بارودوخ كوردستان له‌پرووسه‌ی سياسی عراق

شفق نيوز

شۆڤێنی و به‌عسيه‌يله‌سه‌ وه‌ل ئه‌وانه‌ك له‌ژير كاريگه‌ری ئه‌وان سياسه‌ت كه‌ن ، ك هه‌ر له‌سه‌ره‌تا ته‌ڵه‌ ئه‌را نويسانن ده‌ستوور دانان و دوياخريش ئه‌را جی وه‌جيكردن ده‌ستوور ، وه‌ی جووره‌ ده‌ستووره‌گه‌ جوير خوه‌ی مه‌ندو دی وه‌ته‌واوی جی وه‌جی نه‌كريا ، ئی ئيراده‌ له‌ڕميان رژيمه‌وه‌ زاڵه‌و هه‌ر وه‌رده‌وامه‌و تا ئيسه‌يش گرفت خه‌يگه‌ پرووسه‌ی سياسی عراقه‌وه‌ ك له‌هه‌ڵوژاردنه‌يل ٧ ئادار له‌يوا مه‌زه‌نه‌ كريه‌يگ هاوكيشه‌ی سياسی عراق گويڕانكاری گه‌ورايگ بايگه‌ بانی .

ئه‌وه‌ك ئاشكراس ئه‌را كورد جه‌نگ ده‌ستووری فره‌ سه‌ختيگ ها ڕييه‌وه‌ ، وه‌ بوونه‌ی ئه‌و مادده‌يل ده‌ستووريه‌ ك په‌يوه‌سن وه‌هه‌ق ملله‌ت كوردستانه‌وه‌ ، له‌وانه‌يش مادده‌ی (١٤٠) ، ئمجا ئه‌و جه‌نگ ده‌ستووريه‌ اه‌ناونی كورد و ئيراده‌ی ئه‌و گورگه‌يله‌سه‌ ك هه‌فت ساڵه‌ نه‌يشتنه‌ پرووسه‌ی ديموكراسی له‌عراق گام خاسيگ بنه‌يگ ، ئمجا ئايا ئی جاره‌ هه‌مان ئه‌و گورگه‌يله‌ له‌جی وه‌جيكردن ده‌ستوور بايه‌سه‌ وه‌ چ شيوه‌يگ ته‌ڵه‌ی خوه‌يان بنه‌نه‌وه‌و چ كيشه‌وگرفتيگ ئه‌را ئی پرووسه‌ دروس بكه‌ن و چه‌نيگ تر دريژه‌ بكيشيگ و چه‌نيگ وه‌ زه‌ره‌د كورد ته‌واو بووگ ؟ وه‌ل بايه‌سه‌ كورد وه‌ هه‌ر نرخيگ بووگ وه‌رجه‌ ده‌رچگن هيزه‌يل ئه‌مريكا له‌عراق گشت ئه‌و كيشه‌يله‌ وه‌ل حكوومه‌ت به‌غدايا يه‌كلاوه‌ بكاو ده‌رفه‌ت ئه‌وه‌ نه‌يه‌يگ دی عه‌ره‌به‌يل وه‌خت له‌ده‌سمان بيه‌ن ، چوينكه‌ كورد له‌زويه‌وه‌ وڵات عراق ناسيه‌و زانستگه‌ چ تاريخ تيه‌ڵ هاوبه‌شيگ وه‌ليا داشتگه‌ ، له‌وه‌ر ئه‌وه‌ بايه‌سه‌ كورد ئه‌را ئاينده‌ كه‌ڵك فره‌يگ له‌ئه‌زموون ئه‌و هه‌فت ساڵه‌ی گوزه‌يشته‌ وه‌ربگريگ و له‌هه‌مان وه‌خت وه‌ سياسه‌تيگ سه‌ركه‌فتگتر له‌ئه‌وسا روی وه‌ڕوی گرفته‌يل ئاينده‌ بووگه‌وه‌ ، چوينكه‌ له‌ئاينده‌ كيشه‌و گرفت سه‌ختتر تيه‌يگه‌ نوای خواسته‌يل سياسی كوردستان .

