه‌كیه‌تى و رووح برایه‌تى و ته‌بایى له‌ ناونى جه‌ماوه‌ر بته‌وه‌و بكه‌یم تا ملله‌ته‌گه‌مان وه‌ره‌و كنار ئارامى بوه‌یم و بڕه‌سیمه‌ ئه‌و ئامانجه‌یله‌ ك

شه‌هیده‌یلمان له‌ پیناوى گیان به‌خشین، ئمڕوو بایه‌د هه‌ر حزب و ریِكخراویگ كوردستانى ك خوه‌ى وه‌خاوه‌ن كیشه‌ى ره‌واى ملله‌ته‌گه‌مان زانیگ، زووان و قه‌ڵه‌مى ئه‌را یه‌كتر وه‌خشین وه‌كار باریگ و له‌ هه‌ر وشه‌یگ یا باوه‌تیگ یا قسه‌یگ ك ناكووكى بخه‌یگه‌ ناونى ملله‌ت پارێز  بكه‌ێد و وه‌گیانیگ برایانه‌ پشتگیرى له‌ حكوومه‌ت و په‌رله‌مان كوردستان بكا ك یه‌ گه‌وراترین ده‌سكه‌فته‌ ئه‌را ملله‌ته‌گه‌مان له‌ شوون ده‌یان ساڵ له‌ به‌شبه‌شه‌وكردن خاك و نیشتمانمان و ئه‌گه‌ر رخنه‌ یا گله‌یى یا ناره‌زایه‌تییگ له‌ هه‌ر وزاره‌ت و دام و ده‌زگایگ حكوومى و حزبى هه‌س وه‌رووحیگ مه‌سئولانه‌ له‌ بان مێز دیالۆگ بنیشن و ناره‌ساییه‌گان و كه‌موكوڕیه‌گان له‌یه‌كه‌و بیه‌ن و ریگه‌چاره‌یل عه‌قڵانى و مه‌نتقى ئه‌را كیشه‌و گرفته‌یل بویننه‌و  و لاپه‌ڕه‌یلیگ پڕ له‌ سه‌روه‌رى و سه‌ربه‌رزى له‌ میژوو پڕ له‌ شانازی ملله‌ته‌گه‌مان ئه‌را خوه‌یان تومار بكه‌ن و یه‌یش بزانن ك وه‌یه‌ك ده‌س چه‌پڵه‌ نیه‌كوتیه‌ێ و بایه‌د گشت لایگمان وه‌ل یه‌كا كار و چالاكى هاوبه‌ش بكه‌یم ئه‌را ئه‌وه‌گ ملله‌ته‌گان ئه‌را هه‌میشه‌ له‌ ژیر چه‌پوك داگیركه‌ره‌یل رزگاربكه‌یم.

 

جه‌واد كازم فه‌یلى