كوشیان حاجى به‌گ وه‌ ده‌سایس ژنه‌گه‌ى

شفق نيوز

  ملله‌ت كورد خاوه‌ن تاریخیگه‌ پڕ له‌ سه‌روه‌رى و شووڕش و فیداكارى، ك وه‌ جووریگ له‌وه‌ر خاتر ژیان سه‌روه‌خوه‌یى و دویر له‌ چه‌وسیان هه‌میشه‌ هه‌وڵ بیوچان دانه‌، وه‌لى فره‌جار دریغى و غه‌در و خیانه‌ت ملله‌ته‌یل تر و جارجاریگیش خیانه‌ت ناوخوه‌یى و خوه‌یفرووشى له‌یوا كردگه‌ ملله‌ت كورد له‌ كه‌مترین هه‌قه‌یل خوه‌ى بیبه‌ش بوود، هه‌ر له‌وه‌ر ئه‌وه‌یش ناچار بویه‌ ژیان خوه‌ى بگوزرنید وه‌ل رووژگاره‌یلیگ ك خوه‌یشى متمانه‌ وه‌پى نه‌یاشتگه‌.

له‌ سه‌رده‌م دونبولیه‌یل و هه‌ڵكه‌فتگى بڕیگ له‌ میر و پیاوه‌یل ئازاى ئه‌و ئه‌و هووزه‌ ك تاریخ شایه‌تى له‌بانى ئه‌یاد كه‌سه‌یلیگ فه‌رمانڕه‌واو ده‌سڵاتدار بوینه‌و نازناو گه‌ورایى ده‌ركردنه‌، وه‌لى دیاره‌ له‌وه‌ر كه‌مى له‌شكر و چه‌ك و تفاق زه‌ره‌د وه‌پیان ره‌سیه‌و كزى وه‌ خوه‌یانه‌و دینه‌و ناچار بوینه‌ پاڵ بیه‌نه‌ ده‌سڵاتیگ ك مقه‌یه‌تى له‌لیان بكا.

حاجى به‌گ كوڕ شێخ به‌هلول به‌گ دونبولى ك میریگ بویه‌ له‌ سه‌رده‌م پاشایه‌تى ته‌هماسب سه‌فه‌وى، بویه‌سه‌ فه‌رمانڕه‌واى خۆیه‌و سه‌گمه‌ن ئاوا، ئنجا ئى میره‌ له‌وه‌ر ئه‌وه‌گ دڵسووز دام و ده‌زگا بویه‌و كرده‌وه‌یلى په‌سه‌ن بویه‌ نازناو " سوڵتان " وه‌پى دریا، وه‌لى وه‌ گووره‌ى رویداگه‌یل تاریخ له‌یوا ده‌ركه‌فتگه‌ ك نازناو" سوڵتان" ئه‌را سووكایه‌تیكردن ناو سوڵتان عوسمانى بویه‌، هه‌ر له‌وه‌ر ئه‌وه‌یش عوسمانیه‌یلیش له‌ وه‌رانوه‌ر ئه‌وه‌ نازناو " پاشا " دیانه‌ مه‌ردم ئه‌را خاتر سووككردن ناو " شا ".

وه‌ختیگ " ئه‌سكه‌نده‌ر پاشا "ى میر میره‌یل وه‌ ده‌سایس حه‌سه‌ن به‌گ مه‌حموودى و خان محه‌مه‌د ك هه‌ردوگیان برا بوین، وه‌هیزه‌یل كوردستانه‌و په‌لامار حاجى به‌گ دونبولى دان ك پایته‌خته‌گه‌ى شار خۆیى بوى ، له‌ى حاڵه‌ته‌ حاجى له‌وه‌ر ئه‌وه‌ك هیز و مه‌ردمه‌گه‌ى چوینه‌ جه‌نگ له‌لى دویر بوین ناچار بوى قاپى قه‌ڵایه‌یلى كلیل و مه‌حكه‌م بكا، وه‌لى ژنه‌گه‌ى ك خوه‌یشگ حه‌سه‌ن به‌گ و محه‌مه‌د مه‌حموودى بوى ، ژیر وه‌ژیر وه‌ل برایه‌یلیا قسه‌یان كردوینه‌ یه‌كیگ و شه‌و وه‌دزیه‌و قاپیه‌یل قه‌ڵاگه‌ ئه‌را دوشمن وازكردوید، دى وه‌و جووره‌ ئه‌سكه‌نده‌ر پاشا شار خۆیى داگیر كرد.

حاجى به‌گیش دویاى جه‌نگ و كیشمه‌كیش فریه‌یگ كوشیاو ته‌نیا كوڕ كورپه‌یگ له‌شوونى مه‌نده‌جى، ك وه‌ناو خویه‌و ناوى نریا " حاجى به‌گ "و شا ته‌هماسب سه‌فه‌وى فه‌رماندا وه‌پویل ده‌وڵه‌ت ئمایه‌ت بكریه‌ید.

حاجى به‌گ كوڕ وه‌ختیگ گه‌ورا بوى خسته‌ى ده‌وره‌ى ئه‌فسه‌رى پاسه‌وان گه‌وراى باره‌گا، دویاى شوون ماوه‌یگ فه‌رمانڕه‌وایى ناوچه‌ى "ئاباقا" وه‌پى سپاردو هووز و تیره‌یل دونبولى له‌ده‌ورى گرده‌و بوین.

له‌ ساڵه‌یل 984 – 998 ك له‌وه‌ختیگ ك جه‌نگ له‌ناونى عوسمانى و سه‌فه‌وى رویداو ماوه‌ى 20 ساڵیگ دریژه‌ داشت، ته‌هماسب و ئسماعیل دویم و محه‌مه‌د خوابه‌نده‌ گشتیان یه‌ك له‌شوون یه‌ك مردن و عه‌باس سه‌فه‌وى هاته‌ بان ته‌خت، ئه‌وه‌ بوى ئه‌میرخان موسلۆ دا كریا سه‌رگه‌وراى ئازه‌ربایجان و كه‌فته‌ جه‌نگ وه‌ل عوسمانیه‌یل و حاجى به‌گیش وه‌ل هیز دونبولیا برد ئه‌را جه‌نگ و له‌و جه‌نگه‌له‌شكره‌گه‌یان شكه‌ست خواردو حاڵیان هاته‌ ته‌نگ و حاجى به‌گ له‌ ئاو "كووڕ" خنكیاو گیان له‌ده‌سدا.

ره‌نجده‌ر ئاواره‌

ج . أ