عه‌ره‌به‌يل كه‌ی ئه‌خوازن بفامن سه‌ددام ديكتاتوور بوی ؟

شفق نيوز

ديكتاتووره‌يل و زاڵمه‌يله‌ . بڕيگ له‌ وڵاته‌يل رووژئاوا و وڵاته‌يل رووژهڵات توا‌ستن له‌ی راسيه‌ ئاگاداره‌و بوون و پێشبكه‌فن و گه‌شه‌ په‌يا بكه‌ن و بتويه‌نن سيستم ديموكراتی له‌بان بنه‌وای ئازادی و دادوه‌ری و دوير له‌ زۆڵم و ديكتاتووريه‌ت رێكبخه‌ن وه‌لی عه‌ره‌ب نه‌تويه‌نست ئه‌ی راسيه‌ قه‌بوول بكا و بفاميگه‌ی وه‌ی خاتره‌ كه‌فته‌ ژيرده‌س حاكمه‌يل و ديكتاتووره‌يل . وه‌رجله‌ چه‌نيگ عه‌لی حه‌سه‌ن مه‌جيد ناسريگ وه‌عه‌لی كيمياوی له‌ سێداره‌ دريا ئه‌وه‌يش وه‌تومه‌ت ئه‌و تاوانه‌يله‌ ك له‌دژملله‌ت كورد ئه‌نجاميان داس و شار هه‌ڵه‌بجه‌ی شه‌هيد له‌ساڵ 1988 وه‌چه‌ك كيميايی بوردومان كرد . له‌سێداره‌ داين عه‌لی حه‌سه‌ن مه‌جيد بويه‌ بايس خوه‌شحاڵی لايه‌نگه‌ره‌يل ئازادی و دادوه‌ری له‌ گشت لای جه‌هان بيجگه‌ بڕيگ له‌ عه‌ره‌ب. ئه‌وانه‌ جوور گشت جار ك هووكاره‌ بوينه‌ خوسه‌ی سه‌رده‌م سه‌ددام خوه‌ن و مه‌يل ديرن ئه‌را ئه‌و وه‌خته‌ عێراق گله‌و بيه‌ن و ته‌نيا ئشاره‌ت كه‌نه‌ سه‌ركه‌فتنه‌يل پارت به‌عس گووڕوه‌گووڕ وه‌جووريگ ئه‌گه‌ر سه‌ردان فيشتر سايته‌يل ئه‌نته‌رنێتی و رووژنامه‌يل و گوڤاره‌يل عه‌ره‌بی بكه‌يم دوينيم ك ره‌سم سه‌ددام و عه‌لی كيمياوی و سه‌ركه‌رده‌يل به‌عس وه‌ل قسيه‌يليان و درۆشمه‌يليان په‌خشه‌و كرياس . ئه‌و ده‌سكه‌فتنه‌يل سه‌ددامه‌ ك عه‌ره‌ب وه‌پی ئاماژه‌ ئه‌كا له‌سه‌ره‌تاوه‌ له‌زه‌ره‌د خوه‌يان و دويره‌و كه‌فتن عراق له‌ كوومه‌ڵگای عه‌ره‌بی و بی پويلی عراق و ته‌نگده‌سی هاووڵاتيه‌يل عراقی بوی . سه‌ددام بويه‌ بايس شيويان بارودوخ وڵاته‌يل عه‌ره‌ب هاوسای خوه‌ی و تا ئيسه‌يش شوونه‌واره‌يل ئه‌و ده‌سڵاتداری ديكتاتووريه‌ له‌مه‌يدان عه‌ره‌بی مه‌نگه‌ ك جوور ده‌سكه‌فتنه‌يل سه‌ددام گووڕوه‌گووڕ زاننه‌ی . جه‌نگ و ناكووكی و فتنه‌و كينه‌ له‌ناونی عيراقيه‌يل و كوه‌يتيه‌يل له‌يه‌كلاو له‌لایتره‌و له‌ناونی عيراقيه‌يل و ئيرانيه‌يل و له‌لایتر له‌یناونی عراقيه‌يل و سووريه‌يل و له‌كوتايشه‌و له‌ناونی عراقيه‌يل خوه‌يان گشتيان له‌ ده‌سكه‌فته‌يل سه‌ددام گووروه‌گووره‌ . به‌ڵێ يانه‌ بڕيگ له‌ ده‌سكه‌فته‌يل فره‌ گه‌ورای سه‌ددام و پارت به‌عس گووڕوه‌گووڕ ئه‌را عه‌ره‌به‌. ئيسه‌ پرسيار كه‌يم ئه‌را وه‌خاتر سه‌ددام ديكتاتوور گيره‌ كه‌ن و خوسه‌ خوه‌ن...؟

ئيسه‌ وه‌خت ئه‌وه‌سه‌ ك عه‌ره‌ب بايه‌د له‌چوارچيوه‌ی هويری دوياكه‌فتگيان ده‌رچن و له‌ تونڕويی و زۆڵم و ديكتاتووريه‌ت ده‌س بكيشن و وه‌ره‌و ئازادی و ئنسانيه‌ت و دادوه‌ری روی بارن نه‌گ هه‌ر له‌بان هوير دوياكه‌فتگيان بمينن ك بويه‌سه‌ بايس بیزاری گشت جه‌هان له‌عه‌ره‌ب و كوومه‌ڵگای عه‌ره‌بی ....