ئه‌مریكاو بریتانیا كامیان دووس كوردن؟

شفق نيوز

فره‌جار ئویشن ئایا ئه‌مریكاو بریتانیا كامیان دووس كوردن؟ جواو ئى پرسیاریشه‌ ئاشكراس ئه‌را ئه‌وانه‌ك تاریخ خوه‌ندنه‌و زانن ك كام ده‌وڵه‌ت و گه‌وراهیزیگ  بویه‌ مایه‌ى به‌شبه‌شه‌وبوین خاك كورد.

ئیمه‌ زانیم ك بریتانیا رووژگاره‌یل فره‌یگ كیشمه‌كیش راسه‌خۆ داشت وه‌ل شووڕش رزگاریخواز كوردا، وه‌تایبه‌ت له‌سه‌ره‌تایه‌یل سه‌ده‌ى گوزه‌یشت و نه‌یشت شووڕش شێخ مه‌حموود بڕه‌سیگه‌ مه‌رام، ئنجا جویر ئه‌وه‌ك ئاشكراس سیاسه‌ت ئى جووره‌ ده‌وڵه‌ته‌یلیگ ڕیشگ قویلیگ دیریگ و هه‌میشه‌ مقه‌یه‌تى له‌لى كریه‌یگ.

شێخ محه‌مه‌د خاڵ له‌ كتاو(سه‌رگوزه‌یشته‌یل ژیان)وه‌ى جووره‌ باس له‌رویداگیگ تاریخى ئه‌كاو ئویشیگ : میجه‌ر ئه‌دمۆنس سێ ساڵ موسته‌شار وزاره‌ت ناوخوه‌یى بویه‌ له‌به‌غداو گشت ساڵى هاتیاگ ئه‌را گه‌شتكردن له‌كوردستان و گشت پیاوه‌یل گه‌وراو خوه‌نه‌واریش ناسیاگ، ك سێ ساڵه‌گه‌ى ته‌واو كرد هاته‌ڕا سڵَێمانى، ئنجا ئه‌و وه‌خته‌ مه‌عروف جیاووك پاریزگار یا محافز سڵێمانى بویه‌و ده‌عوه‌تیگى كردویگ ئه‌را نانخواردن و مه‌ردمان فره‌یگیش له‌ده‌ورى جه‌مه‌و بوین، وه‌ختیگیش چیه‌سه‌وه‌ ئه‌را له‌نده‌ن، له‌شوون ئه‌وه‌ له‌ساڵ 1955 یه‌كیگ له‌ ناسیاره‌یلى وه‌ نه‌خوه‌شى چیه‌سه‌ڕا له‌ندن ك ناوى حه‌مه‌ئاغاى عه‌بدلڕه‌حمان ئاغا بویه‌و له‌ورا میجه‌ر ئه‌دمۆنس چیه‌سه‌ سه‌ردانى و ده‌عوه‌تى كردگه‌ ئه‌را نانخواردن له‌ ماڵه‌گه‌ى خوه‌ى، ئنجا ئه‌دمۆنس باس كردگه‌ ئه‌را حه‌مه‌ئاغاو ئویشیگ : وه‌ختى له‌ سڵێمانى هاتمه‌سه‌وه‌ ئه‌را له‌نده‌ن قاقه‌زیگ  دویر ودریژ نویسامه‌ ئه‌را وه‌زیر خارجیه‌ى بریتانى ك وتمه‌سه‌پى: ك ملله‌ت كورد ملله‌تیگ 25 ملیۆنیه‌و خاوه‌ن فه‌رهه‌نگ و ملله‌تیگ ئازاو دڵسووز و وه‌فادار و فامیده‌و داناس، ك تائیسه‌ هه‌ر له‌یوا مه‌ندنه‌ وه‌بى ئه‌وه‌ك بڕه‌سنه‌ هه‌ق خوه‌یان، ئنجا ئمڕوو رووژ ئه‌وه‌ هاتگه‌ ك بریتانیا ده‌س به‌یگه‌ ژیر باڵیان و ده‌سمیه‌تیان به‌یگ تا بڕه‌سنه‌ ئامانج خوه‌یان، ئه‌دمۆنس ئویشیگ: وه‌ختى نامه‌گه‌م ره‌سیه‌سه‌ وه‌زیر خارجیه‌ یه‌كسه‌ر كلكرده‌ شوونم و منیش چیمه‌ دیدارى، وه‌لى فره‌ له‌لیم تویڕه‌ بوى و وته‌پیم: تن ئه‌ڕاچه‌ ئى جووره‌ نامه‌یگ  ئه‌ڕام نویسید؟ نیه‌زانید ك ده‌وڵه‌ت بریتانیا هه‌ر له‌زویه‌وه‌ بڕیار داگه‌ هویچ وه‌ختى ده‌سمیه‌ت كورد نه‌یه‌یگ!!

ئنجا ئایا تویه‌نیم دڵخوه‌شى سه‌د له‌سه‌د به‌یمنه‌ خوه‌مان وه‌ ئه‌وه‌ك بریتانیا پشتگیرى له‌نه‌ته‌وه‌ى كورد ئه‌كا؟ یا ئه‌مریكاى گه‌وراهیز ك ئیسه‌ هیز ئاسمانى و ده‌ریاو ده‌یشت گشتى كۆنترۆڵ كردگه‌ چوین نوڕیگه‌ كیشه‌ى كورده‌وه‌؟

ئیمه‌ فره‌جار باس كه‌یم و ئویشیم: ئمڕوو دونیا گشتى به‌رژه‌وه‌ندیه‌، ئمریكایش ئمڕوو له‌ناوچه‌گه‌ له‌وه‌رخاتر كورد نه‌ویسیاگه‌، به‌ڵكوو به‌رژه‌وه‌ندى له‌یوا له‌لى كردگه‌ وچانیگ به‌یگ و جووریگ له‌ دووسایه‌تى باریگه‌ به‌رهه‌م، وه‌لى وه‌ل ئه‌وه‌یشا هه‌ر بایه‌سه‌ ئیمه‌ى كورد خوه‌مان دووس خوه‌مان بویم و یه‌كڕزى له‌ناو خوه‌مان دروس بكه‌یم، ئنجا ئه‌گه‌ر ئه‌مریكاو بریتانیایش وه‌ڕاسى بوینه‌ دووسمان ئه‌وه‌ ته‌كانیگه‌ وه‌ره‌و سه‌روه‌خوه‌یى و ئه‌گه‌ریش وه‌چه‌واشه‌وه‌ بوى و مه‌زه‌نه‌ى غه‌ڵه‌تیگ بوى ئه‌وه‌ بزان دووس كورد ته‌نیا هه‌ر ریكخستن ماڵ كورده‌و یه‌كده‌نگى و یه‌كڕه‌نگى.

 

جه‌ماڵ ئه‌ركه‌وازى