ماڵپه‌ڕ ویكیلیكس و ئه‌مریكاى به‌سه‌زووان

شفق نيوز

ئه‌وه‌گ بویه‌ مرافه‌یان له‌سه‌ر میوه‌یگ ك دینه‌وه‌ى و بویه‌ زوورانبازییان له‌سه‌رى، یانه‌ هاتن مه‌یموونه‌گه‌ كردنه‌ دادپه‌روه‌ر یا حه‌كه‌م و وتنه‌ پى ك ڕازیین وه‌ هه‌ر حوكمیگ ئه‌و ده‌یده‌ى... مه‌یموونیش قه‌بوول وه‌ى كاره‌ كرد و بڕیار دا میوه‌گه‌ بكه‌یده‌ دو كوته‌و، وه‌لى وه‌دڵئه‌نقه‌ز كوتیگى گه‌ورا و ئه‌واكه‌ى تر بویچگ بڕى، وه‌ختى هه‌ردو كوته‌گه‌ نا بان هه‌ردو تاى ته‌رازوى ، كوته‌ قورسه‌گه‌ ئاشكرا دیاردا و ئینجا هات قه‌پیگ دا له‌ كوته‌ گه‌وراگه‌ تا یه‌كسانیه‌و بكه‌ید، وه‌لى ئیجاره‌ ئه‌و كوته‌گه‌ى له‌ى كوته‌گه‌ قورستره‌كه‌و بوى و هات قه‌پیگتر له‌لى خوارد وه‌لى وه‌ هه‌مان شیوه‌، سووكتره‌و بوى، وه‌ى جووره‌ هه‌رجارى قه‌پ دیده‌ یه‌كیگ له‌ كوته‌گان، له‌یرا كه‌رویشك و سمووره‌ له‌ مه‌مه‌ر مه‌یموونه‌گه‌ ڕه‌سینه‌وه‌، و وتنه‌ پى: كوره‌ هه‌رچى له‌لى مه‌نیه‌سه‌ بیه‌ره‌ى پیمان خوه‌مان به‌شى كه‌یمن، وه‌لى مه‌یموونه‌گه‌ ڕازى نه‌وى و وته‌پیان : ئیوه‌ خوه‌دان داواى حوكم دادپه‌روانه‌یگ له‌ من كردین و بایه‌سه‌ منیش ئى داواكاریدانه‌ دادپه‌روه‌رانه‌ جیوه‌جى بكه‌م، وه‌ى جووره‌ مه‌یموونه‌گه‌ میوه‌گه‌ گشتى خوارد و كه‌رویشك و سمووره‌گه‌یش ته‌نیا ئه‌وه‌ بڕیا پیان ك ئاوده‌میان بایده‌ خواره‌وه‌ و پڕدڵیان خوسه‌ بوود!!.

وه‌رج له‌ چه‌ن ڕووژیگ ماڵپه‌ڕ ویكیلیكس (400000) به‌ڵگه‌نامه‌ى تایبه‌ت وه‌ عیراق بڵاوه‌و كرد، وه‌لى چوین وه‌ریان گرتیه‌ و كى داسانه‌ى ده‌سیان؟ مه‌گه‌ر خودا خوه‌ى بزانید!! چشتیگ من بزانمه‌ى ئه‌وه‌سه‌ ك ئه‌مریكا قه‌بوول نیه‌كه‌ید، چشتى زه‌ره‌د بڕه‌سنیده‌ به‌رژه‌وه‌ندى و پلان وئامانجه‌گانى، بڵاو بكریه‌ید..و ئه‌وه‌گ من له‌لى ئاگا دیرم و خودا له‌من له‌لى ئاگادارتره‌كه‌ ئه‌وه‌سه‌ ك ده‌یان هه‌زار به‌ڵگه‌نامه‌ى خه‌ته‌ناكتره‌ك هه‌س ك گرنگترن ئه‌را ڕه‌سین وه‌ هه‌قه‌یل ئاده‌میزاد و وه‌رگرى كردن له‌ مه‌زڵوومه‌یل ك بڵاو نه‌كریانه‌ و قه‌تیش بڵاو نیه‌كریه‌ن..!! ئه‌مریكا تاكه‌ وڵاتیگه‌ له‌ جه‌هان ك ده‌سڵات و قه‌ڵمڕه‌وى تاقانه‌یگ دیرى، ك چاودێرى گشت تووڕه‌یل ئه‌نته‌رنێت له‌ ته‌مام جه‌هان بكه‌ید!! ئه‌گه‌ر باید و بویشیمن ك ئى به‌ڵگه‌نامه‌یله‌ وه‌ ڕیگه‌ى چه‌ن سه‌رباز و ئه‌فسه‌ر ئه‌مریكییگه‌وه‌ وه‌ دزیه‌و ڕه‌سینه‌ ده‌س به‌ڕێوه‌به‌ر ئى ماڵپه‌ڕه‌ ، خوو خود ئى به‌ڕێوه‌به‌ره‌ وه‌رج له‌ چه‌ن هه‌فته‌یگ له‌ بڵاوكردنیان ڕى دا ئه‌را بڵاوكردنیان، له‌و وه‌ختیشه‌ ئه‌مریكا تویه‌نستیاد ئه‌و ماڵپه‌ڕه‌ بووه‌سید وه‌ مه‌هانه‌ى مه‌ترسیى له‌ بان سیاسه‌ت خارجى ئه‌مریكا؛ چوینكه‌ ئه‌مریكا وه‌ى مه‌هانه‌ بوردمان و ده‌وه‌شانن ئاراسته‌ى چه‌ن وڵاتیگ كرد و هه‌زاران كه‌س كوشت، ئه‌ى نه‌تویه‌نست ماڵپه‌ڕیگ بووه‌سید؟!  دیاره‌ ك ئه‌مریكا تواید له‌ سویكیگ دیارى كریاى گه‌نگیرمان بكه‌ید تا هه‌ر له‌و سویكه‌وه‌ هویره‌و بكه‌یمن، خوه‌یشى له‌ماوه‌یگ تا ماوه‌یگتر گه‌رده‌گویچان میدیاییگ به‌رپا كه‌ید تا چه‌ن سیاسه‌تمه‌دار و سه‌ركرده‌ و ڕووژنامه‌ و كه‌ناڵه‌یل ته‌له‌فزیۆنى وه‌شوونیه‌و لووقه‌ و ده‌وده‌وان بكه‌ن، و مه‌ردم چوى كه‌رویشك و سمووره‌گه‌ وه‌پیان باید و داواى حوكم مه‌یموونه‌گه‌ بكه‌ن..!!! و دویاخریش هویچ وه‌گیرمان نیه‌كه‌فى و ئه‌وان گشت چشتیگ ئه‌را خوه‌یان به‌ن..!! ئیمه‌ بیمنه‌سه‌ وه‌یلكانیگ ك مه‌ردم كه‌یده‌ خه‌نستنه‌وه‌ و كه‌سیگ وه‌دزیه‌و جویلنیده‌ى تا مناڵه‌یل وه‌پى بخه‌نن، و وه‌ڕاسییش خه‌نستیمن وه‌لى وه‌خوه‌مان خه‌نستیمن ..!! ئیمه‌ مناڵه‌گانیمن!! هه‌ر ئیمه‌یش ئه‌و وه‌لكانه‌یمنه‌ ك جویلننه‌ێَ!! وه‌لى ئه‌و كه‌سه‌گ ك خوه‌ى شاردیه‌سه‌و خوه‌یانن!! ... ئه‌رك سه‌رشان تنه‌ ك بزانید خوه‌یان كیین؟!.