ئایا سیاسه‌ت گوزارشه‌ له‌ فه‌ن وفیڵ و دروو؟

شفق نيوز

 

ئه‌یانه‌و چه‌نه‌ها چشت تر له‌باوه‌ت سیاسه‌ته‌و باس كریاگه‌ وه‌ جووریگ ك مه‌ردمانیگ وه‌پیان له‌یواسه‌ ك سیاسه‌ت پیكهاتگه‌ له‌ فه‌ن و فیڵ و درووكردن و ئه‌و كه‌سه‌یلیشه‌ ك سه‌رقاڵ سیاسه‌ت بوین وه‌ كه‌سه‌یل درووزن له‌ناو مه‌ردم كوومه‌ڵگا ناسریانه‌.

 

له‌یرا ئه‌وه‌ك توایم بخه‌یمنه‌ى روى، ئه‌ویش چه‌ن تاریفیگ زانستیانه‌ى سیاسه‌ته‌ تا بتویه‌نیم ئه‌و رویه‌گه‌ى تر سیاسه‌ت بوینیم ك چه‌نه‌ها سفه‌ت و چشته‌یل جوان له‌خوه‌ى گرتگه‌، چوینكه‌ دید ئیمه‌ سیاسه‌ت گوزارش نیه‌ له‌ فه‌ن وفیڵ و درووكردن جوور ئه‌وه‌ك ك مه‌ردمانیگ هویر له‌لى كه‌ن.

 

چه‌مك سیاسه‌ت چه‌مكیگ فره‌ سفه‌ته‌ وه‌ جووریگ ك بوود شیه‌و بكریه‌ید ئه‌را گوزارشكردن له‌ حاڵه‌تیگ فره‌ بویچگ یا تویه‌نریه‌ید گشتگیرانه‌و فره‌ لایه‌نانه‌ رووشنایى بخاده‌ بان باوه‌تیگ فراوان، ماناى ئه‌وه‌سه‌ له‌وه‌ر ئى هووكاره‌یله‌ تاریف فره‌یگ هه‌ن ئه‌را سیاسه‌ت و هه‌ر تاریفیگ ئه‌را چه‌مك سیاسه‌ت ك جیاوازى داشتوود له‌واكه‌ى تر، له‌ دید و نوڕستنه‌یل جیاواز ئه‌را ئى چه‌مكه‌ سه‌رچه‌وه‌ گرید .

 

فره‌یگ له‌ فه‌رهه‌نگه‌یل گه‌ورا تاریف سیاسه‌ت وه‌ هونه‌ر ده‌وڵه‌تدارى كه‌ن و له‌ هه‌مان وه‌خت جه‌خت له‌وه‌یش كه‌ن ك سیاسه‌ت چالاكى باڵایگه‌ ك گشت چالاكیه‌یل تر گریده‌و، چوینكه‌ سیاسه‌ت سروشتیگ گشتى دیریدو ئامانج له‌لى ریكخستن باڵاى ژیان تاكه‌یله‌ له‌ناو كوومه‌ڵگا، یا وه‌ مانایگ تر تویه‌نیم بویشیم سیاسه‌ت هونه‌ریگه‌ ئه‌را وه‌دیهاوردن ژیانیگ ئازادى و دیموكراسى له‌ عراق.

 

وه‌ل وجوود چه‌نه‌ها تاریف جیاواز ئه‌را سیاسه‌ت، وه‌لى كریه‌ید له‌ چه‌مكه‌ تایبه‌تیه‌گه‌ى پیكهاتوید له‌ وه‌ڕه‌یه‌وبردن و ریكخستن كاروبار وڵات له‌لایه‌ن حكوومه‌ته‌و وه‌ل دیاریكردن فۆرم و پیكهاته‌ى چالاكیه‌یل ك وه‌ شیوه‌یگ گشتى ئى كاره‌یله‌ له‌بان دو ئاست ئه‌نجام دریه‌ید، یه‌كه‌م: له‌بان ئاست ناوخود وڵات و دویه‌میش له‌بان ئاست ده‌یشت وڵات.

 

سیاسه‌ت بیجگه‌ لایه‌نه‌ تاكه‌كه‌سیه‌گه‌ى، بوود گرده‌و بكریه‌ید له‌ شیواز وه‌ڕیه‌وبردن پرووژه‌یگ تایبه‌ت یا پرووژه‌و ده‌زگایگ گشتى، ئنجا وه‌ گووره‌ى ئه‌وه‌یش سیاسه‌ت ماناى وه‌ڕیه‌وبردن سه‌رچه‌وه‌و سامانه‌یله‌ ئه‌را وه‌دیهاوردن ئامانجه‌یل.

 

په‌یوه‌ندى ناونى سیاسه‌ت و ئه‌خلاقیش تویه‌نیم بویشیم په‌یوه‌ندییگ بته‌وه‌، چوینكه‌ ئه‌گه‌ر سیاسه‌ت ئه‌خلاق وه‌لیا نه‌ود، ئه‌وه‌ وه‌ره‌و ئاكام نادیاریگ چوود و كیشه‌یل ناو كوومه‌ڵگا فیشتره‌و بوود. نه‌وین سیاسه‌تیگ راس و ئه‌خلاقدار له‌ كوومه‌ڵگا گه‌وراترین كیشه‌یگه‌و بووده‌ هووكار شیوانن هاوسه‌نگى كوومه‌ڵگا له‌گشت بواره‌یل.

 

سه‌روه‌ر حه‌مه‌ ئه‌حمه‌د

ج . أ