چوین سه‌‌ركه‌‌فیمن؟!

شفق نيوز

هه‌مگه‌‌ ده‌‌سكه‌‌فته‌‌ ته‌‌نیا زووان یا زاراوه‌‌ێگ بیه‌‌سه‌‌ به‌‌شمان ك ئه‌‌ویش چه‌‌ناى چه‌‌نى هن رووشنهویره‌‌یله‌‌ و نازانیمن چوین تویه‌‌نێد ئى بار گرانه‌‌ ئه‌‌ڵگرێ و باس و خواس گشت چشتێگ بكا، فره‌‌ سه‌‌خته‌‌ داواكاریه‌‌یل ملله‌‌تێگ ته‌‌نیا له‌‌ ناو مه‌‌یدان جه‌‌نگ سه‌‌وز بكا و ئاره‌‌زووه‌‌یلى له‌‌ ناو دیوان شعرێگ یا چه‌‌ن په‌‌ڕ كاغه‌‌ز سه‌‌ر ئه‌ڵارێ!

ئمڕوو له‌‌ شوون چه‌‌ن هزار رووژ كار و ژیان له‌‌  شیواو شێو ناو به‌‌غدا ئه‌‌و شانازیه‌‌ دیرم ك بویشم كه‌‌سێلێگ ناسم  دویر له‌‌ هات و هاوار  و بى ئه‌‌وه‌‌ ك خوه‌‌یان بخه‌‌نه‌‌ وه‌‌ر چه‌‌و وه‌‌ بى ده‌‌نگ له‌‌ ساى سه‌‌ركه‌‌فتن نیشتنه‌‌ و نووڕنه‌‌ ئه‌‌و ده‌‌سكه‌‌فته‌‌یله‌‌ ك خوه‌‌یان  وه‌‌ ده‌‌سى هاوردنه‌‌، دیاره‌‌ سه‌‌ركه‌‌فتنه‌‌یل یه‌‌كمجار له‌‌ ده‌‌روین ئنسان ده‌‌سوه‌پى ئه‌‌كا و له‌‌ نه‌‌تیجه‌‌ى شه‌‌كه‌‌تبوین و دریژه‌‌داین وه‌‌ كار و كووشش و دووسداشتن كارێگه‌‌ ك ئه‌‌نجامى ئه‌‌ده‌‌ن، وه‌‌ل ئه‌‌وه‌‌شا زانیمن ك شیوه‌‌ى هویره‌‌وكردن ئه‌‌و‌انه‌‌ى له‌‌ گوڵ سوو كار كه‌‌ن ته‌‌نیا هووكار وه‌‌رده‌‌وامى و سه‌‌ركه‌‌فتنیان نیه‌‌، به‌‌ڵكم له‌‌ى باوه‌‌ته‌‌ ئه‌‌و باوه‌‌ڕه‌‌ ك فیشتر هانامان دا، گه‌‌ردین  وه‌‌ شوون خاڵه‌‌یل رووشن  ودویره‌‌و كه‌‌فتن  له‌‌ ئایمه‌‌یل ناهومید و  نا ته‌‌وان بى!!  ئیمه‌‌  ئاگر عه‌‌شقێگ ها ده‌‌روینمان ك ژیان و كارمان گه‌‌رمه‌‌و ئه‌‌كا و ئاینده‌‌ش هن خوه‌‌مانه‌‌، ئه‌‌و ئاینده‌‌ ك پڕه‌‌ له‌‌ كار و سه‌‌ربه‌‌رزى و باس و خواس ئه‌‌راى هاوسه‌‌فه‌‌رێل قه‌‌دردار و ده‌‌رد ئاشناێگ ك ته‌‌نیا سه‌‌رمایه‌‌یان هووش و فام و ئراده‌‌ى بته‌‌وێگه‌؛‌

نه‌‌ وه‌‌تیمنه‌‌ و نه‌‌ خواستیمنه‌‌ ك گشت جوور ئیمه‌‌ هویره‌‌و بكه‌‌ن! هه‌ر شماره‌‌ێگ نوو له‌‌ (گوڵ سوو) به‌‌شێگ له‌‌ كار و كووشش و ژیان ئیمه‌‌ ها له‌‌تى، ئمجا بایه‌‌د فكر و به‌‌رگ نوو له‌‌وه‌‌رى بوود تا  ماناى ئه‌‌وه‌‌ بڕه‌‌سنێد ك ئى كاره‌‌ ته‌‌نیا ئه‌‌راى رزق و رووزى نیه‌‌!  ئى باوه‌‌ڕه‌‌ وه‌‌ خه‌‌تیگ  فره‌‌جوان و ره‌‌ین له‌‌ بان دڵمان نویسایمنه‌‌ ك نه‌‌ ته‌‌نیا  له‌‌ به‌‌غدا به‌‌ڵكم له‌‌ هه‌ر شوونێگ ئى دنیا ئنسانه‌‌یل ناهومید و بى ده‌‌سڵات هانه‌‌ بان یه‌‌ك دین و ئایین و ئه‌‌وانه‌‌ى  خاس و خراو له‌‌ یه‌‌ك جیا ناكه‌‌ن چشتێگ نێرن تا بهه‌رزێ و سوود ئه‌‌راى مه‌‌ردم داشتوود!!

له‌‌و هه‌مگه‌‌ى بى عداله‌‌تیه‌‌یله‌‌ و ئه‌‌و هه‌مگه‌‌ى كار بى خاوه‌‌نه‌‌ ك به‌‌شمان دانه‌‌، ته‌‌نیا دڵخوه‌‌شى وه‌‌ گو‌زه‌‌یشته‌‌ چاره‌‌ى هیچ ده‌‌ردێگمان ناكا، ناچاریمن له‌‌ وه‌‌راوه‌‌ر ئاینده‌‌ و دنیاێگ ك تاو تاو ئاڵشته‌‌و بوود تواناییه‌‌یلمان زیاد بكه‌‌یمن و ئى كاریشه‌‌ ك (گوڵ سوو) ها له‌‌ شوونى ته‌‌نیا  وه‌‌ كارمه‌‌ندى وه‌‌ ده‌‌سى نه‌‌هاوردیمنه‌‌ به‌‌ڵكم  ئاڵشتكردن شیوه‌‌ى هویر و كارمان ئه‌‌وه‌‌  ئه‌‌خوازێ تا چه‌‌و نووڕستن داشتویمن و گووش ئه‌‌شنه‌‌فتن و هووش و فام هویره‌‌وكردن تا  شیاو ئه‌‌وه‌‌ بویمن ك ئاینده‌‌مان خاستر یا ماف  فیشتر داشتویمن بایه‌‌د هویر له‌‌ سه‌‌ركه‌‌فتن بكه‌‌یمن نه‌‌ تووڵه‌‌سه‌‌نن له‌‌ گوزیشته‌‌و ئمڕوومان..!