میشیل ئوباما له‌ كوخیگه‌و ئه‌ڕا كوشك چه‌رمگ

شفق نيوز

باوگ وباپیره‌یل میشیل ئوباما ژن باراك ئوباما كۆیله‌ یا عه‌بید بیونه‌ ؛ زانایگ ئه‌مریكی وه‌ناو(میگن سمولینكا ) ك ده‌س كردگه‌سه‌ دپیه‌كه‌وكردنیگ یاته‌حه‌قیقیگ له‌باوه‌ت بنه‌چه‌ی بنه‌ماله‌و باوگ وباپیره‌یل ژنه‌ی سه‌روك كومارئه‌مریكا وه‌ڕوژنامه‌ی نیویورك تایمزووتگه‌ : میلڤینا دایه‌ گه‌ورا یاداپیره‌ی میشیل ئوباما كۆیله‌ یاعه‌بید بیوه‌ . سال ١٨٥٠ پیاویگ چه‌رمگ ئه‌مریكی ئه‌هل ساوس كارولینا ك ناوی ده‌یڤد په‌تیرسه‌ن بیوه‌ دیوه‌ت كۆیله‌ یاعه‌بیدیگ شه‌ش ساڵان وه‌ناو میلڤینا داشتگه‌ ؛ ئی دیوه‌ت شه‌ش ساڵانه‌ له‌ شیون مردن ده‌یڤد جورمیرات ئه‌ڕا دیوه‌ته‌گه‌ی مه‌نگه‌سه‌و نرخ یاقیمه‌ته‌گه‌ی له‌وزه‌مانه‌ ٢٧٥دولار بیوه‌.

یه‌عنی میلڤینا له‌شیون مردن ده‌یڤد بووگه‌ كۆیله‌ یاعه‌بد دیوه‌ته‌گه‌ی ك ناوی كریستیانابیوه‌ وهاوسه‌ره‌گه‌یشی ناوی هنری شیلدس بیوه‌ . میلڤینا له‌ ته‌مه‌ن ١٥سالی له‌لایه‌ن پیاویگ چه‌رمگ ده‌سدریژی كریه‌یگه‌ بانی وزگی بووگ ؛ وه‌گوره‌ی سه‌رچاوه‌گان تائیسه‌ ئه‌ومه‌سه‌له‌ نادیاره‌ ك ئایا هاوسه‌ره‌گه‌ی كریستیانا ده‌س دریژی كردگه‌سه‌ بانی یایه‌كیگ له‌چواركوڕه‌گه‌ی ئی كاره‌ ئه‌نجامدانه‌ .  له‌ وه‌ختیگ ده‌سدریژی كردن پیاوه‌یل چه‌رمگ ئه‌ڕا بان دیوه‌ته‌یل وژنه‌یل سیه‌پوس فه‌ره‌ ئاسایی وعادی بیوه‌ ؛چیون ئه‌وان ئه‌ودیوه‌ت وژنه‌یله‌ وه‌ئایم حه‌ساونه‌كردیان به‌لكم وه‌مولك خوه‌یان زانستنه‌سه‌یان و هه‌ر وه‌ی خاتره‌ وه‌ئاره‌زوی خوه‌یان ئه‌را هه‌ركاریگ وه‌كاریان بردنه‌ . ئمجا ئه‌و دیوه‌ت وژنه‌یله‌ هه‌رچی مناڵ له‌لیان بكه‌فتاگه‌و وه‌هه‌مان شیوه‌ی دالگه‌یلیان كۆیله‌ بیونه‌ وله‌شیون چه‌ن سالیگ له‌ دالگه‌یلیان جیاوه‌ كریانه‌و فروشیانه‌ . سال ١٨٥٩ میلڤینا یه‌كم مناڵی په‌یابیوه‌ وئه‌ومناڵه‌ كوڕبیوه‌ وناوی ناگه‌سه‌ دولپوس ؛ میلڤینا ناوخیزان شیلدس نه‌یگه‌ قه‌ی كوڕه‌گه‌یه‌وه‌ ؛ له‌ ئه‌مریكاوشیونه‌یلتریش باو بیوه‌ هه‌ر وه‌خت كویله‌گان منالیگ ئه‌ڕایان بیوه‌ ناوخیزان خوه‌یان نانه‌سه‌ قه‌ی مناڵه‌گه‌ تا جورمولك خوه‌یان بمینیگه‌یان وئه‌ڕا گشت لایگ ئاشكرابووگ ك كی خاوه‌ن ئی ئایم سیه‌ پوسه‌سه‌ . هه‌رچه‌ن كوڕه‌ی میلڤینا چه‌رمگ پوسیش بیوه‌ وه‌لی هه‌رناوی نانه‌سه‌ ئه‌سمه‌ر. دولپوس له‌سال ١٩٥٠ له‌ ته‌مه‌ن یاعومر٩١سالی كوچ دیوایی كردگه‌ ویه‌كیگ له‌ نه‌وه‌گانی وه‌ناو( پورنیل شیلس ) وینه‌كیش یاره‌سام وله‌ شیكاگونیشته‌جا بیوه‌ ؛ ئه‌وپیاوه‌ باپیرمیشیل ئوباما ژن سه‌روك كومارئه‌مریكابیوه‌ . وه‌گوره‌ی ڕوژنامه‌گه‌ ئه‌و زانیاریه‌یله‌ له‌باوه‌ت خیزان میشیل ئه‌وه‌ نیشان ده‌یگ ك چیون میشیل ئوباما نوینه‌رایه‌تی گشت ئه‌مریكیه‌یل كه‌یگ

 

وچیون ١٠٠ سال له‌یه‌ووه‌ر سیه‌پوسه‌یل وچه‌رمگ پوسه‌یل وه‌ل یه‌كا تیكه‌ڵ بیونه‌ وئی ئه‌مریكای ئمڕوه‌ دامه‌زراننه‌ ؛ به‌ڵی خانم یه‌كم ئه‌مریكا نه‌وه‌ی كۆیله‌یگ سیه‌ پوس ئه‌مریكیه‌ ویه‌یش پیشكه‌فتن ئه‌وكومه‌ڵگا سابت كه‌یگ . ئه‌مڕۆ میشیل ئوباما وه‌یه‌كیگ له‌ ژنه‌یل وه‌هیزجه‌هان ناسریه‌یگ ك نه‌خش گه‌ورایگ دیری له‌ سیاسه‌ت باراك ئوبامای هاوسه‌ری.