بوونه‌و رووژگار بى به‌زه‌یى

شفق نيوز

 

ئه‌وه‌ك ژان فیشتر ئه‌خاده‌ بان مه‌ویسیمان ئه‌ویش هه‌وڵ حاشاكردن یا كه‌مه‌وكردن كاره‌ساته‌گه‌یه‌ جوویر ئه‌وه‌ك ئى رویداگه‌یله‌ شیوازیگ له‌ ژیان رۆتینه‌و هویچ تازه‌گه‌رییگ له‌تى نییه‌. دى ئیچنه‌ وه‌پى هاتگه‌ هه‌واڵ كوشیان هاووڵاتى هویچ كاریگه‌رییگى نه‌مه‌ندگه‌و چشتیگ تریش له‌یه‌ تازه‌تر نییه‌!

مه‌سه‌له‌ى مه‌هانه‌و ڕفووكردن كاره‌گه‌یش وشه‌یلى ئاماده‌ كریاگه‌و هه‌ر رویداگیگ و وه‌ گووره‌ى حاڵه‌ته‌گه‌ى، دى نووڕید یاساشكانن ئاسایشى و دزین زانیارى و مه‌سه‌له‌ى گه‌ناته‌كارى ئدارى و داراییش كه‌فتگه‌سه‌و و جووریگ له‌ رویداگه‌یل تایفه‌گه‌رى و نه‌ته‌وه‌یى وه‌پیه‌و دیاره‌، ئمجا دوینید رووشنهویریه‌تیگ كه‌فتگه‌سه‌ ناو مه‌ردم و ئویشن وه‌ ئیمه‌ چه‌! یه‌یش له‌وارنوه‌ر ئه‌و رویداگ پڕ مه‌ترسیه‌ ك ئه‌یه‌یده‌ تویش هاوسا یا ره‌فیق یا رێوار. دى نووڕید تێر خواردیمنه‌ له‌ كرده‌وه‌ى تیرۆریستى ك رووشنهویر و كارگه‌ر و بازیزان و پیاو دینى و مناڵ و گه‌ورا گرێده‌ ئامانج، هه‌ر له‌وه‌ر ئه‌وه‌یش گشتمان منیمنه‌ به‌له‌م قورتاركه‌ر نه‌فره‌تكریاگ و جهادكاره‌یل گرنه‌ى ئامانج تا وه‌پى بچنه‌ به‌هه‌یشت واده‌ وه‌پیدریاگ.

ته‌نیا جیاوازییگ ئه‌وه‌سه‌ ك فه‌قیره‌یل كوشیه‌ن و سه‌ربڕیه‌ن و ده‌ركریه‌ن و سزا دریه‌ن وه‌بى تاوان و بى مقه‌یه‌تیكردن، وه‌لى ئه‌گه‌ر وه‌رپرسیگ تویش مه‌ترسى باید یه‌كسه‌ر هه‌واڵ قورتاربوینى بڵاوه‌و كریه‌ید و بووده‌ قسه‌وباس گشت و له‌وه‌ر خاتریشى پلانه‌یل ئاسایش ئاڵشت كریه‌ێد و ئۆتۆمۆبیله‌یلى ئاڵشت بوود و شماره‌ى پاسه‌وانه‌یلیشى فیشتره‌و بوود، هه‌ر له‌وه‌ر ئه‌وه‌یش دوینیم رووژ وه‌ڕووژ جیاوازى ناونى ملله‌ت و ده‌سڵات قویلتره‌و بوود.

ئه‌وسا بوونه‌و ڕێ وره‌سمه‌یلیگ بوى رێز و حورمه‌ت خوه‌ى داشت له‌لاى گشت پێكهاته‌و ره‌وت و جمشته‌یل دینى و نه‌ته‌وه‌یى، وه‌لى ئمڕوو حورمه‌ت هویچ چشتیگ ناگیریه‌ێدو تونڕه‌وى فكرى و باوه‌ڕ مه‌زه‌وى ره‌سیه‌سه‌ ئاسته‌یلیگ ك پیشبینى ئه‌وه‌ كردیایم بووده‌ به‌شیگ له‌ تاریخ سیه‌و بچوود و دى نایده‌و!.

ئمجا له‌ناونى ئى مه‌ویسیه‌، ئاده‌میزاد فه‌یلى چه‌ بكا ك دویر بوود له‌ مه‌یدانه‌گه‌و نه‌كه‌فێده‌ وه‌ر لوتف ده‌سڵات و پیاوه‌یلیان بیبه‌شن له‌ مه‌سه‌له‌ى ئمتیازات هاووڵاتیبوین و كیشه‌و دۆسیه‌یلیان كه‌فتگه‌سه‌ خانه‌ى گومبوین، ئایا چه‌ تویه‌نن ئه‌نجام بیه‌ن؟ ئایا تویه‌نن جیوه‌جى پرۆژه‌یگ بكه‌ن؟ له‌ڕاسى ئیمه‌ له‌ دووڵیگ ژیه‌یم و شماره‌و ئاماره‌یلیش له‌ دووڵیگ تر. دى گرنگ نییه‌ مه‌ردم گشتى له‌لیمان رازى بوون ئه‌وه‌نه‌ى ره‌زامه‌نى خوه‌مان له‌بان بار ئیسه‌ى ژیانمان،ئایا ئكتفا وه‌ ده‌سكه‌فته‌یل كردیمنه‌ ئه‌گه‌ر وجوود داشتوون؟!.

عه‌لى حسێن فه‌یلى

ج . أ