فاتمه‌ خان، ژنه‌ دیواخاندار كورد

شفق نيوز

هووزه‌یل كورده‌ورایمان ژن سه‌ڕشته‌دار و هه‌ڵكه‌فتگ و ئازا و چه‌و نه‌ترس داشتنه‌. ئمجا ئاشكراس ك ملله‌ت كورد وه‌رگه‌ى به‌دبه‌ختى و مه‌ینه‌تیه‌یل فره‌یگ گرتگه‌، وه‌ دریژایى ژیان له‌وه‌ر خاتر هه‌قه‌یل ره‌واى خوه‌ى خه‌بات بى وچان كردگه‌ تا بڕه‌سێده‌ ئامانج و ئاره‌زووه‌یلى.

له‌ى باوه‌ته‌ باس له‌ نموونه‌ى  ژن رووژگاریگ كه‌یم ك وه‌ل رووژگار ئمڕوومان نزیكه‌ى یه‌ك سه‌ده‌ بایه‌سه‌ بچیمنه‌ دویاوه‌ تا بتویه‌نیم بچیمنه‌ خزمه‌ت یه‌كیگ تر له‌ژنه‌یل خه‌باتكار كورد ك ده‌ور باڵایگ داشتگه‌ له‌ڕوى كه‌سایه‌تى و خزمه‌تكردن وه‌ ئاده‌میزاد كورد و ئنسانیه‌ت، هه‌رچه‌ن ئه‌و زانیارى ته‌واوه‌ له‌وه‌رده‌سمان نیه‌ ئه‌را ئه‌وه‌ك فره‌تر ئاشنا بویمن له‌باوه‌ت جموجویل و چالاكیه‌یلى، وه‌لى وه‌ل ئه‌وه‌یشا تویه‌نیم تاڕاده‌یگ هه‌ق خوه‌ى وه‌پى بیه‌یم وه‌ یادكردن و ناوبردنى له‌ڕوى وژدانه‌و.

فاتمه‌ خان یه‌كیگ بویه‌ له‌و ژنه‌یل كورد خوه‌شڕه‌فتار و خاوه‌ن كه‌سایه‌تى به‌رزه‌، ك له‌ده‌وروه‌ر ساڵ 1894 زایینى له‌ئاوایى(قه‌ره‌چێوار) سه‌ر وه‌ پاریزگاى كه‌ركووك كوردستانى هاتیه‌سه‌ دونیا.

ئى ژن ناوداره‌ دویه‌ت شێخ(حه‌سه‌ن قه‌ره‌چێوار)ه‌و هه‌ر له‌ عومر مناڵیه‌و له‌ناو خێزانیگ دینپه‌روه‌ر و له‌ناو بنه‌ماڵه‌یگ پاك و بیگه‌رد په‌روه‌رده‌ كریاگه‌. فاتمه‌ خان ك ناسریاگه‌ وه‌(فاتمه‌ خان قه‌ره‌چێوارى)خوه‌ى و باوگى وه‌ خاوه‌ن دیواخان و خاوه‌ن ته‌كیه‌ ناسریانه‌ له‌ناو مه‌ردم ناوچه‌گه‌. ئمجا له‌یوا باس كه‌ن و ئویشن: وه‌ دریژایى عومرى هه‌ر خه‌ریك ئامووژگارى یا نه‌سیحه‌ت و كرده‌وه‌ى خاس بویه‌و هه‌میشه‌ رینیشانده‌ر و خه‌یرخواز بویه‌ ئه‌را گشت كه‌سیگ . وه‌ل ئه‌وه‌یشا له‌ناو به‌گ و به‌گزایه‌و میره‌یل كورد قورس و قه‌دردار بویه‌و ریز و حورمه‌ت فره‌یگ داشتگه‌، هه‌ر له‌وه‌ر ئه‌وه‌یش مه‌ردم شایه‌تى ئه‌وه‌ ئه‌ڕاى دانه‌ ك هه‌میشه‌ له‌گشت وه‌ختیگ دیواخانه‌گه‌ى پڕ بویه‌ له‌ میوان و مه‌ردمان هاتوچووكه‌ر و پیاو خاسه‌یل ئه‌و رووژگاره‌. فاتمه‌ خان قه‌ره‌چێوارى ژن شێخ عه‌بدولكه‌ریم شێخ حسێن بویه‌و دو دویه‌ت له‌لى داشتگه‌ وه‌ ناو(ره‌حمه‌ خان)و(سه‌لمه‌خان). ك ئیسه‌ ته‌نیا سه‌لمه‌خان دویه‌تى له‌ ژیان مه‌ندگه‌و ژن برارزاى شێخ مه‌حموود حه‌فیده‌.

وه‌لى جویر ئه‌وه‌ك ئاشكراس له‌لاى گشتمان، ئیمه‌ى ئاده‌میزاد له‌ى دونیا میوانیم و هه‌ر یه‌كیگ له‌لیمان سه‌فه‌ریگ ئه‌به‌دى ها له‌وه‌رده‌ممان و ئنكار له‌لى نیه‌كریه‌ێد، هه‌ر وه‌و خاتریشه‌ فاتمه‌خان قه‌ره‌چێوارى له‌ساڵ 1959 ماڵئاوایى یه‌كجاره‌كى له‌ى دونیا كردگه‌و له‌شان قه‌وره‌گه‌ى باوگى(شێخ حه‌سه‌ن قه‌ره‌چێوار) له‌ناحیه‌ى(قادر كه‌ره‌م) وه‌خاك سپاریاگه‌.

 

 

سه‌رچه‌وه‌: عه‌بدلجه‌بار محه‌مه‌د جه‌بارى/ ژنه‌یل ناودار كورد