یه‌كده‌نگى كورده‌یل فه‌یلى نه‌خشه‌ڕى تازه‌یگه‌ ئه‌را به‌غدا

شفق نيوز

ك زیاتر له‌ نیم ملیۆن هاووڵاتى كورد وجوود دیرن و نینه‌ چوارچیوه‌ى خه‌ریته‌ى كوردستانى، ئمجا ئاساییه‌ ك په‌ره‌سه‌ندن و گه‌شه‌كردن تاریخ سیاسى شوون جوگرافى ك ئیسه‌ ناسیمنه‌ى له‌عراق هه‌ر له‌باكوورى تا باشوورى و خوه‌رهه‌ڵات و خوه‌رئاواى چووگه‌وه‌ ئه‌را سایه‌ى به‌غدا ك مه‌ڵوه‌ن زانست و ماریفه‌ت جووراو جوور بوى. هه‌ر له‌وه‌ر ئه‌وه‌یش ئه‌و ماریفه‌ت و رووشنهویریه‌ په‌ل كوتاو دریژه‌و بوى ئه‌را زوورم ده‌وڵته‌یل ناوچه‌گه‌. وه‌لى نوڕستن ئه‌را به‌غدا وه‌ دید ئیسه‌وه‌ له‌ى وه‌خته‌یله‌ ژان و نه‌خوه‌شییگه‌و بویه‌سه‌ تویش مه‌ردمان فره‌یگه‌وه‌ ك هه‌رچه‌نى حاشا له‌وه‌ نیه‌كریه‌یگ ك وه‌زعه‌گه‌ وه‌ ته‌واوى له‌ به‌غدا شیویاگه‌ له‌ گشت مه‌یدانه‌یله‌وه‌. ئمجا له‌شوون ئه‌وه‌ك گشت رووژه‌یل ساڵ رووژ كاركردن و ئبداع بوى، ئیسه‌ ئى رووژه‌یله‌ بویه‌سه‌ مایه‌ى شه‌رمه‌زارى له‌ڕوى گشت پیشكه‌فتن و بنیاتناین و داواكارى زانست.

مه‌به‌س له‌ى باسه‌ له‌بان به‌غدا، ئه‌وه‌سه‌ ك وجوود چین كورده‌یل فه‌یلى و كاریگه‌رى گه‌وراى له‌ وه‌رگرتن به‌ش گه‌ورا له‌رووشنهویرى به‌غدا هووكاریگ راسه‌وخۆ یا موباشر بوى له‌ پشتگیرى پرووسه‌ى سیاسى كوردستانى، ئه‌یه‌ بیجگه‌ سه‌بر و قوربانیه‌یلیان له‌ به‌غدا، ك ئه‌گه‌ر ئه‌وان نه‌ویاتان ئه‌وه‌ بیگومان پرووسه‌ى سیاسى كوردستانى كه‌م و كوڕى فره‌یگ وه‌خوه‌یه‌وه‌ دى. هه‌ر له‌وه‌ر ئه‌وه‌یش سه‌دام دكتاتۆر هه‌ڵه‌په‌ڵه‌ كرد له‌ ئه‌نجامداین ده‌سوه‌شانن و كاره‌ساته‌یلى دژ كورده‌یل فه‌یلى و كووچ وه‌پیكردنیان وه‌رجه‌ ئه‌نفالكردن ناوچه‌ى گه‌رمه‌سیر هه‌رێم كوردستان و جووره‌ كاره‌ساته‌یلیگ  دژ ئى چین زوڵملیكریاگه‌ ئه‌نجامدا وه‌سه‌ر هویچ ملله‌تیگ تر ناتگه‌ وه‌ك كاره‌ساته‌گه‌ى موسته‌نسریه‌و ڕویداگه‌یل تر ك سه‌ره‌تاى جى وه‌جیكردن پاكسازى ئى پیكهاته‌ى ستراتیجیه‌ بوى له‌ عراق.

ئابوورى عراق هه‌ر له‌سه‌رده‌م پاشایه‌تیه‌وه‌ له‌ به‌غدا ریكخریاو به‌غدا بویه‌ مه‌ڵوه‌ن بازرگانى گه‌ورا وه‌ نسبه‌ى عراق و زوورم ده‌وڵه‌ته‌یل ناوچه‌گه‌و فره‌یگ له‌لیمان ئه‌و وه‌زعه‌ له‌ ساڵه‌یل په‌نجاى سه‌ده‌ى گوزه‌یشت دیه‌ وه‌چه‌و خوه‌ى. له‌یرا بایه‌سه‌ ئشاره‌ت وه‌ ئه‌وه‌ بكه‌یم ك یه‌هوودیه‌یل سه‌ركرده‌ى ئه‌و بازرگانیه‌ بوین له‌ زوورم ناوچه‌یل عراق وه‌ تایبه‌ت له‌ به‌غدا، وه‌لى زوورممانیش زانیم ك یه‌هودیه‌یل دویاى ساڵه‌یل 1948 و 1951 چه‌ وه‌سه‌ریان هات، ئمجا ئه‌و چالاكیه‌یل بازرگانیه‌ له‌ به‌غدا و له‌عراق وه‌ ته‌واوى جیواز بویه‌ لاى باقى چینه‌یل تر له‌ ملله‌ت، هه‌ر له‌وه‌ر ئه‌وه‌یش له‌ به‌غدا له‌ نیمه‌ى ساڵه‌یل په‌نجاوه‌ بڕیگ  له‌ بازرگانه‌یل كورد فه‌یلى خوه‌یان نیشاندان تا شوون بازرگانه‌یل یه‌هوودى بگرنه‌وه‌و ئه‌وه‌ بوى مه‌سه‌له‌ى بازرگانى دوباره‌ په‌ره‌ سه‌ند وه‌ شیوه‌ى وه‌رفراوانیگ له‌ بازاڕه‌یل به‌غداو كورده‌یل فه‌یلى زاڵ بوینه‌ بانى.

بیگومان هووكار سه‌ركه‌فتن یه‌هوود و مه‌ردمان تر له‌ڕوى بازرگانیه‌وه‌ چووگه‌وه‌ ئه‌را دڵسووزى و ڕاسگوویى و نه‌فوه‌رگرتن له‌ ده‌رفه‌ت و شیوه‌ى مامڵه‌كردن و چوینیه‌تى هونه‌ر كاركردن. وه‌ختیگیش بازرگانه‌یل فه‌یلى هاتنه‌ ناو مه‌یدانه‌گه‌وه‌، هه‌ر وه‌هه‌مان شیواز و له‌هه‌مان وه‌خت موسڵمانیش بوین، دى بازاڕه‌یل شۆرجه‌و ژیرته‌كیه‌و ده‌هانه‌و عه‌گد نه‌ساراو عه‌به‌خانه‌و سنه‌ك و جه‌میله‌و شێخ عومه‌ر و بازاڕه‌یل تر كه‌فته‌ ژیر ده‌س خوه‌یان، گرینگ یا موهم ئه‌وه‌سه‌ ده‌نگ كورد له‌به‌غدا وجوود داشتووگ و نوێنه‌ر ملله‌ت كورد بووگ وه‌تایبه‌ت له‌ده‌یشت هه‌رێم.