قه‌ڵه‌م خویناوى

شفق نيوز

 

شایه‌ت زوورممان ئه‌و قسه‌ ژنه‌فتویم ك ئویشید فڵانه‌كه‌س قه‌ڵه‌مه‌گه‌ى خویناویه‌، چوینكه‌ خراو نویسینێد و ئه‌وقه‌ره‌ ك ئامانجى ئاشووه‌ ئه‌وه‌نه‌ ئامانجى وه‌رگریكردن نییه‌ له‌ ئازادى هویر وڕا، وه‌لى كه‌س هویر نه‌خسته‌ لاى ئه‌وه‌ك كه‌ره‌سه‌یگ جوور قه‌ڵه‌م ك ته‌نیا ئه‌را وه‌ده‌سهاوردن ئازادى هویر وڕا تیه‌ریه‌یده‌ كار، ئمڕوو بووده‌ كه‌ره‌سه‌یگ خویناوى و كاره‌یل خراو وه‌پى ئه‌نجام بدریه‌ێد.

یه‌یش له‌وه‌ختیگه‌ ك زویتریش قسه‌ له‌بان هاورده‌كردن ئى قه‌ڵه‌مه‌ كریا ك له‌ بازاڕه‌یل وجوود داشت، وه‌لى هویچ لایه‌نیگ په‌یوه‌ندیدار ئاسایشى گووش نه‌یانه‌ مه‌سه‌له‌گه‌، ئمجا له‌وه‌یش مه‌ترسیدارترین ئه‌وه‌سه‌ ك هویچ نویسه‌ریگ دقه‌ت ئه‌و جووره‌ بازرگانیه‌ نه‌كرد ك بازرگانه‌یل كورد هاورده‌ى كردن.

قه‌ڵه‌م خویناوى كه‌یسیگ نییه‌ ك ته‌نیا شان كه‌سیگ بگرێده‌وه‌و دادگایى بكریه‌ید و دویاخر قه‌یه‌غه‌ بكریه‌ید جوور سووكایه‌تى و ناوزڕانن وه‌گووره‌ى یاسا، چوینكه‌ ئه‌یه‌ كه‌سیگ دیاریكریاگ وه‌ ته‌نیا نه‌هاوردگه‌سه‌ى به‌رهه‌م، به‌ڵكوو ئامانجیگ سیاسییش ها پشتى و ئى كه‌یسیشه‌ ئیسه‌ سه‌راوه‌گه‌ى دوینریاسه‌و و تا راده‌یگیش مه‌ردم له‌لى هووشیاره‌و كریاگه‌. ئه‌را نموونه‌: ئه‌و بازرگانه‌یله‌ ك ئى جووره‌ كه‌ره‌سه‌یله‌ تیه‌رنه‌ ناو كوردستان، نه‌ك هه‌ر مه‌ترسى ئاسایشه‌، به‌ڵكوو مه‌ترسییشه‌ ئه‌را بان هویر وڕایش، ئمجا دویاخر بایه‌سه‌ بپرسیم ك ئه‌راچه‌ ئه‌و سیاسیه‌یله‌ ك ئاگادارن له‌ هاورده‌كردن ئى كه‌ره‌سه‌ى خویناویه‌و بیده‌نگن له‌ئاستى.

قه‌ڵه‌م خویناوى ئامانجیگ تر ها له‌پشتى، ك ئه‌ویش شیوانن ئاسایش نه‌ته‌وه‌ییه‌و هه‌ر له‌وه‌ر ئه‌وه‌یش وه‌رجه‌ ئه‌وه‌ك تاكیگ بخاده‌ مه‌ترسیه‌و كوومه‌ڵگایگ ئه‌خاده‌ وه‌رده‌م مه‌ترسى و هویچ جووره‌ متمانه‌یگ له‌ناو مه‌ردم نیه‌یلیده‌و.

وه‌ مانایگ تر هویچ جیاوازییگ نییه‌ له‌ناونى كار تیرۆریستى و قه‌ڵه‌م ته‌قه‌كه‌ر، ك شایه‌ت كار تیرۆریستى وه‌پى بكریه‌ێد و دروسبوین نامتمانه‌یش یه‌كیگه‌ له‌و ئامانجه‌یله‌ ك كوومه‌ڵگا تویش قه‌ڵه‌م به‌دگومانى ئه‌كاو خراوترین كاریگه‌رییش ئه‌وه‌سه‌ ك كه‌س باوه‌ڕى وه‌ قه‌ڵه‌م وه‌ده‌س و ئازادیخواز نه‌مینێد.

سمكۆ محه‌مه‌د

ج . أ