ئاخ هه‌ڵمه‌كیش

شفق نيوز

له‌ماوه‌ى ژیانیان رویداگه‌و هاته‌سه‌ تویشیان. هه‌ر له‌وه‌ر ئه‌وه‌یش تویه‌نیم بویشیم زوورم ناڕه‌حه‌تى و ژانه‌یلیانیش په‌یوه‌ندى وه‌و رویداگه‌یل كویه‌ن ژیانیانه‌وه‌ دیریگ.

له‌ى باوه‌ته‌وه‌ له‌یرا خاستر ئه‌وه‌سه‌ بویشیم: ئه‌ى ئاده‌میزاد! تن ئه‌ڕا ئه‌وه‌ ناتیده‌سه‌ ئى دونیا تا ژیاند وه‌ خه‌مبارى بوه‌یده‌ سه‌ر، ئه‌وه‌ ته‌نیا هسیگه‌ ك جاروباریگ خوه‌د ده‌یده‌ى خوه‌د، ئنجا ئه‌گه‌ر بایگ و ناڕه‌حه‌تى و ئازاره‌یل خوه‌د وه‌ل ژیاندا بیلیده‌وه‌ ئه‌وه‌ بیگومان خه‌مبارى ڕوى له‌لید ئه‌كا. بیجگه‌ ئه‌وه‌یش ئه‌و خه‌مه‌یلیشه‌ ك له‌ناخ دڵه‌وه‌ كپه‌و بویه‌ له‌لاد هه‌ر وه‌لدا ژیه‌یگ ، چوینكه‌ شوونیگ تر شك نیه‌وه‌ن له‌تى بژیه‌ن ته‌نیا له‌و شوونه‌ نه‌وگ ك ڕى وه‌پیان داگه‌، ماناى ئه‌وه‌سه‌ ئه‌و خه‌میشه‌ تا ئه‌ڕاى بكریه‌یگ و له‌ تواناى بووگ هه‌ر ئازارد ئه‌دا.

وه‌ختیگیش نه‌تویه‌نید ئه‌و چشته‌ ئاشكرا بكه‌ید یا نیشانى به‌ید ك ئازارد ئه‌داو ناڕه‌حه‌تد كردگه‌، ئه‌وه‌ بیگومان ژاند زیاتره‌و بووگ و په‌ره‌ سینیگ و زیاتر ڕوى له‌له‌شد ئه‌كاو، ماناى ئه‌وه‌سه‌ تن ناڕه‌حه‌تى و ئازار فره‌یگ كیشید، چوینكه‌ ت كه‌سیگید باوه‌ڕیگ ناواقعى دیرید. تن ژان و ئازار ڕوى له‌لید ئه‌كا له‌وه‌ختیگ وه‌خشین نه‌یاشتوید و تواناى وه‌خشین له‌لاد كز بووگ.

بیگومان هویچ كه‌سیگ نیه‌ ئه‌وه‌نه‌ى ئه‌وانه‌ك لویتیان به‌رزه‌ یا موته‌كه‌برن خه‌مبار بوون، چوینكه‌ هه‌میشه‌ هان له‌و باوه‌ڕه‌ ك مه‌ردمان تر زه‌خمداریان كه‌ن له‌ئه‌نجام ئه‌و لویتبه‌رزى خوه‌یانه‌، هه‌ل ئه‌وه‌ر ئه‌وه‌یش تویه‌نیم بویشیم: له‌لاى ئى جووره‌ كه‌سه‌یلیگ ك لویتیان به‌رزه‌و مه‌رد وه‌ هویچ دانه‌ن، تام وه‌رگرتن وه‌ختیه‌و زوى چووگه‌ سه‌ر. وه‌ل ئه‌وه‌یشا هویچ كه‌سیگ ئه‌وه‌نه‌ى ئه‌وانه‌ هس وه‌ ناڕه‌حه‌تى و ئازار ناكه‌ن ك پشت وه‌ كه‌سه‌یل ده‌وروه‌ریان به‌سن، هه‌ر له‌وه‌ر ئه‌وه‌یش دوینید ئى جووره‌ كه‌سه‌یلیشه‌ نیه‌تویه‌نن خوه‌یان له‌ خه‌مه‌یلیان قورتار بكه‌ن و بچنه‌ ناو ژیانیگ پڕ له‌ ئاسووده‌یى و به‌خته‌وه‌رى ك وه‌ جووریگ متمانه‌ وه‌ خوه‌یان داشتوون.

له‌یرایش جویر ئامووژگارى یا نه‌سیحه‌تیگ خاستر ئه‌وه‌سه‌ بویشیم: ئه‌وه‌ك ڕوى ئه‌دا وه‌پى ڕازى به‌، نه‌ف له‌ده‌رسه‌یل گوزه‌یشته‌ى خوه‌د وه‌ربگر، خوه‌د له‌گشت ئه‌و چشته‌یله‌ قورتار بكه‌ ك رووژگاریگ زویتر له‌ده‌سیان دایده‌، خه‌مبارى و ئاخ هه‌ڵكیشان وه‌ هویچ شیوه‌یگ وه‌خت نیه‌ناسیگ ، ئازارداین و ژان و خوسه‌ تویه‌نن گشت ژیاند قویته‌و به‌ن، هویر له‌ گوزه‌یشت مه‌كه‌، ئه‌وه‌ك له‌ده‌سد چى خه‌م ئه‌ڕاى مه‌خوه‌، چوینكه‌ توانا نه‌یرید باریده‌وه‌ى.

 

وەرگێڕانی لە عەرەبییەوە/ فرمێسک مستەفا