كيشه‌ى راسكانى له‌ ‌خوه‌مانه‌

شفق نيوز

ئمجا بايه‌سه‌ ئى هووكاره‌يل كارئاسانيه‌ بدێده‌ هووكاريگ ئه‌را نه‌فوه‌رگرتن ئاكامه‌يل خاس له‌بان ئاست رووشنهويرى و زانستى ئه‌را خوه‌ندكاره‌يل و رووڵه‌يلمان له‌ گشت قوناغه‌يل خوه‌نين، وه‌لێ جى داخه‌ دوينيم له‌ ئاست نزميگ نه‌ف له‌لى وه‌رگيريه‌ێد له‌ زانست و رووشنهويرى گشتيانيش جى خوه‌شاڵى نيه‌و له‌يوا وه‌پيمان ئه‌كا بپرسيم ئايا كيشه‌گه‌ ها له‌ كوورا؟

راسه‌و ئه‌و بار ناسروشتيه‌ ك هاته‌سه‌ تويش وڵاته‌گه‌مان له‌ڕوى مه‌سه‌له‌ى ئاسايشى و ئابوورى و سياسى و كومه‌ڵايه‌تى كاريگه‌رى گه‌ورياگ هاورده‌سه‌ بان ئه‌ركه‌يل خوه‌ندكار و ده‌روينى و ئاست زانستيه‌گه‌ى، وه‌لێ له‌ هه‌مان وه‌خت جوور ئه‌وه‌گ ئاماژه‌ وه‌پى كرديم بڕ فريه‌يگ له‌ى هووكاره‌يل زانستيه‌ ك ئاسانه‌ ئه‌را گشتلايگ و له‌گشت بواره‌يل ئه‌وه‌سه‌ ك مامۆستاو خوه‌ندكاره‌يل ئه‌تويه‌نن بارنه‌ى كار و نه‌ف له‌ليان وه‌ربگرن وه‌خاتر به‌رزه‌وكردن ئاست زانستى و رووشنهويرى.

گشتمان زانيم ك هووكاره‌يل سه‌ره‌تايى په‌روه‌رده‌ ك مامۆستايه‌يلمان هاورديانه‌ى كار ئه‌را ده‌رسداين تا ئيسه‌يش له‌ناو مه‌ژگمان مه‌ندگه‌ و ته‌نانه‌ت ئه‌گه‌ر ده‌رسيگ وربگرتيايم گشت خوه‌ندكاره‌يل يه‌ك له‌ شوون يه‌ك خوه‌نستيايمه‌ى و دوباره‌يه‌و كرديايم وه‌ ده‌نگ به‌رز و له‌وانه‌يش له‌سال 1972 شيواز ئه‌و ده‌رسه‌يله‌ هيمان ها هويرمان.

له‌يرا ئه‌وه‌گ ئه‌خوازم باسى بكه‌م ئه‌وه‌سه‌ ك كيشه‌ راسكانيه‌گه‌ له‌ خوه‌مانه‌، مه‌ردم ئالشت بوينه‌و داهێنان و ده‌سپيشخه‌رى و ئاست دڵسووزى و كار و هه‌وڵ گشتى داوه‌زيه‌و ئى ئاكام خراوه‌سه‌ ك رووڵه‌يلمان ره‌سانه‌ ئى ئاست كه‌مه‌ له‌ رووشنهويرى گشتى و لاداين له‌ علم و ماريفه‌ت و پيشكه‌فتن راسكانى، ته‌نيا له‌ موبايل و حاسيبات نه‌ود ك له‌تى ته‌ماشاى گشت چشتيگ تازه‌ ئه‌كه‌ن و گشت چشتيگ له‌لى زانن و وه‌كارهاوردنيشى له‌ لايان وه‌شيوه‌ى فراوانيگه‌و ته‌نيا په‌ره‌داين وه‌ رووشنهويرى خوه‌يان و گشتى وه‌پى نازانن.

رائد ئه‌لهاشمى