په‌تاى هه‌ڵه‌وگه‌رادنن

شفق نيوز

 

ئایا بوود بویشید هه‌ڵه‌وگه‌ردانن" ترجمه‌" جووریگه‌ له‌ ناپاكى و ئیچنه‌ كردوید ك مه‌ردم وه‌چه‌و سووكه‌و ته‌ماشاى ئى كاره‌ بكه‌ن و قه‌در نویسه‌ر له‌لایان له‌ هه‌ڵه‌وگه‌ردن زیاتر بوود؟

گۆته‌ قسه‌ى جوانیگ دیرێد ك ئویشێد:(هه‌ر قه‌واره‌یگ ئاڵشتكارى ناێده‌ بانى، وه‌ره‌و نه‌مان چوود). یه‌یش ماناى ئه‌وه‌سه‌ هه‌ر ده‌قیگ ك هه‌ڵه‌وگه‌ردانن جوواوى نه‌یاسه‌و یا وه‌ل زووانه‌یل تر خوه‌ێ نه‌گونجنێد، ناتویه‌نیم وه‌ ده‌قیگ زینگ هساوى بكه‌یم.

شایه‌د هه‌وڵ فره‌یگیش بیه‌یم ته‌نیا ده‌قیگیش نه‌وینیمنه‌و ئه‌وقه‌ره‌ ئاشكراو ره‌وان بوود و كاریگه‌رى ده‌قیگ تر هامیته‌ى نه‌ود و شایه‌ مه‌ردمانیگ ئیچنه‌ هویره‌و بكه‌ن ك ئه‌گه‌ر بكه‌فێده‌ ژیر كاریگه‌رى ده‌قه‌یل تره‌و دى خوه‌یان له‌لیان گوم بوود. وه‌لى نه‌خه‌یر ئى مه‌سه‌له‌ وه‌ كاریگه‌رى ده‌ق و كلتووره‌یل جیاواز، فیشتر گه‌شه‌ ئه‌كا.

غه‌ڵه‌ت گه‌ورایگه‌ ئه‌گه‌ر باوه‌ڕمان ئیچنه‌ بوود ك هه‌ڵه‌وگه‌ردانن سه‌ركه‌فتگ ئه‌وه‌سه‌ هه‌ر جوور خوه‌ى بوود، وه‌و مانا ك ئه‌گه‌ر ده‌قیگ له‌ عه‌ره‌بیه‌و یا له‌ سویدیه‌و كردیمه‌ كوردى و خوه‌نه‌وار ئیچنه‌ هس كرد هه‌ڵه‌وگه‌رداننه‌گه‌ هه‌ر جوور ئه‌وه‌سه‌ ك وه‌ كوردى نویسریاوید، ئه‌وه‌ بێگومان به‌ڵگه‌یگه‌ ئه‌را ئه‌وه‌گ هه‌ڵه‌وگه‌ردنیگ ده‌سپاك نییم، چوینكه‌ سروشت یا تایبه‌تمه‌ندى زووانه‌ هه‌ڵه‌وگه‌ردیاگه‌گه‌ بایه‌سه‌ دیار بوود.

نك ناپاكى له‌ هه‌ڵه‌وگه‌ردانن ئه‌وه‌سه‌، له‌ڕێ زووان دویه‌مه‌و ده‌قیگ بكه‌یمنه‌ كوردى، ئه‌را نموونه‌: ئه‌گه‌ر هات و نویساننیگ ك بنه‌ڕه‌ته‌گه‌ى فه‌ره‌نسیه‌و كریاسه‌ فارسى، ئیمه‌ بكه‌یمه‌ى كوردى وه‌بى ئاماژه‌كردن وه‌ هه‌ڵه‌وگه‌ردنه‌گه‌.

هه‌ڵه‌وگه‌ردانن داهێنانیگه‌و كه‌م تا فره‌ په‌یوه‌ندى وه‌ ناپاكیه‌و نه‌یرێد، به‌ڵكوو دوباره‌ نویساننه‌وه‌ى ده‌قیگه‌ له‌ وه‌ختیگ جیاواز له‌و وه‌خته‌ ك ده‌قه‌ ره‌سه‌نه‌گه‌ له‌تى نویسیاگه‌.

هه‌ڵه‌وگه‌ردانن جوور داهێنان، سه‌فه‌ریگه‌ ئه‌را دونیاى تازه‌یگ ، یا خزیانیگه‌ له‌ شوون خوه‌یه‌و ئه‌را شوونیگ تر. هه‌ر ده‌قیگ سه‌ر نه‌چه‌مان ئه‌را خزیان و خوه‌ندنه‌وه‌ى تازه‌، عومرى دریژ نییه‌. خزیان و خوه‌ندنه‌وه‌ى تازه‌یش وه‌بوونه‌ى هه‌ڵه‌وگه‌رداننه‌و ده‌سه‌وه‌ر كریه‌ن. ئنجا ده‌ق زینگ ئه‌مانه‌تیگه‌ نادریه‌یده‌ خاوه‌نه‌گه‌ى، چوینكه‌ ئى زووانه‌گه‌ ده‌ێده‌ ده‌س چه‌نه‌ها زووان تر. ده‌ق جوان مینێده‌ په‌تا، وه‌ بوونه‌ى هه‌ڵه‌وگه‌رداننه‌و چاره‌سه‌ر و ده‌رمان و ساڕێژكردن بڵاوه‌و ئه‌كاو ره‌سێده‌ نه‌مرى.

حه‌مه‌ سه‌عید حه‌سه‌ن

ج . أ