ژنه‌ كورد فه‌یلى سویه‌ى له‌كاركه‌فتگ نیه‌

شفق نيوز

و ناهمیبوین فره‌یگ كیشا، بیگومان یه‌یش هووكار جوراوجوور داشت له‌وانه‌یش: سیاسى و ئابوورى و كوومه‌ڵایه‌تى و ره‌گه‌زى و چینایه‌تى...هتد، ك وه‌ك سویه‌ى له‌كاركه‌فتگیگ له‌لى كرد.

یه‌یش له‌وه‌ختیگ ك ژنه‌یل كورد تویه‌نستن زاڵ بوونه‌ بان ئه‌و مه‌ینه‌تى و تون و تیژى و ناهمیبوینه‌و تویه‌نست گشت وه‌ربه‌سیگ له‌وه‌رده‌م خوه‌ى دویره‌و بخاو په‌یوه‌ندى كردنه‌ خوه‌ندنگاو له‌هه‌مان وه‌خت وه‌رده‌وام بویه‌ له‌كاروان رووشنهویرى و چیه‌ مه‌یدان زانكۆ یا جامعى و چه‌كدار خوه‌ى كرد وه‌گشت زانسته‌یل و هونه‌ر له‌ڕى خوه‌ندن ئه‌كادیمى و به‌شدار كارایگ بوى ئه‌را وسیان شان وه‌شان برایه‌یلى له‌ ڕوڵه‌یل كوردستان و عراقى له‌گشت مه‌یدانه‌یل كوومه‌ڵگا، ئه‌وه‌ بوى چینه‌ ناو ئه‌نجوومه‌ن و ڕیكخریاگه‌یل كومه‌ڵگاى مه‌ده‌نى و تویه‌نست كار بكا له‌گشت هونه‌ر و زانستیگ و ئسپات ئازایه‌تى خوه‌ى كرد، له‌وانه‌یش سامیه‌ عه‌زیز محه‌مه‌د ئه‌ندام ئه‌نجوومه‌ن نوێنه‌ره‌یل و ئه‌وانه‌ك خوه‌ندن زانكۆ یا جامعى ته‌واو كردنه‌و كارمه‌نده‌یل و ژن ماڵ، ك گشت ئه‌یانه‌ نموونه‌ى ژنه‌ كورد فه‌یلیه‌و یه‌یش نیشانه‌ى شانازى و ڕیز و حورمه‌ته‌. وه‌لى له‌یرا بایه‌سه‌ ئشاره‌ت وه‌ خه‌بات و ئازایه‌تى ئى جووره‌ ژنه‌یلیشه‌ بكه‌یم ك هویچ وه‌ختیگ نه‌چه‌میانه‌وه‌و هه‌ر وه‌رده‌وام بوین له‌وه‌ڕیكردن ژیان و سه‌رله‌نوو بنیاتناین و كاركردن له‌وه‌ر خاتر ئاینده‌ى رووشنیگ ئه‌را روڵه‌یلى، یه‌یش بیجگه‌ ئه‌وه‌ سفه‌ته‌یل جوانه‌ له‌ كه‌سایه‌تى و هیز ئه‌قڵ و سووزداریه‌ ك دیرنه‌ى شان وه‌شان سفه‌ته‌یل جوان ئنسانى و ریڕه‌و راسكانى له‌ژیان و خه‌بات وه‌تایبه‌ت هه‌ڵویست رووشنیان ئه‌را ئاینده‌ى هه‌رێم و ڕوڵه‌یل هاوخوینیان. ئنجا هه‌ر وه‌و خاتریشه‌ یه‌كه‌مین ژنه‌ كورد فه‌یلى ك دریا له‌سێداره‌ له‌عراق له‌وه‌ر هووكار سیاسى، ئه‌ویش خه‌باتكه‌ر له‌یلا قاسم بوى ك رژیم وه‌رین له‌ساڵ 1974 سزاى له‌سێداره‌داین له‌بانى چه‌سپان له‌وه‌ر ئه‌وه‌ك به‌شدارو په‌یوه‌ندیكه‌ر بوى وه‌ ڕزه‌یل جموجویل ئازادیخواز كورد، ك نموونه‌یگ بوى ئه‌را ژنه‌ فه‌یلى وه‌تایبه‌ت و ژنه‌یل عراقى وه‌گشتى.

