كورده‌یل فه‌یلى چ ئومیدێگ له‌ نوێنه‌ره‌یلیان دیرن؟

شفق نيوز

 

ئیسه‌یش كورده‌یل فه‌یلى چه‌ویان ها ئه‌وانه‌ك له‌ هه‌ڵوژاردنه‌یل ئه‌نجوومه‌ن پاریزگایه‌یل سه‌ركه‌فتنه‌و نوێنه‌رایه‌تییان كه‌ن به‌شكه‌م بتویه‌نن چاره‌سه‌ریگ ئه‌را كیشه‌یلیان بكه‌ن و كار له‌بان جیوه‌جیكردن هه‌قه‌یلیان بكریه‌ید و كه‌میگ له‌و مه‌ینه‌تیه‌یله‌ ك هاته‌سه‌ تویشان كه‌مه‌و بوودو بوونه‌ پشتگیر و قسه‌ى زووانیان و هه‌وڵدانیگ ئه‌را جیوه‌جیكردن ئاره‌زووه‌یل و ئامانجه‌یلیان و له‌هه‌مان وه‌خت دڵسووز و راسگوو بوون له‌ كاره‌یلیان وه‌خاتر هاوردنه‌وه‌ى هه‌قه‌یل ماددى و مه‌عنه‌وى و هاوردنه‌وه‌ى موڵكه‌یل و دوكانه‌یل بازرگانى و قه‌ره‌بووكردن، وه‌تایبه‌ت قه‌ره‌بووكردن خیزان شه‌هیده‌یل.

وه‌ل ئه‌وه‌یشا كورده‌یل فه‌یلى ك له‌وه‌خت رژیم وه‌رین بى ناسنامه‌ كریان، ئیسه‌ چه‌وه‌ڕى ئه‌وه‌ كه‌ن هه‌وڵ بدریه‌ید ئه‌را هاوردنه‌وه‌ى ئه‌و ناسنامه‌ تا بووده‌ شایه‌تحاڵیگ ئه‌را هاووڵاتیبوینیان.

یه‌یش بیجگه‌ دابینكردن ده‌رفه‌ت كار ئه‌را جایه‌ڵ بیكار ك زه‌حمه‌ته‌ وه‌ ئاسانى ده‌رفه‌ت كار په‌یا بكه‌ن له‌ ژیان له‌ڕى كاراكردن ره‌وڕه‌وه‌ى بنیاتناین و جیوه‌جیكردن پرووژه‌و هانداین وه‌به‌رهاوردن و چالاكه‌وكردن كه‌رت تایبه‌ت و دوباره‌ وه‌كارخستن كارخانه‌یل وه‌به‌رهاوه‌ر نیشتمانى و ده‌زگایه‌یل پیشه‌سازى جوور كارحانه‌یل ده‌واو ده‌رمان و سه‌ماد و پیشه‌سازى سابوون و ڕوین و ...هتد، ك یه‌یش بیگومان زه‌منكه‌ر وه‌كارخستن ئه‌و جایه‌ڵ جوانه‌یل بیكاره‌سه‌و له‌وانه‌یش خاوه‌ن باوه‌ڕنامه‌یل.

گشت ئى كاره‌یله‌ له‌به‌رژه‌وه‌ندى و خزمه‌ت كوومه‌ڵگاى عراقیه‌و له‌وانه‌یش كورده‌یل فه‌یلى و خاسه‌وكردن نه‌خشه‌یلیانه‌ له‌ بنیاتناین ژیارى و ئنسانى له‌ كوومه‌ڵگا وه‌تایبه‌ت ئه‌و جایه‌ڵه‌یله‌ ك ستوین وڵاته‌گه‌ن له‌ ئاینده‌. ئنجا جایه‌ڵه‌یل كورد فه‌یلییش ك ناڵنن وه‌ده‌س دویره‌وخستن و چوچیان له‌ساى ئى بار ئیسه‌، هه‌ر له‌وه‌ر ئه‌وه‌یش ئه‌وان هه‌وه‌جه‌ وه‌ چه‌ودیرى و مقه‌یه‌تى دیرن وه‌تایبه‌ت مه‌سه‌له‌ى وه‌رگرتنیانیش له‌ كولیژه‌یل سه‌ربازى و سوپاو پۆلیس.

ئى مه‌سه‌له‌و داواكاریه‌یله‌ ك مه‌ترسیداره‌و كورده‌یل فه‌یلى ناڵنن وه‌ده‌سیه‌و، هه‌ڕه‌شه‌ له‌ وجوود و ئنتماى رووشنهویرى و ژیارییان ئه‌كاو هیلیده‌یان هس وه‌ ئاسایش و سه‌قامگیرى نه‌كه‌ن.

له‌یرا بایه‌سه‌ ئشاره‌ت وه‌ یه‌یش بكه‌یم ك كورده‌یل فه‌یلى له‌ به‌غداو بڕیگ له‌ پاریزگایه‌یل زوورمیان وه‌ شیوه‌زار كوردى فه‌یلى تواناى گوزارش نه‌یرن و هه‌ر له‌وه‌ر ئه‌وه‌یش بایه‌سه‌ له‌بان نوێنه‌ره‌یل فه‌یلى له‌ ئه‌نجوومه‌ن پاریزگایه‌یل یا ئه‌نجوومه‌ن نوێنه‌ره‌یل كار له‌وه‌ر خاتر گرینگداین وه‌ شیوه‌زار و رووشنهویرى كوردى فه‌یلى بكه‌ن له‌لایه‌ن ره‌سانن و هه‌وڵ وه‌دیكردن ناوه‌ندیگ بكه‌ن له‌ به‌غدا ئه‌را پشتگیرى مه‌ینه‌تیه‌یلیان ك وه‌ له‌ناوبردن وه‌جه‌م" جینوساید" ناسریاو گوزراش له‌ى تاوانه‌یله‌ بكا ك رژیم وه‌رین هاورده‌ى تویشیان.

وه‌ل ئه‌وه‌یشا خواستیگه‌ ك مه‌ینه‌تى ژن فه‌یلى بخه‌یمنه‌ وه‌رده‌م نوێنه‌ره‌یل، مه‌ینه‌تى ئه‌و ژنه‌یل گه‌ورا ك شوون تایبه‌ت دیرن و تویش جووره‌ها به‌دبه‌ختى و مه‌ینه‌تى هاتن و هه‌ر وه‌ سه‌بر و دڵفراوانى خوه‌یان روى وه‌ڕوى ئه‌و باره‌یل سه‌خت و تیه‌ڵه‌ بوینه‌ له‌وه‌خت رژیم وه‌رین، هه‌ر له‌وه‌ر ئه‌وه‌یش شایسته‌ى پشتگیرى و هه‌وڵداینن ئه‌رایان وه‌خاتر وه‌ده‌سهاوردن هه‌قه‌یل سیاسى و كوومه‌ڵایه‌تى و ئابوورى و رووشنهویرى.

ئه‌وه‌یش مه‌ندگه‌ بویشیم ك بایه‌سه‌ كاریش بكریه‌ید له‌وه‌ر نوێنه‌رایه‌تیكردن كورده‌یل فه‌یلى له‌ دام و ده‌زگایه‌یل دوڵه‌ت تا نه‌خش كارایگ داشتوون له‌ بنیاتناین عراق تازه‌، ك یه‌یش خواستیگ ره‌واى بنه‌ڕه‌تیه‌و دى به‌سه‌ دویره‌وخستن كورده‌یل فه‌یلى.

محه‌مه‌د عه‌لى سه‌ماوى

ج . أ