بيگومان ئه‌وه‌ك كورد له‌وڵات عراق له‌پيكهاته‌يل تر جياوه‌ ئه‌كا ، ئه‌ويش كيشه‌ی نه‌ته‌وه‌ييه‌ ، كيشه‌ی دياريكردن مه‌رز هه‌ريم و هاوردنه‌وه‌ی ناوچه‌يل داوڕياگه‌ ئه‌را بان خاك هه‌ريم كوردستان ، وه‌لی عه‌ره‌به‌يل وه‌ شيعه‌و سونيه‌وه‌ كيشه‌ی نه‌ته‌وه‌يی نه‌يرن و به‌رژه‌وه‌نديه‌يليان وه‌ به‌راورد يامقارنه‌ وه‌ل كوردا فره‌ جياوازه‌ ، ئه‌وان وه‌گشت شيوه‌يگ له‌لايه‌ن قه‌يريگ وڵاته‌يل عه‌ره‌بی و هاوسايه‌يله‌وه‌ هه‌ر وه‌ئاشكرا پشتگيری كريه‌ن و ئه‌و وڵاته‌يليشه‌ كاريگه‌ری گه‌ورايگ ديرن له‌بان سياسه‌ت ئه‌مريكا وه‌رانوه‌ر وه‌كورد ، ئمجا پرسيار له‌يرا ئه‌وه‌سه‌ : ئه‌وان له‌ چه‌ بترسيه‌ن ؟ ئه‌وان له‌عراق زوورمينه‌ن و ئه‌وه‌ك ديرنه‌ی هن خوه‌يانه‌و ئه‌وه‌ك له‌ئاينده‌ كه‌فيگه‌ ده‌سيان خودا به‌ره‌كه‌ت . راسه‌ عه‌ره‌به‌يل شيعه‌و سونی به‌رژه‌وه‌نديه‌يليان له‌لايه‌ن مه‌زهه‌بيه‌وه‌ جياوازه‌و ناكووكی و كيشمه‌كيش ناوخوه‌يی ديرن ، وه‌لی ئه‌را ده‌سوه‌شانن له‌ گه‌ورايی هه‌ريم كوردستان و كه‌مه‌وكردن ده‌سڵات كورد و كزه‌وكردن پايه‌ی كورد له‌ به‌غدا يه‌ك ئامانج گرديانه‌و ئه‌كا ، ئه‌را نموونه‌يش رويداگه‌يل سياسی هه‌فت ساڵه‌ی گوزه‌يشت و جی وه‌جی نه‌كردن ده‌ستوور شايه‌تيده‌ر ئه‌و راسيه‌نه‌ . له‌وه‌ر ئه‌وه‌ بايه‌سه‌ كوردستان ئه‌را روی وه‌ ڕوی بوينه‌وه‌ ی ئه‌و ته‌حه‌ديه‌يله‌ ك ها له‌نوای ، نيه‌وگ رازی بووگ وه‌كه‌متر له‌ی پايه‌ ك ئيسه‌ ديريگه‌ی ، چوينكه‌ ئه‌گه‌ر هات و پايه‌ی كه‌متر بوی ، ئه‌وه‌ نيه‌تويه‌نيگ قانوونه‌يل دژ وه‌خوه‌ی ڤيتۆ بكاو دی ئه‌هميه‌ت خاسيگی نيه‌مينيگ له‌حكوومه‌ت عراق ك بتويه‌نيگ فشار دروس بكا ئه‌را چاره‌سه‌ركردن هه‌ر كيشه‌يگ و بايه‌سه‌ له‌ئه‌وسا زياتر هساو ئه‌را رويداگه‌يل بكريه‌يگ .