كه‌ى بوینه‌ فه‌یلى؟

شفق نيوز

كیشه‌یگ چ تایبه‌ت چ گشتى جیاوازى گه‌ورایگ هه‌س. ئیمه‌ى كورد فه‌یلى جویر مه‌ردمان تر تاوان خه‌یمنه‌ بان رووژگار و گرفته‌گه‌ ها له‌خوه‌مان، كه‌سه‌یلیگ هه‌ن مامڵه‌ وه‌ل كیشه‌گه‌مانا كه‌ن وه‌تایبه‌ت ك گوایا مه‌سه‌له‌یگ وه‌زیفى وه‌ڕیه‌وبردن یا ئداریه‌، یا له‌دید ره‌ساننه‌و نوڕیگه‌پى. له‌وه‌رانوه‌ر ئه‌وه‌یش كه‌سه‌یلیگ هه‌ن ئى وه‌رپرسیاریه‌تى تاریخیه‌ وه‌ جددى بردنه‌ وه‌دریژایى رووژگار و دوینیم ك هه‌میشه‌ وه‌رده‌وامن له‌ پشتگیریكردن كیشه‌گه‌ جویر ئه‌وه‌ك ئه‌نجام خاسیگ له‌لى بكه‌نه‌ دى.

له‌یرا پرسیم كامیان شماره‌ى گه‌وراتر پیك تیه‌رن، ئه‌وانه‌ك خوه‌یان دویر گرن له‌ كیشه‌گه‌مان یا ئه‌وانه‌ك گه‌ردنه‌ شوون چاره‌سه‌ر؟ ئه‌گه‌ر بایمنه‌ پاى واقع دیاره‌ زوورمیان بیده‌نگن و ئه‌وه‌كیش بایگه‌ جواو یا شه‌رمى تیه‌یگ یا جواو خراویگ دیریگ، یه‌یش حاشا له‌ وجوود لایه‌ن و كه‌سایه‌تیه‌یل خاوه‌ن نه‌خشه‌ى یه‌كسان و قه‌بولكریاگ ناكا، به‌ڵكوو له‌ناونى ماوه‌یگ و ماوه‌یگ تر كه‌فیگه‌ ناو كاره‌یلیگ وه‌ل واقعا نیه‌گوجیه‌یگ ، هه‌ر له‌وه‌ر ئه‌وه‌یش دوینید هه‌ڵویسته‌یلیگ نیشانده‌یگ  گه‌وراتر له‌تواناى و له‌فامستن غه‌ڵه‌تیگه‌و سه‌رچه‌وه‌ گریگ ، یا دوینید شیه‌وكردن تر نیشانده‌یگ وه‌جووریگ ك نیه‌گونجیه‌یگ وه‌ل واقعا، ئنجا هه‌ركه‌سیگ سه‌ردان ده‌زگاى شوناسنامه‌ یا كیشه‌یل موڵكدارى یا ده‌زگاى شه‌هیده‌یل یا زندانیه‌یل سیاسى یا وزاره‌ت كووچ و كووچبه‌ره‌یل یا وزاره‌ت داد یا وزاره‌ت و ده‌زگایه‌یل تر له‌ به‌غدا بكا له‌یوا زانیگ ك كیشه‌یل كورد فه‌یلى چاره‌سه‌ر كریاگه‌، ك یه‌یش له‌وه‌ختیگ ئه‌و وزاره‌ت و ده‌زگایه‌یله‌ قانوون و رینمایى دیرن و له‌بان ئه‌و قانوونه‌یله‌ چنه‌ ڕییه‌و نه‌ك وه‌گووره‌ى مه‌یل ئه‌ى و ئه‌و یا ئه‌وانه‌ك سه‌ردانیان كه‌ن. ئنجا ئه‌گه‌ر وه‌و قسه‌یلیشه‌ باوه‌ڕ بكه‌یم، ماناى ئه‌وه‌سه‌ كیشه‌یلمان چاره‌سه‌ر بویه‌و یه‌یش چه‌واشه‌ى راسیه‌یله‌ له‌بان زه‌وى واقع.

