شيوه‌كاريگ به‌هره‌مه‌ن له‌ خانه‌قين

شفق نيوز

دياره‌ ئی هونه‌رمه‌ند شيوه‌كاره‌ وه‌ خوه‌ندنگای "ريالیسم و ​​ئمپرسیونیسم Impressionism" كاريگه‌ر بويه‌و هه‌ر وه‌و خاتريشه‌ تابلۆی كاريگه‌ر نه‌خشه‌كيش كردگه‌و به‌هره‌و توانای هونه‌ری خوه‌ی له‌تی وه‌ جوانی ديه‌سه‌و.

هونه‌رمه‌ند شيوه‌كار"گۆران جه‌بار" له‌ ساڵ ١٩٦٨ له‌ شاره‌ جوانه‌گه‌ی خانه‌قين هاته‌سه‌ دونيا، له‌ساڵ ١٩٩٠ په‌يمانگای ته‌ندروستی ته‌مام كردگه‌.

گۆران جوور ئه‌وه‌ك خوه‌ی باس ئه‌كاو ئويشيد: سه‌ره‌تای ده‌س وه‌پيكردن كاره‌يلی هونه‌ريی چووده‌و ئه‌را وه‌رجه‌ ساڵ ١٩٨٥، وه‌لی ئاماژه‌ وه‌يه‌يش كردگه‌ ك له‌ساڵ ١٩٨٥ به‌هره‌ راسكانيه‌گه‌ی ده‌ركه‌فتگه‌.

ئی شيوه‌كار سه‌رڕشته‌دار هونه‌ريه‌ له‌ ساڵه‌يل ١٩٨٥ – ١٩٨٦ – ١٩٨٧ به‌شداری چه‌ن نمايشگايگ كردگه‌ له‌و خوه‌ندنگا ك له‌تی ده‌چگه‌و دويای ئه‌وه‌يش له‌ ساڵ ١٩٨٨ دو نمايشگای تايبه‌ت له‌ دياله‌ ساز كردگه‌ له‌و په‌يمانگا ك له‌تی خوه‌نين ته‌مام كردگه.

بيجگه‌ ئه‌وه‌يش له‌ ساڵ ١٩٨٩ نمايشگايگ تر ئه‌را نمايشكردن تابلۆيه‌يلی ساز كردگه‌و له‌ ساڵ ١٩٩٠ تا ٢٠٠٣ به‌شداری له‌ چه‌ن نمايشگايگ هاوبه‌ش كردگه‌ وه‌ل هونه‌رمه‌نده‌يل تر خانه‌قين و دياله‌و به‌غدا، وه‌ل ئه‌وه‌يشا له‌ ساڵ ٢٠٠١ تمايشگايگ تر له‌ پاريزگای ئه‌نبار ساز كردگه‌ وه‌ بوونه‌ی رووژ تالاسيمای جه‌هانی.‌

گۆران له‌ ساڵ ٢٠٠٣ يش وه‌ دوياوه‌ تا ئيسه‌ وه‌ شيوه‌يگ وه‌رده‌وام به‌شداری گشت ئه‌و نمايشگايه‌يل هاوبه‌شه‌ ئه‌كا ك له‌ كوردستان و به‌غدا ساز ئه‌كريه‌يدو بيجگه‌ ئه‌وه‌يش په‌يوه‌ندی وه‌رده‌واميگ ديريد وه‌ل هونه‌رمه‌نده‌يل هه‌رێم و عراق له‌ڕی به‌شداريكردنی له‌ نمايشگاو فيستيڤاڵه‌يل هونه‌ری و هه‌ر وه‌و خاتريشه‌ جوور ئه‌وه‌ك خوه‌ی باس ئه‌كا چه‌نه‌ها جار باوه‌ڕنامه‌ی ريز و حورمه‌ت له‌ چه‌ن ده‌زگاو لايه‌نه‌يليگ وه‌رگرتگه‌و ئيمه‌ له‌لايه‌ن خوه‌مانه‌و داوای سه‌ركه‌فتن و پيشكه‌فتن فيشتر ئه‌رای ئه‌كه‌يم.

جه‌ماڵ ئه‌ركه‌وازی