په‌یوه‌ندى دویرگه‌یل"ته‌نب گه‌وراو بویچگ و ئه‌بو مووسا"وه‌ ده‌ركردن كورده‌یل فه‌یلى چه‌س؟

شفق نيوز

 

مامۆستا دریه‌ عه‌ونى جواو ئى پرسیاره‌ له‌ تویژینه‌وه‌گه‌ى داگه‌ ك له‌تى باس له‌ په‌یوه‌ندیه‌یل ناونى كورد و عه‌ره‌ب و ئه‌و رویداگه‌یله‌ كردگه‌ ك وه‌پیا گوزه‌ر كردگه‌ بیجگه‌ له‌ بڕیگ سفه‌ته‌یل خاس له‌و په‌یوه‌ندیه‌یله‌ وه‌ دریژایى سه‌ده‌یل.

ئى تویژه‌ره‌ تویژینه‌وه‌گه‌ى وه‌و زانیارى و سه‌رچه‌وه‌یله‌ پڕه‌و كردگه‌ ك هاته‌سه‌ تویش ملله‌ت كورد له‌ عراق جوور مه‌ویسى و مه‌ینه‌تى له‌ ئاكام سیاسه‌ت رژیمه‌یل یه‌ك له‌شوون یه‌ك عراق هه‌ر له‌و وه‌خته‌یله‌و ك بریتانیا له‌ ساڵه‌یل سه‌ره‌تاى بیسه‌یل له‌ سه‌ده‌ى بیس حكوومه‌ت له‌ عراق دامه‌زران، له‌وانه‌یش كورده‌یل فه‌یلى، چوینكه‌ به‌شیگن له‌ ملله‌ت كورد، ك ئویشید:

دویاى داناین ده‌ستوور وه‌ختى له‌ 17/ 7/1970و دویاى وه‌سه‌رچگن چه‌ن مانگیگ له‌بان به‌یاننامه‌ى ئادار ساڵ 1970 رژیم عراق ده‌س گرته‌ بان هه‌رسێ ده‌سڵاته‌یل عراق، ئه‌ویش له‌ڕى ده‌زگایه‌یل ئاسایشى و حزبى و ئه‌وه‌ بوى ئه‌نجوومه‌ن وه‌زیره‌یل ده‌سكرده‌ لاوردن كورده‌یل له‌ پۆسته‌یل باڵاو له‌ ده‌سڵاته‌یلیان وه‌ تایبه‌ت هه‌ر په‌نج وزیره‌یل كورد.

له‌ هه‌مان وه‌خت وه‌عه‌ره‌بكردن ناوچه‌یل كه‌ركووك و خانه‌قین و شه‌نگاڵ و مه‌نه‌لى و شێخان و شوونه‌یل تر وه‌رده‌وه‌ام بوى و كورده‌یل له‌تیان ده‌ركردو عه‌ره‌ب عراقى هاورده‌ شوونیان.

له‌وه‌یش فیشتر ئه‌وه‌ بوى ك له‌ مانگ ئه‌یلوول ساڵ 1971، حكوومه‌ت عراقى پاساویگ ده‌ركرد ك گوایا ئیران بڕیگ له‌ دویرگه‌یل كه‌نداو داگیر كردگه‌ جوور" ته‌نب گه‌ورا، ته‌نب بویچگ ، ئه‌بو مووسا"، ئمجا 120 هه‌زار خیزان شیعه‌ مه‌زه‌و له‌ عراق ده‌ركرد ك زوورمیان كورده‌یل فه‌یلى بوین له‌ پشتكویه‌ى ئیران، وه‌لى ئه‌وانه‌ هه‌ر له‌ باوگ و باپیره‌و له‌ به‌غداو خانه‌قین و مه‌نه‌لى ژیان وه‌ سه‌ر بردیان و ناچار بوین له‌ماوه‌ى چه‌ن سه‌عاتیگ ماڵه‌یلیان بیلنه‌جى و خریانه‌ ناو سه‌یاره‌یل زیل سه‌ربازى و ده‌ركریان وه‌بى ئه‌وه‌گ هوچ تاوانیگ داشتوون و ئاواره‌ى ئیران كریان.

دى وه‌و جووره‌ وه‌ شیوه‌یگ مه‌ویسى له‌ ساڵ 1980 ئه‌و كرده‌وه‌ هه‌ر وه‌رده‌وام بوى و له‌ سه‌ره‌تاى جه‌نگ ناونى عراق و ئیران شماره‌ى ئه‌و ده‌ركریاگه‌یله‌ ره‌سیه‌ نیم ملیۆن عراقى ك ده‌یه‌ها هه‌زار كورد فه‌یلى له‌تیان بوى وه‌ پاساو ئه‌وه‌گ ته‌به‌عیه‌ى ئیرانیین!!

عه‌دنان ره‌حمان

ج . أ