بیجگه‌ ئه‌وه‌یش یه‌كه‌مین ژنه‌ دادوه‌ر له‌عراق و له‌وڵاته‌یل عه‌ره‌بى، ژنه‌ كورد فه‌یلى زه‌كیه‌ ئسماعیل حه‌قى بوى ك به‌شدار بوى له‌دامه‌زرانن یه‌كێتى ژنه‌یل كوردستان1952- 1975 و خوه‌ى سه‌رۆك ئى ده‌زگا بوى. بیجگه‌ ئه‌یانه‌یش ناوه‌یل تر فره‌یگ هه‌س ك جریوه‌دار بوین له‌ئاسمان داناین و ئه‌قڵ له‌ژنه‌یل كورد فه‌یلى خاوه‌ن كار و كاركه‌ر له‌مه‌یدانه‌یل جوراوجوور زانستى له‌هه‌رێم و عراق و له‌وڵاته‌یل غوربه‌ت ك ریكخریاگه‌یل ژن كورد فه‌یلى فره‌یگ دامه‌زراننه‌و گرنگى ده‌نه‌ كیشه‌یل ژن. هه‌ر له‌وه‌ر ئویشیم ژن فه‌یلى سویه‌ى له‌كاركه‌فتگ نیه‌، چوینكه‌ شان وه‌شان برایه‌یلى به‌شدار بویه‌ له‌گشت مه‌یدانه‌یل خه‌بات له‌ژیر ناونیشان(ئازادى ئه‌را عراق و فیدراڵى ئه‌را كوردستان)، وه‌ل ئه‌وه‌یشا نموونه‌یگ بویه‌ له‌خه‌بات و قوربانیداین و له‌هه‌مان وه‌خت دویاى مه‌ینه‌تى و ئاواره‌ى تویه‌نستن جویر شایه‌تیده‌ر له‌تاوان سه‌رده‌م له‌وه‌رده‌م دادگاى باڵاى تاوانه‌یل قسه‌ى خوه‌یان بكه‌ن دژ ئه‌و تاوانباره‌یله‌ ك زه‌ره‌د ره‌ساننه‌ روڵه‌یلیان وه‌ك شایه‌تیده‌ر"ئامینه‌" دایگ حه‌یده‌ر ، ویداد عه‌لى، له‌یلا عه‌بدلڕه‌حمن، ئه‌حلام سه‌یفوڵڵا كه‌ره‌م، ك تویه‌نست وه‌و شایه‌تیداینه‌ جه‌نگه‌ قسه‌ بخاده‌ ناونى وه‌تبان ئبراهیم براى داڵگى سه‌دام و تارق عه‌زیز، ك ئه‌وه‌ بوى وه‌تبان له‌عنه‌ت تارق عه‌زیز كردو تیر خراو یه‌كترى كردن. یه‌كیگ تر له‌و ژنه‌یل فه‌یلیه‌ فریال حسێن ئاغا بوى ك جویر پیاویگ پڕ له‌ئازایه‌تى خوه‌ى نیشانداو تویه‌نست ئه‌و هه‌مگه‌ به‌دبه‌ختیه‌ بخاده‌ كنار و بووده‌ ئه‌ندامیگ نه‌فدار له‌كوومه‌ڵگاو نه‌خش خوه‌ى نیشان بیه‌ێد له‌وه‌ر خاتر چاره‌نویس كوردستان و ئاینده‌ى رووشنیگ.

محه‌مه‌د عه‌لى