ميرنشينى پشتكوو فه‌يلى "له‌نوو له‌ژير رووشنايی"

شفق نيوز

ئه‌و پرووژه‌و ئه‌و داوه‌ته‌ تازه‌ نين، يه‌كه‌ميان وه‌رجه‌ دوساڵ باس كريا له‌وه‌ختيگ ك داواى دامه‌زرانن پاريزگايگ تازه‌ كريا له‌باره‌ى ماف بريار چاره‌نويس، يه‌يش له‌وه‌ختيگ ك مه‌ردمانيگ ئه‌و پرووژه‌ ئه‌را دامه‌زرانن هه‌رێميگ هاوشيوه‌ى هه‌رێم كوردى تاريف كردن. وه‌لێ ئه‌و داوه‌ته‌گه‌ى تر ك باس كريا يه‌يش تازه‌ نيه‌و داوه‌ته‌يليگ تر هاوشيوه‌ى وجوود داشتگه‌ زويتر، وه‌لێ جياوازى ناونى پرووژه‌ى يه‌كه‌م و داوه‌ت دويه‌م ئه‌وه‌سه‌ ك پرووژه‌گه‌ ئى جاره‌ له‌لايه‌ن ئه‌ندامه‌يليگ له‌ كۆنگرس ئه‌مريكى ده‌رچى و له‌وانه‌يش كۆماريه‌يل و ديموكراسيخوازه‌يليش مه‌يل داناين پرووژه‌ بڕياريگ ديرن ئه‌را دامه‌زرانن ناوچه‌يگ سه‌قامگير ئه‌را كه‌مينه‌يل ئايينى له‌ هامارى نه‌ينه‌وا، يه‌يش له‌وه‌ختيگ داوه‌ته‌گه‌ له‌بان زووان كه‌سه‌يليگ بوى مكوڕن له‌بان ئاينده‌ى رووڵه‌يل نه‌ته‌وه‌گه‌يان.

وه‌ل ئه‌وه‌يشا بايه‌سه‌ يه‌يش بارمنه‌ ياد ك ريكخرياگ وه‌رگرى له‌ مه‌سيحيه‌يل داواى دامه‌زرانن هه‌رێم هامارى نه‌ينه‌وا كرد له‌ وه‌خت كۆنگره‌ى سێيه‌م، يه‌يش له‌شوون ئاماژه‌كردن ئه‌را له‌ناوبردن وه‌جه‌م و خواست مقه‌يتيكردن له‌بان ئاينده‌ى مه‌سيحى له‌ ناوچه‌ى خوه‌رهه‌ڵات ناوين. ئى پيشنياريشه‌ له‌ئاكام كاردانه‌وه‌يگ له‌بان كرده‌وه‌يل داعش ده‌ركه‌فت ده‌رهه‌ق وه‌ مه‌سيحيه‌يل و ئێزيديه‌يل و پيكهاته‌يل تر له‌ كه‌مينه‌يل. بيجگه‌ ئه‌وه‌يش ريكخرياگ ناوبرياگ ئاشكراى يه‌يش كرد ك وه‌هاوكارى وه‌ل ئه‌ندامه‌يل كۆنگرس ئه‌مريكى و كومه‌ڵگه‌ى ناوده‌وڵه‌تى هه‌وڵ كاركردن ئه‌ياد وه‌ل حكومه‌ت هه‌رێم كوردستان و حكومه‌ت ناوه‌ندى له‌ به‌غدا ئه‌را دروسكردن ئه‌و ناوچه‌ى ئه‌مانه‌ له‌ باكوور موسڵ.

يه‌يش له‌وه‌ختيگه‌ ئه‌و داوه‌ت پيشنياركرياگه‌ له‌ لايه‌ن فه‌يلى ئى سه‌نه‌د ناوده‌وڵه‌تيه‌ نه‌يرێد، مه‌گه‌ر له‌ حاڵه‌تيگ ئه‌و دووس و برايه‌يله‌ له‌ هه‌ردوگ ره‌گه‌ز ئى مه‌سه‌له‌ بجمنن له‌ڕى ده‌سپيشخه‌رييان له‌ناو په‌رله‌مان ئۆرپى له‌ هه‌وڵێگ ئه‌را ده‌رخستن دوسيه‌ى مه‌ينه‌تيه‌يل فه‌يلى له‌وه‌رده‌م راى گشتى ناوده‌وڵه‌تى.

له‌يرا چشتيگ تر نه‌مه‌ند بيجگه‌ ئه‌وه‌گ ئاماژه‌ ئه‌را مه‌سه‌له‌يگ تر كريا له‌ناونی ئه‌و تعلان و ئه‌و داوه‌ته‌، ك ئه‌ويش ئه‌وه‌ بوی قه‌واره‌ی كورد فه‌يلی وجوود داشت تا ده‌يه‌ی يه‌كه‌م و شايه‌ت ده‌يه‌ی دويه‌ميش له‌ سه‌ده‌ی بيس، له‌يرايش مه‌رام له‌"ولايه‌ت پشتكوو" يا ميرنشينى پشتكوو بوی، ك ئه‌رك ريكخرياگه‌يل فه‌يلی له‌وانه‌گ وجوود ديرن له‌ مه‌يدان عراقی و له‌ ده‌يشتی ئه‌زموون ئه‌و ولايه‌ته‌ بخوه‌ننه‌و له‌ڕوی خاسی و خراوی و دوياخر فشار بارنه‌ بان ئه‌و لايه‌نه‌يله‌ ك ئه‌و ريكخرياگه‌يل سه‌ر وه‌پيانن له‌وه‌ر خاتر زينگه‌وكردن ئه‌و پرووژه‌و هه‌وڵ له‌لای لايه‌نه‌يل ناوده‌وڵه‌تی بيه‌ن تا بگرێده‌ خوه‌ی، ئمجا وه‌بی ئيراده‌ی زاتی و قوربانيداين و په‌نابردن وه‌ دووسه‌يل و داواكاره‌يل ماف ئاده‌ميزاد ئه‌و دوسيه‌ی فه‌يليه‌ هه‌ر له‌شون خوه‌ی وه‌بی ته‌كه‌جم مينێد.

ريككه‌فتن سايكس – بيكۆ ك نه‌خشه‌ی مه‌رزه‌يل ناوچگه‌ نا له‌ سه‌ده‌ی بيس و ئيسه‌يش ك باس له‌ له‌ناوبردنی ئه‌كريه‌ێد، يه‌كيگ له‌ ئاكامه‌يلی ويرانكردن ميرنشينی پشتكوو بوی چ راسه‌وخۆ يا ناڕاسه‌وخۆ، هه‌ر وه‌و خاتريشه‌ ئيسه‌ قسه‌كردن له‌بان ره‌سم خه‌ريته‌ی تازه‌ ئه‌را ناوچه‌گه‌ هه‌ر بايه‌سه‌ ئه‌و ميرنشينی خاسمانه‌ بگرێده‌و.

عه‌لی شێخ مسته‌فا