كورد فه‌یلى په‌نجا ساڵه خوه‌شى له‌لى بڕیاگه، دى به‌س نیه؟
جویر وڵاته‌یل داگیركه‌ر زوڵم ده‌رهه‌ق ملله‌ته‌یلى ناورده‌سه كار. ده‌وڵه‌ت عراق هه‌ر له‌وه‌خت دامه‌زراننى له‌سه‌ره‌تاى ساڵه‌یل بیس سه‌ده‌ى گوزه‌یشت و سه‌ره‌تاى حوكم پاشایه‌تى تاڕووژ ئمڕوو وه‌هویچ جووریگ یه‌كسانى و ژیانیگ یه‌كڕه‌نگ له‌ناونى چینه‌یلى ناته‌سه وجوود ته‌نیا دوچه‌وه‌كى و جیاوازى نه‌ود ك هه‌میشه له‌ڕه‌فتار ده‌سڵاتداره‌یل و حكوومه‌ته‌یل یه‌ك له‌شوون یه‌ك خوه‌ى دیه‌سه‌و. ملله‌ت كوردیش وه دریژایى ژیانى له‌گشت ملله‌ته‌یل تر تویش چه‌وسیان و ماڵویرانى هاتگه‌و بیجگه ئه‌وه‌ك خاكه‌گه‌ى به‌شبه‌شه‌و كریاگه له‌هه‌مان وه‌خت وه بیگانه‌و بى ناسنامه‌یش ته‌ماشا كریاگه.
له‌سه‌ره‌تاى كوده‌تاى به‌عسیه‌یل له‌ساڵه‌یل شه‌س سه‌ده‌ى وه‌رین چینیگ تر له‌چینه‌یل كوومه‌ڵگاى كورد زیاتر له‌گشت مه‌ردمانیگ تر كه‌فتنه وه‌ر زوڵم و سته‌م، رژیم به‌عس وه‌هویچ شیوه‌یگ ڕى نه‌یا كورده‌یل فه‌یلى ژیان ئاسووده‌و دویر له‌مه‌ترسى بووه‌نه سه‌ر، دوشمانیه‌تى پڕ له‌كینه‌ت خوه‌ى وه‌ل روڵه‌یل كورد فه‌یلى هاورده كار، برا له‌برا جیاوه كرد، دایگ له‌ڕوڵه ناهمى كرد، ده‌سكرده ته‌رفتوینكردن خیزانه‌یل فه‌یلى، مناڵیان له‌خوه‌ندن دویره‌و خست، جایه‌ڵ جوانه‌یلیان خسته زندان و دویاخریش له‌قه‌وه‌ره‌یل وه‌جه‌م بى سه‌رو شوونیان كرد، ك تائیسه‌یش نه ته‌رم نه‌هه‌واڵ یه‌كیگ له‌لیان نه‌ره‌سیه‌سه ده‌س خیزانى.
ئه‌وه‌ك هاته تویش ئى چین نیشتمان په‌روه‌ره كه‌م نه‌وى، هویچ مه‌ردمانیگ له‌ى دونیاى ده‌رینده‌یشته جویر كورده‌یل فه‌یلى گرفتار ده‌س زوڵم و كووچ وه‌پیكردن زووره‌ملى نه‌وى، باسكردن له‌ى باوه‌ته‌و ئه‌وه‌نه سه‌خت و دڵته‌زنه قه‌ڵه‌م نویسه‌ر تیه‌رێده له‌رزه.
ژیان ئاده‌میزاد وه‌ختى تیكه‌ڵ خوه‌شى نه‌ود دى تامى چه بوود؟ له‌وه‌رچه بژیه‌ید؟ چه‌نیگ چه‌وه‌ڕى؟ كورده‌یل فه‌یلى په‌نجا ساڵه خوه‌شى له‌لیان بڕیاگه، دى به‌س نیه؟ له‌ڕاسى ژیان له‌ى عراقه ئه‌ڵڵاجه‌ویه، كه‌س نیه‌زانیگ هه‌ق ها له‌كوورا! ئویشن هه‌ر زاڵمیگ زه‌واڵیگ دیرێد، وه‌لى عراق تازه‌و دیموكراسى و له‌شوون نیسان 2003 هه‌مان زوڵم له كورد فه‌یلى ئه‌كا، كى زه‌واڵیه؟ بڕیار دادگاى باڵاى تاوانه‌یل له 29/11/ 2010 وه ره‌سمى ده‌رهه‌ق كورده‌یل فه‌یلى ده‌رچى له‌باوه‌ت له‌ناوبردن وه‌جه‌م تا حكوومه‌ت ئه‌رك یاسایى و ده‌ستوورى خوه‌ى له‌ى باوه‌ته‌و جیوه‌جى بكا له‌وه‌ر خاتر لاوردن شوونه‌وار گشت زوڵم و زوور و بڕیاره‌یلیگ ك له‌سه‌رده‌م رژیم وه‌رین له‌بان ئى پیكهاته‌ى كورد ره‌سه‌نه چه‌سپیاو دویاى ئه‌وه‌یش ده‌ركردن حوكم له‌سێداره‌داین ده‌رهه‌ق وه‌تاوانباره‌یل ك حكوومه‌ت و په‌رله‌مان ئمزاى ره‌سمى له‌بان كیشه‌ى كورد فه‌یلى كردن و ئه‌وه بوى لژنه‌ى تایبه‌ت و نویسینگه‌ى تایبه‌تیش له‌ى باوه‌ته‌و ده‌رهه‌ق وه كورده‌یل فه‌یلى واز كریاو 14 پیشنیار له‌لایه‌ن لژنه‌وه پیشكه‌ش كریا ئه‌را مه‌سه‌له‌ى لاوردن شوونه‌وار ئه‌و بریاره‌یل كویه‌نه له‌بان فه‌یلیه‌یل و هاوردنه‌وه‌ى هه‌قه‌یل زه‌فتكریاگیان و جویر به‌شیگ له پیكهاته‌یل ملله‌ت عراق هه‌ق خوه‌یانه داواى هه‌قه‌یلیان بكه‌ن و ئاسووده بژیه‌ن، وه‌لى هیمان وژدانیگ پاك و بیگه‌رد نه‌كه‌فته‌سه خه‌م ئى چین ره‌سه‌نه ك هه‌وه‌جه وه‌پیان كریه‌ێدو تواناى ئه‌وه دیرن بار عراق وه‌ره‌و پیشكه‌فتن بووه‌ن له‌وه‌ختیگ چاره‌سه‌ر كیشه‌یلیان بكریه‌ێد.
جه‌ماڵ ئه‌ركه‌وازى
