پرووژه‌ى رووشنهویرى

شفق نيوز

سه‌روه‌خوه‌ى و هویروڕاى ئازاد و فكره‌ى گشت لایه‌نى و قه‌بوولكردن جیاوازیه‌یل و پیشنیاركردن ژیان شارستانى و تاوتویكردن پرووژه‌یل ئاینده‌، گشت ئه‌یانه‌ مامڵه‌كردنیگ خاس و جددیانه‌س وه‌ل سه‌رده‌م و خودئاماده‌كردن ئه‌را دروسكردن په‌یوه‌ندییگ گشتگیر وه‌ دونیاى ئمڕوو.

ئمڕوو ناوه‌ند و پرووژه‌ى سه‌روه‌خوه‌یى دیارده‌یگ جه‌هانیه‌و ئاینده‌ى گشت ئه‌و فكره‌و هویره‌یل تازه‌ى دونیاسه‌. هه‌ر له‌وه‌ر ئه‌وه‌یش وه‌گشت هه‌ناسه‌یگه‌وه‌ تویه‌نیم بویشیم: ك كیشمه‌كیش شارستانیه‌یلیش ئه‌را خوه‌ى هه‌ڵگر هاوكارى دروسكردن په‌یوه‌ندى گشلایه‌نیه‌ له‌ناونى كومه‌ڵگایه‌یل جیاواز و نه‌ته‌وه‌یل جوراوجوور، هه‌ر وه‌خه‌مان شیوه‌ جه‌هانگیر یا عه‌وله‌مه‌یش ده‌رئه‌نجام ریككه‌فتن ئه‌و په‌یوه‌ندیه‌یله‌سه‌ له‌ڕوى رووشنهویرى و فه‌رهه‌نگى و  ئابوورى و سیاسیه‌وه‌.

ساڵانه‌ له‌ گشت جه‌هان سه‌ده‌ها هه‌زار گووڤار و كتاوه‌یل جوراوجوور وه‌ زووانه‌یل زنگ دونیا ده‌رچووگ و چووگه‌ خانه‌ى فه‌رهه‌نگ و جموجویل رووشنهویریه‌وه‌و تیكه‌ڵیش بوون وه‌ل دونیاى پیشكه‌فتن و دونیاى ئمڕووا, بیجگه‌ ئه‌وه‌یش كاریگه‌رى فره‌ گه‌ورایگیش له‌بان ئاست رووشنهویرى و فه‌رهه‌نگ و ژیارى یا حزارى و پیشكه‌فتن هیلنه‌جى. جه‌هانگیرییش ته‌نیا دیارده‌یگ نیه‌، به‌ڵكوو ڕیشگ و بنه‌ڕه‌تیگ تاریخى و ژیاریه‌ ئه‌را تیكڵاكردن دونیاو جه‌مه‌وكردن ئاسته‌یل جیاجیاى ژیارى و مه‌سه‌له‌ى گه‌ردوون ئه‌و سه‌رده‌مه‌ ك زویتر له‌لایان له‌یوا بویه‌ ك مه‌رزه‌یل دونیاو دیوار ناونى ده‌وڵه‌ته‌یل و زووان گفتوگوو جیاواز و فه‌رهه‌نگ جوراوجوور، دویرگرتن و داوڕیانیگ چوینایه‌تى فه‌رهه‌نگ و ژیارى نه‌ته‌وه‌یل جیاجیاس. یه‌یش ره‌سنیگه‌مانه‌ ئه‌و باوه‌ڕه‌ ك بایه‌سه‌ مه‌سه‌له‌گه‌ قه‌بوول بكه‌یم و گرنگى یا ئه‌همیه‌ت خاسیگ ئه‌ڕاى دابنه‌یم و بچیمنه‌ بندروس مه‌سه‌له‌گه‌. ئنجا له‌یرا تویه‌نیم بویشیم: ره‌سانن و چاپه‌مه‌نیه‌یل وه‌ گووڤار و كتاوه‌یل و ڕووژنامه‌وه‌ وه‌ڕاسى كاریگه‌ر بوون وه‌و پیشكه‌فتن گشتگیر ته‌كنۆلۆژیاو زانست و رووشنهویریه‌.

دیاره‌ هاوچه‌رخبوین به‌رهه‌مه‌یل فكرى و ئه‌ده‌بى و رووشنهویرى له‌ كار ئه‌ڵه‌وگه‌ردانن و ئاگادارى گشتگیرى له‌ جه‌هان وه‌ جه‌هانكردن زووان خوه‌مانه‌وه‌ بووگ، شایه‌ت ئه‌یه‌ ئه‌رك قورس و رووژیگ چه‌وه‌ڕیكریاگ داشتووگ، وه‌لى ئه‌گه‌ر زیایچگن نه‌وگ بووگ ئیمه‌ى كوردیش جاریگ تر وه‌ گامیگ تره‌وه‌ تیكه‌ڵ وه‌ دونیاى ئمڕوو و ئاست رووشنهویرى و فه‌رهه‌نگ جه‌هان بویمن، وه‌نا له‌ ویستگه‌ یا محه‌ته‌ى یه‌كه‌م شه‌مه‌نده‌فه‌ر تون جه‌هانگیرى وه‌ كووڵیگ بار سه‌خته‌وه‌ مینیمنه‌ جى و نیه‌ڕه‌سیمنه‌ تووماركردن تاریخ شارستانى خوه‌مان.

 

له‌یرا مه‌به‌س باسه‌گه‌ ئه‌وه‌سه‌ ك بایه‌سه‌ ئمڕوو له‌ئاست جه‌هان قسه‌ بكه‌یم له‌باوه‌ت رووشنهویرى و فه‌رهه‌نگ و ئه‌ده‌ب‌، بایه‌سه‌ وه‌ شیوه‌یگ له‌ پیشكه‌فتن بچیمنه‌ پیشوازى رووشنهویرى و گشت چاپه‌مه‌نیه‌یلمان كاریگه‌ر بوون. وه‌لى وه‌مه‌رجیگ كاریگه‌رى خاسیگ داشتوون له‌بان ئاست پیشكه‌فتن، چوینكه‌ پرووژه‌ى رووشنهویرى جویر ئه‌وه‌ك ئشاره‌ت وه‌پى كردیم دیارده‌یگ جه‌هانیه‌و تیكه‌ڵه‌ وه‌ل دونیاى سه‌رده‌ما، هه‌ر له‌وه‌ر ئه‌وه‌یش بایه‌سه‌ له‌لاى خوه‌مانیش وه‌ جددى هه‌وڵ وه‌ره‌ونوابردنى بدریه‌یگ.