هه‌ڵویستیگ مسریانه‌ چاره‌سه‌ر مه‌ویسى عراقه‌

شفق نيوز

هه‌میشه‌ له‌ى عراقه‌ ده‌سڵات ته‌كڕه‌وى و تونڕه‌وى زاڵ بویه‌سه‌ ئازادى و دیموكراسى، ساڵه‌یل و ڕووژگار بى شماریگ رژیم دیكتاتۆریه‌ت ته‌پڵ ماڵویرانى و كاولكارى كوتا، ئیسه‌یش دویاى ده‌ ساڵ له‌ كووتاییهاتن وه‌و رژیم كاولكاره‌، هیمان ساز شادى و سه‌رفرازى نه‌ژه‌نیاگه‌و هویچ سه‌قامیگ جیگیر نه‌كریاگه‌و رووژانه‌یش ده‌یه‌ها كه‌س بوونه‌ قوربانى ته‌قینه‌وه‌و كوشتن و بڕین جوراوجوور.

له‌یرا ملله‌ت عراق وه‌ گشت پیكهاته‌یلیه‌و ئه‌گه‌ر بخوازێد ئاسووده‌و سه‌رفراز بوود بایه‌سه‌ له‌بانى جوور مه‌ردم مسر ك چوین وه‌ یه‌كهه‌ڵویست ده‌نگ تونڕه‌وى كپه‌و كرد ئه‌یانیش وه‌ هه‌مان شیوه‌ ‌ده‌نگ زوڵم و ته‌كڕه‌وى و گه‌ناته‌كارى له‌ناو بووه‌ن تا بتویه‌نن له‌ساى خوه‌شى و ئاسووده‌یى بژیه‌ن، چوینكه‌ هه‌ڵویستیگ مسریانه‌ چاره‌سه‌ر مه‌ویسى مه‌ردم عراقه‌.

ئمجا وه‌و خاتریشه‌ بایه‌سه‌ هه‌ر له‌ئیسه‌و ده‌نگ ناڕه‌زایه‌تى به‌رزه‌و بوود و گشت هه‌وڵ و ته‌قلایگ باریه‌یده‌ كار ئه‌را ره‌سین وه‌و ئاسووده‌یى و سه‌رفرازیه‌ ك ساڵه‌یل دویر و دریژیگه‌ بیوچان خه‌بات ئه‌راى ئه‌كریه‌ید وه‌رجه‌ ئه‌وه‌ك كار له‌كار بترازیه‌ید و ئاقبه‌ت وڵات وه‌ره‌و خراوتر بچوودو جڵه‌و ده‌سڵاتى وه‌ى جووره‌ بمینید یا بكه‌فیده‌ ده‌س مه‌ردمانیگ تونڕه‌وتر و له‌ژیر په‌رده‌ى ئایین و شه‌ریعه‌تیش گشت ئازادییگ له‌ ملله‌ت چه‌وسیاگ زه‌فت بكه‌ن.

دانیال حه‌سه‌ن

ج . أ