ئيمه وه ده‌س خوه‌مان وڵاته‌گه‌مان ويران ئه‌كه‌يم!
گام گه‌ورا له‌ى قه‌رده ئه‌وه‌سه ك ئه‌چێده چوارچيوه‌ى ئه‌و بودجه ك له بنه‌ڕه‌ته‌و ئه‌ناڵێد وه ده‌س كه‌مى ئاشكرايگ ئه‌را په‌رده‌پووش بودجه‌ى وه‌كاربه‌ر، يه‌يش وه‌و مانا ك بڕه پويله جوور مووچه ئه‌دريه‌ێد و وه‌تاڵان ئه‌چێد.
گام دويه‌ميش پيكهاتگه له هه‌واڵه‌كردن زيايه‌ى نرخه‌يل نه‌فته ئه‌را ئاسته‌يل وه‌رين، ك ئه‌گه‌ره‌يل داوه‌زين ئه‌و نرخيشه له 80 دۆلاره‌و ئه‌را 30 دۆلار يا كه‌متره وه‌تايبه‌ت له‌ساڵ وه‌رين وه بوونه‌ى زيايبوين به‌رهه‌مه‌يل ئيرانى له‌ساڵ 2016.
من ئه‌وه له‌ليدان ناشارمه‌و ك ناڕه‌حه‌ت بووم له وه‌ختيگ دوينم ك وه‌رپرسه‌يل له‌بان دوسيه‌ى ئابوورى بڕياره‌يليگ ئه‌يه‌ن كاريگه‌رى خراو ئه‌كاده بان ئابوورى وڵات وه‌بى له‌وه‌رچه‌وگرتن گامه‌يل شيه‌وكرياگيگ ئه‌را قورتاركردن وڵاته‌گه له‌و ويرانكاريه و باس له‌وه ئه‌كريه‌ێد ك ساڵ ئاينده كه‌مى روى ئه‌ياد له يه‌ده‌گ نه‌ختينه و ناچاريم نرخ دينار داوه‌زنيم، ك جى داخه كه‌سيگيش نيه گووش له چاره‌سه‌ر ئابوورى بته‌كنێد.
وه‌ل ئه‌وه‌يشا هيكان دزيكردن له بانكه‌يل ناوه‌ندى وه‌رده‌وامه، ئمجا جياوازى ناونى نرخ نمايشكرياگ 1190 ئه‌را دۆلاريگ و نرخ فرووشتن 1223، ماناى 2،8 سه‌نت ئه‌را هه‌ر دۆلاريگه‌و بانك ناوه‌ندى مانگانه ده‌س ئه‌كاده فرووشتن وه 3،8 مليار دۆلار، يه‌يش وه ماناى فيشتر له نيمه‌ى ئى بڕه پويله له بازاڕ فرووشيه‌ێدو دزيكردن ئاشكرايگه له هاووڵاتيه‌يل و ساڵانه فيشتر له 600 مليۆن دۆلار له هاووڵاتى ئه‌دزيه‌ێد.
جى داخه زوورم هاووڵاتيه‌يل ئى راسيه نازانن و سه‌ريان ده‌رناچێد له كاريگه‌رى ئى سياسه‌ت كاولكه‌ره و دوينێد دوياى چه‌ن ساڵيگ وڵاته‌گه ئه‌كه‌فێده ناو قه‌رد فريه‌يگ و دينار عراقييش قيمه‌تى نامينێد و چينيگ تر سياسى ئه‌يه‌ن ك هه‌رچه‌نى دڵسووزيش بوون دوينێد هه‌ر هه‌مان كيشه روى ئه‌ياد و تواناى قورتاركردن ئى وڵاته نه‌يرن له‌ڕوى ئابووريه‌و، يه‌يش بيجگه كيشه‌يل ئاسايشى و كيشه‌ى داعش.
ئمجا سياسيه‌يل هه‌ر بايه‌سه رووژيگ له رووژان ئى وه‌رپرسيارێتيه له‌وه‌رده‌م خوداو گومه‌ڵگا بگرنه مل ئه‌را وساننه‌وه‌ى ئى ڕى وشوون كاولكه‌ره‌و هه‌ر بايه‌سه مه‌رجه‌ع ئايينييش وه‌رگه‌ى ئى وه‌پرسيارێتيه بگرێد ئه‌را قورتاركردن وڵات و نه‌وه‌يل ئاينده له‌ى ئاينده‌ى ئابوورى مه‌ترسيداره‌و ئى كاولكارى گه‌وراو مه‌ينه‌تيه‌يل هاووڵاتيه له‌شوون ساڵه‌يليگ وه بوونه‌ى ئى سياسه‌ته‌يل هه‌ڵه‌و نادروسه.
محه‌مه‌د ته‌وفيق عه‌لاوى
