هوير تونڕه‌وی له‌ خوه‌رهه‌ڵات ناوين

شفق نيوز

ئی قه‌يران تون وتيژيه‌ و سه‌رهه‌ڵداين و دروسبوين ئه‌و شماره‌ی فريه‌ی گرووپه‌يل ترۆريستی تونڕه‌وه‌يله‌ له‌وه‌خت و شوون جياجيا له‌ خوه‌رهه‌ڵات ناوين، فريه‌ جووره‌و ناكريه‌يد ته‌نيا له‌ ديد سياسی و ئابووريه‌و ته‌ماشا بكريه‌يدو له‌يه‌كه‌و بدريه‌يد، به‌ڵكوو كاريگه‌ری و شيه‌وكردن ئايينی و مه‌زه‌ويه‌يل ك سروشت چه‌سپياگ خوه‌رهه‌ڵات ناوينن كاريگه‌ری فريه‌ ديرن له‌ دروسبوين ئی هويره‌يل تون وتيژه‌.

من باوه‌ڕم ئه‌وه‌سه‌ ئايين هه‌ميشه‌ كاريگه‌ری و نه‌خش گرينگ داشتگه‌ له‌ هاوكيشه‌و كيشمه‌كيش و ناكووكيه‌يل سياسی خوه‌رهه‌ڵات ناوين، يه‌يش بيجگه‌ دروسبوين ئی هويره‌يل تونڕه‌ويه‌ له‌ ژير ناونيشان و فۆرم جياجيا ك له‌لايگه‌و شيه‌كردن جياواز ئايينی و مه‌زه‌وی كاريگه‌ری خوه‌ی ديريد و له‌لايگ تريشه‌و ناكريه‌يد نه‌خش و كاريگه‌ری وڵاته‌يل گه‌وراهيز دونيا له‌ی باره‌وه‌ فه‌رامووش بكريه‌يد ك ده‌سميه‌تده‌ر و هاوكارن ئه‌را دروسكردن له‌يوا گرووپه‌يليگ ترۆريستی له‌وه‌ر خاتر جيوه‌جيكردن سياسه‌ت و ئه‌جندای خوه‌يان له‌ خوه‌رهه‌ڵات ناوين وه‌ل مقه‌يه‌تيكردن و زيايكردن به‌رژه‌وه‌نديه‌يليان له‌ی ناوچه‌.

ئه‌را نموونه‌: دروسبوين ريكخرياگ ترۆريستی داعش جوور ريكخرياگيگ ترۆريستی تونڕه‌و ئه‌را بڕيگ له‌ليان مه‌ينه‌تی و ئه‌را بڕيگيانيش جی خوه‌شاڵی بوی، ئمجا له‌ڕاسی بايه‌سه‌ بپرسيم ك دروسكردن له‌يوا ريكخرياگيگ دروسكردن قه‌يرانيگ تر بوی له‌ خوه‌رهه‌ڵات ناوين؟ يا دروسكردن وه‌ربه‌سيگ بوی له‌وه‌رانوه‌ر باڵاده‌سی ئيران شيعه له‌ عراق و سوريا وه‌تايبه‌ت و خوه‌رهه‌ڵات ناوين وه‌گشتی و شكانن ئه‌و كه‌مه‌ر شيعه‌ ريگرتنه‌ له‌ فراوانبوينی؟

ئه‌وه‌ك ئاشكراو ديار بوی دويای دروسبوين ئی ريكخرياگه‌ بڕيگ لايه‌ن كار له‌بان ئه‌و ئه‌كه‌ن ك شيواز كاركردن ئی ريكخرياگه‌ ئاڵشت بكه‌ن و له‌ به‌رژه‌وه‌ندی خوه‌يان بارنه‌ی كار، وه‌لی ئه‌وه‌ك شايسته‌ی باسكردنه‌ ئه‌و روی وه‌ڕوی بوينه‌وه‌ی ئازايه‌تيه‌سه‌ ك هه‌ر له‌سه‌ره‌تای دروسبوين ئه‌و هوير تونڕه‌ويه‌يله‌ ملله‌ت كورد و پێشمه‌رگه‌يل قاره‌مانی وه‌رانوه‌ر هوير ئه‌و ريكخرياگ ترۆريستيه‌ خه‌بات ئه‌كه‌ن و تا ئمڕوويش وه‌رده‌وامن و كورد ئه‌را گشت جه‌هان چه‌سپانه‌ی ك نه‌ته‌وه‌يگ ئاشتيخوازه‌و له‌وه‌ر خاتر له‌يوا هوير ته‌نگ و تونڕه‌ويگ ئه‌وه‌ك له‌ده‌سی بايد دريغی ناكا، ئمجا ئی ريكخرياگه‌يله‌ له‌ژير هه‌ر ناونيشان وفۆرميگ بوون، ئه‌وه‌سه‌ له‌ حاڵ حازر كورد له‌ باشوور و خوه‌رئاوا سه‌نگه‌ر له‌ ريكخرياگ ترۆريستی داعش گرتگه‌و له‌ جيای گشت جه‌هان جه‌نگ له‌ناوبردن ئی هوير ناپوخته‌ ئه‌كا.

سيروان مينه‌خان

ج . أ