ئه‌رك جايه‌ڵ ئه‌را ره‌سين وه‌ كومه‌ڵگايگ مه‌ده‌نی هاوچه‌رخ

شفق نيوز

سه‌ره‌تا بايه‌سه‌ بزانيم خواست و داواكاريه‌يل جايه‌ڵ چه‌س له‌ ده‌سڵات، ئه‌مجا ئه‌گه‌ر خواست جايه‌ڵ جوانه‌يل جيوه‌جی كريا، دی ئه‌و وه‌خته‌ بايه‌سه‌ ئه‌رك ئه‌رای دابنه‌يم. سه‌ره‌تای ده‌سوه‌پيكردن عومر جايه‌ڵ وه‌رجه‌ دروسكردن ژيان هاوسه‌ری ده‌س وه‌پی ئه‌كا، ك بايه‌سه‌ كار ئه‌رای دابين بكريه‌يد له‌ی عومره‌و مووچه‌ی خاسيگ داشتوود تا بتويه‌نيد ژيان خوه‌ی دابين بكاو هاوسه‌ر خوه‌ی ده‌سنيشان بكا وه‌بی ئه‌وه‌ك وه‌رده‌ه‌وام هوير له‌وه‌ بكا ك چوين بتويه‌نيد ژيان هاوسه‌ری دامه‌زرنيد ئه‌گه‌ر مووچه‌ی خاسيگ نه‌ياشتوود.

ئمجا له‌شوون دامه‌زرانن ژيان هاوسه‌ری، داواكاری تر جايه‌ڵ وه‌دی ئه‌كريه‌يد، ك ئه‌ويش شوون نيشته‌جيبوينه‌و فريه‌ گرينگه‌ ك ئه‌رای دابين بكريه‌يد، وه‌نا ئه‌گه‌ر ئه‌و شوونه‌ ئه‌رای دابين نه‌كريه‌يد وه‌هويچ شيوه‌يگ گرينگی وه‌ پيشكه‌فتن كومه‌ڵگا نايه‌يدو هه‌ميشه‌ هوير له‌وه‌ ئه‌كا ك نه‌چێده‌ ناو ژيان هاوسه‌ری و گه‌شت بكا وه‌ره‌و هه‌نده‌ران تا بتويه‌نيد ژيانيگ خوه‌ش ئه‌را خوه‌ی مسۆگه‌ر بكا.

ئمڕوو ئيمه‌ له‌ كومه‌ڵگای كورده‌واری فريه‌ هه‌وه‌جه‌ وه‌ نه‌خش جايه‌ڵ ديريم، هه‌ر وه‌و خاتريشه‌ بايه‌سه‌ ده‌سڵات هوير له‌وه‌ بكا ك مووچه‌ی جايه‌ڵ زيای بكريه‌يد له‌ سه‌ره‌تای دامه‌زراننی نه‌ك له‌وه‌خت پيری ك هه‌وه‌جه‌ وه‌پی نه‌ياشتوود.

وه‌ل ئه‌وه‌يشا ده‌سڵات بايه‌سه‌ وه‌رده‌وام هه‌وڵ كه‌مه‌وكردن كيشه‌يل جايه‌ڵ جوانه‌يل بياد، چوينكه‌ تائيسه‌ خواست و داواكاری جايه‌ڵه‌يل وه‌ ته‌مامی مسۆگه‌ر نه‌كرياگه‌، ده‌سڵات بايه‌سه‌ هوير له‌وه‌ بكا ك هه‌وه‌جه‌يل دروسكردن شوون نيشته‌جيبوين ئه‌را ئی چين گرينگ له‌ كومه‌ڵگا دابين بكا تا جايه‌ڵه‌يل وه‌رده‌وام هوير له‌ پيشخستن كومه‌ڵگای خوه‌يان بكه‌ن و فيشتر هه‌وڵ بيه‌ن تا كومه‌ڵگا بڕه‌سننه‌ ئاست كومه‌ڵگای وڵاته‌يل پيشكه‌فتگ.

ئه‌سکه‌نده‌ر مه‌جید عه‌زیز

ج . أ