له‌باوه‌ت ریكخریاگ و كومه‌ڵه‌و ته‌نانه‌ت حزبه‌یلیش، حاشا كه‌ن له‌ توانایى كه‌سه‌یل تر ك گوایا ته‌نیا دریژه‌ده‌ر فكر و شیواز كه‌سه‌یل وه‌رجه‌ خوه‌یانن، چوینكه‌ زوورم ئه‌و روخساره‌یله‌ تازه‌ نین له‌مه‌یدان فه‌یلى. وه‌ل ئه‌وه‌یشا دوینید كه‌سه‌یلیگ خوه‌یان ده‌رخه‌ن وه‌ناو رووشنهویر و خه‌ریك چشته‌یلیگن ك دویره‌ له‌ تایبه‌تمه‌ندى ئه‌وان، ئنجا ئه‌گه‌ر چالاكییان له‌بان ئاست خودى بویاتاد، ئه‌وه‌ په‌یوه‌ندى وه‌ خوه‌یانه‌و دیرى، وه‌لى هه‌وڵداینیان ئه‌را ئه‌وه‌ك بوونه‌ ده‌مچه‌رمگ و نوێنه‌رایه‌تى چین كورده‌یل فه‌یلى ئه‌یه‌ كیشه‌ى گه‌ورایگه‌و نالانیمن وه‌ده‌س ئه‌نجامه‌یلى وه‌دریژایى ساڵه‌یل فره‌یگ . ئنجا حه‌یف و زوڵم شایه‌ت بخه‌یمنه‌ى پشت سه‌ر ئه‌گه‌ر هات و قانوونه‌یل گونجیاگیگ ده‌رچى ئه‌را چاره‌سه‌رى، وه‌لى كیشه‌ى ئه‌وانه‌ چاره‌سه‌ر نه‌یریگ و مه‌حاڵه‌ له‌هویره‌و بچوود.

بیگومان ئه‌وه‌ك تا دویه‌كه‌ ره‌خنه‌ له‌ مه‌ردم گرت، رووژیگ بایگ ره‌خنه‌ له‌ خوه‌یشى بگرێد و رووژێگ تێد له‌دژ به‌رژه‌وه‌ندى ئه‌و كار بكریه‌یگ وه‌بى ئه‌وه‌ك خوه‌یشى هس بكا. ئیمه‌ ئه‌گه‌ر هه‌وڵ ئه‌وه‌ به‌یم چاره‌سه‌ر كیشه‌ى چینه‌گه‌مان بكه‌یم، ئه‌وه‌ بایه‌سه‌ له‌و دیارده‌یله‌ خوه‌مان دویره‌و بخه‌یم و ئه‌وانه‌ك له‌ى چوارچیوه‌ كار كه‌ن بایه‌سه‌ له‌بانیان جورئه‌تیگ له‌ كاركردن پڕ شه‌فافیه‌ت داشتوون و خوه‌یان دویر بگرن له‌به‌عزه‌ چشته‌یلیگ و ئعتماد له‌بان هه‌وڵ و ته‌قلاى كه‌سه‌یل تر نه‌كا، وه‌ل ئه‌وه‌یشا هه‌ر یه‌كیگ له‌ ئیمه‌ بایه‌سه‌ له‌ناونى ماوه‌یگ و ماوه‌یگ تر ئاشكراى ئه‌و هه‌وڵداینیه‌ بكا تابزانیم چه‌ كردگه‌و ڕه‌سیه‌سه‌ چ ئه‌نجامیگ. ئنجا بیجگه‌ بڕیاره‌یل خاس و مامڵه‌یل سیاسى و سووزدارى لایه‌نه‌یل، وه‌لى هیمان كیشه‌ى ئیمه‌ى فه‌یلیه‌یل تائیسه‌یش هه‌ر جویر خوه‌ى مه‌ندگه‌و هیمان چشته‌یل فره‌یگ ئاشكرا نه‌ویه‌و كاره‌یل فره‌یگ هه‌وه‌جه‌ وه‌ ئه‌نجامداین دیریگ و چه‌وه‌ڕى ئه‌وانه‌ كه‌ن تواناى جموجویل داشتوون و چشتیگ له‌ده‌سیان بایگ. وه‌لى وه‌ل ئه‌وه‌یشا بایه‌سه‌ یایبگریم له‌وانه‌ك خزمه‌ت وه‌ كیشه‌گه‌مان كردن له‌ئیمه‌ زیاتر و خوه‌یانیش فه‌یلى نین، بایه‌سه‌ ئه‌وه‌یش بزانیم ك رووژیگ تیه‌یگ كار ئه‌و ره‌فتار و هه‌ڵسووكه‌فته‌یل ئه‌رزانه‌ له‌خراوداین و هه‌تكداین و شكاننه‌وه‌ى وه‌رانوه‌ر و لویتبه‌رزیكردنه‌ وه‌بى هه‌ق ته‌واو بوود، جویر ئه‌وه‌ك ئویشن: ئه‌گه‌ر تواسى قه‌در كاره‌گه‌د بزانید ته‌ماشاى ئه‌وه‌ بكه‌ كى به‌شداریید ئه‌كا له‌لى.

 

عه‌لى حسێن فه‌یلى