شوفێرى و بار ده‌روینى

شفق نيوز

 

جارجاریگ ته‌نانه‌ت شوفێر شاره‌زایش تواناى ئه‌وه‌ نه‌یرێد خوه‌ى دویر بگرێد له‌ مه‌ترسى رویداگه‌یل هامشوو، ئه‌ویش له‌وه‌ر ناشاره‌زایى شوفێره‌یل تر، ك زانیارى ته‌واویگ نه‌یرن له‌ مه‌رجه‌یل شوفێرى، وه‌ل ئه‌وه‌یشا فره‌جار شوفێر روى وه‌ڕوى مه‌ترسى رویداگه‌یل هامشوو بووده‌و له‌وه‌خت شوفێرى له‌وه‌ر چه‌نه‌ها مه‌مه‌ر جوور بار جاده‌و بار كه‌ش و هه‌وا، یا بار ته‌ندروسى یا مه‌سه‌له‌ى سورعه‌ت، یا دوینید بڕیگ له‌و مه‌ترسیه‌یله‌ په‌یوه‌ندى وه‌ كه‌سایه‌تى شوفێره‌گه‌و بار ده‌روینیه‌و دیرێد ك له‌وه‌خت رانستن ده‌ركه‌فید و چه‌ن روخساریگ كه‌سایه‌تى بار ده‌روینى و ره‌فتاره‌یلى ئاشكرا بوود.

 

مگارلند تویژه‌ر ئه‌مریكى ئویشید" ئاده‌میزاد وه‌ هه‌ر شیوه‌یگ بژیه‌ید، هه‌ر وه‌و جووریشه‌ شوفێرى ئه‌كا". ئمجا تویژه‌ره‌یل ئه‌وه‌ ئسبات كردنه‌ ك 75% رویداگه‌یل هامشوو هووكاره‌گه‌ى خود ئاده‌میزاده‌یلن یا خود شوفێره‌یلن و  بار ده‌روینى و كوومه‌ڵایه‌تى و په‌روه‌رده‌یى و رووشنهویرى هووكار هسیاریگه‌ له‌ى بواره‌. وه‌ل ئه‌وه‌یشا ئه‌ڕاى چوین غه‌ڵه‌تیگ هه‌س له‌لاى بڕێگ له‌ شوفێره‌یل ك ئه‌ویش ئه‌وه‌سه‌ پابه‌ند نادۆن وه‌ یاساو رێنمایه‌یل هامشوو، ئه‌ویش فره‌جار دوینیم باوه‌ڕیان ئه‌وه‌سه‌ ك دوعاو جادوویگ له‌ ناو ئۆتۆمۆبیل دانانه‌ ك گوایا مقه‌یه‌تى له‌لیان ئه‌كا له‌و رویداگه‌یل مه‌ترسیداره‌. وه‌گووره‌ى له‌یه‌كه‌وداین چه‌ن تویژه‌ریگ له‌ وڵاته‌یل ئه‌ورۆپى ئه‌وه‌ ده‌ركه‌فتگه‌ ك 44% شوفێره‌یل له‌گشت پیكهاته‌یل ك ئه‌و دوعایه‌یله‌ مقه‌یه‌تى له‌لیان له‌وه‌خت رانین ناكه‌ێد، هه‌ر له‌وه‌ر ئه‌وه‌یش بایه‌سه‌ بزانن ك ئى جووره‌ باوه‌ڕه‌یله‌ كاریگه‌رى خراو دیرێد له‌بان بار سه‌ڵامه‌تى، چوینكه‌ شوفێر له‌و جووره‌ حاڵه‌ته‌یله‌ كه‌م ئاگاداره‌و پشت وه‌ خوه‌ى ناوه‌سێ.

 

بیگومان ئاشكرابوین جیاوازى ئه‌وه‌سه‌ ك له‌وه‌ختیگ ئاده‌میزاده‌گه‌ خاوه‌ن كه‌سایه‌تییگ ناجیگیر بوود له‌ڕوى ده‌روینیه‌و یا له‌بار ناته‌واویگ  و له‌ژیر فشاریگ بوود، دوینیم فره‌ وه‌ هه‌ڵه‌په‌ڵه‌ ئۆتۆمۆبیل رانێد وه‌خاتر ئه‌وه‌ك دویا نه‌كه‌فێد له‌ كاره‌گه‌ى، وه‌لى دوینید له‌ وه‌خت گله‌وخواردن وه‌ ئارامتر رانید، وه‌لى وه‌هه‌ر حاڵ ئى مه‌سه‌له‌ خریاسه‌ شان ره‌فتاره‌یل ئه‌قڵانى و نائه‌قڵانى.

 

له‌یره‌ دكتۆر یوسف خه‌یات ئویشید: ئه‌و كه‌سه‌ ك خاوه‌ن كه‌سایه‌تییگ جیگیره‌ هه‌میشه‌ ره‌فتاره‌یل ئه‌قڵانى وه‌پیه‌و دیاره‌و له‌وه‌رجه‌ ئه‌وه‌ك قسه‌ بكا وشه‌یلى ئه‌خاده‌ تاى ته‌رازوى و شیواز ره‌فتاریان له‌ شوفێرى ئارامه‌، ئمجا له‌ دید ئى راسى زانستیه‌وه‌ په‌ندیگ ئه‌ڵمانى هه‌س ئویشید" با شیواز رانیند بوینم، ئه‌وسا ئویشیمه‌ پید تۆ كیید".

 

به‌ختیار محه‌مه‌د

ج . أ