چه‌ له‌گه‌ناته‌كارى خراوتره‌؟

شفق نيوز

 

دوینید له‌وه‌ر خاتر كاریگ ئاسایى وه‌خت فره‌یگ بایه‌سه‌ چه‌وه‌ڕى بكه‌ید و له‌ هه‌مان داواى به‌ڵگه‌یلیگ له‌لید كریه‌ید سه‌رده‌مى ته‌واو بویه‌، یه‌یش له‌وه‌ختیگ زوورم ده‌وڵه‌ته‌یل جه‌هان ته‌نیا یه‌ك ناسنامه‌ دیرن و گشت زانیارییگ له‌تى گرده‌و كریاگه‌، وه‌لى ئیمه‌ ره‌گه‌زنامه‌ دیریم و شهاده‌ جنسیه‌و كارت خوه‌راك و پاسه‌پۆرت و كارت وزاره‌ت كووچكریاگه‌یل له‌ حاڵه‌تیگ ئه‌گه‌ر كووچكریاگ بویده‌ ك بایه‌سه‌ ئسپاتى بكه‌ید و له‌شوون ئه‌وه‌یش بایه‌سه‌ تابع پۆستى بارید وه‌ل داواكاریه‌یل تر ك بایه‌سه‌ له‌باند ئاماده‌یان بكه‌ید.

له‌ به‌عزه‌ ده‌زگایه‌یلیگیش چشت ئه‌ڵڵاجه‌وى دوینریه‌ید و ناڕه‌حه‌ت وه‌پى بوید، ك ئه‌ویش ئه‌وه‌سه‌ مه‌ردم فره‌یگ ڕز گرن ئه‌را ماوه‌ى فره‌یگ و له‌لى هه‌س چه‌ن سه‌عاتیگ وه‌پى چوود تا نوره‌ى تیه‌ید. وه‌ل ئه‌وه‌یشا فره‌جار چه‌وه‌ڕى كریه‌ید تا كارمه‌ندیگ ده‌ربچوود و ئمزاى وه‌ره‌قه‌گه‌د بكا، ك یه‌یش چه‌وه‌ڕى فره‌یگ تواید.

جى داخه‌ ئى ڕزگرتنه‌ وه‌ ئاشكرا دیاره‌و یه‌یش له‌لایه‌ن بڕیگ له‌ كارمه‌نده‌یله‌و ئه‌نجام گرید وه‌خاتر ئه‌وه‌ك مه‌ردم بیزار بوون له‌ چه‌وه‌ڕیكردن و له‌ڕى كه‌سه‌یل تره‌و مامڵه‌ وه‌ل كارمه‌نده‌یله‌ بكه‌ن تا كاره‌گه‌یان وه‌ پویل جیوه‌جى بكه‌ن ئه‌ڕایان.

ئنجا له‌ى حاڵه‌ته‌ ئه‌گه‌ر كه‌سیگ كارى زوى جیوه‌جى نه‌كریاو هه‌ر له‌ناو ڕزه‌گه‌ مه‌ند ئه‌وه‌ بیگومان دوینید له‌لایه‌ن كارمه‌نده‌یل ده‌زگاگه‌وه‌ داواى به‌ڵگه‌یلیگ له‌لیان كریه‌ید ك هاوردنیان ناڕه‌حه‌ته‌و یه‌یش ناچاره‌و بایه‌سه‌ دى هویر له‌وه‌ بكاد ك له‌ڕى پویلداینه‌و چاره‌سه‌ر كاره‌گه‌ى بكا وه‌نا په‌له‌تیقه‌ى فره‌یگ ئه‌راى دویننه‌و.

وه‌لى دیارده‌ى ئه‌ڵڵاجه‌وى ك خه‌ریكه‌ بڵاوه‌و بوود، ئه‌ویش ئه‌وه‌سه‌ ك بڕیگ له‌ كارمه‌نده‌یل ئاڵشت فایله‌یل كه‌ن له‌ناونى خوه‌یان وه‌ مه‌هانه‌ى ئه‌وه‌ك فڵان كارمه‌ند ده‌سڵات ته‌واوكردن ئى فایله‌ دیرید و له‌ده‌سڵات من نیه‌، ئنجا وه‌ى خاتریشه‌ نامه‌یگ ئه‌ڕا كارمه‌ندیگ تر نویسنید له‌وه‌ر خاتر ئمزایگ بویچگ و دى نوڕید هه‌ر ئیسه‌ر ئه‌وسه‌ریه‌ تا بزانید ئه‌و كارمه‌نده‌ له‌كوورا نیشتگه‌ تا ئمزایگ ئه‌ڕاى بكا.

وه‌ل ئه‌وه‌یشا دوینید فره‌یگ له‌ كارمه‌نده‌یل وه‌ مه‌هانه‌ى خراوى بار ئاسایشه‌و رووژه‌یل فره‌یگ ده‌وام ناكا، ئنجا كیشه‌گه‌ ها له‌ورا تا خود ئه‌و كارمه‌ندیشه‌ نه‌ود ئه‌و فایله‌یله‌ هه‌ر مینیده‌یان و كه‌س ئمزایان ناكا و دویاخریش مه‌ردم بیتاوان ناچارن ئى جه‌وره‌ بكیشن و باجه‌گه‌ى بیه‌ن، ك بیگومان ئى مه‌سه‌له‌یله‌ هویچیان كه‌متر نیه‌ له‌ گه‌ناته‌كارى.

حسێن عه‌لى غالب

ج . أ