عراقيه‌يل ئه‌ووه‌رترن له‌ به‌شدارى جه‌شن سه‌روه‌خوه‌يى كوردستان

عه‌لى  حسێن فه‌يلى

شه‌فه‌ق نيوز/ كورد هويچ وه‌ختيگ وه‌ى ئاست گه‌ورا‌ ناو و خواست و سياسه‌تيگ له‌ مه‌يدانه‌يل ناوده‌وڵه‌تى نه‌ياشتگه‌و ئاشكرايشه‌ ك له‌ناونى فيشتر له‌ 100 پرووسه‌ێ ناودار راپرسێ له‌ هه‌ردوگ سه‌دێ 20 و 21يش راپرسييگ وه‌ێ رادێ فريه‌ حساسيه‌ته‌ نه‌ويه‌ جوور ئه‌وه‌گ ئيسه‌ روێ ئه‌ياد وه‌ل راپرسێ كوردستان و ده‌نگدانه‌وه‌ێ فريه‌ ئه‌راێ، ئويش له‌وه‌ر ئه‌وه‌گ گشتلا ئه‌زانن ك وه‌ سه‌روه‌خوه‌يى كورد خه‌ريته‌ێ سياسى ناوچه‌گه‌ تويش ئالشتكارێ گه‌وراێگ ئه‌دێ، هه‌ر له‌وه‌ر ئه‌وه‌يش سه‌خته‌ رێ وه‌ ئه‌نجامداينى وه‌ ئاسانى بدريه‌ێد وه‌و جووره‌گ پيشبينى ئه‌كريه‌ێد.

 

كورد ئاگادارن له‌وه وه‌خاتر ئه‌وه‌گ راپرسێ شه‌رعيه‌تيگ ناوده‌وڵه‌تى وه‌ربگرێد، بايه‌سه‌ حكومه‌ت عراقى ره‌زامه‌نى نيشان بيه‌ێد، ئمجا وه‌ل گشت ئه‌و هه‌مگه‌ هه‌وڵه‌يليشه‌، ئه‌نجومه‌ن نوێنه‌ره‌يل عراقى راپرسێ كوردستان ره‌ته‌و كرد، ك يه‌يش كيشه‌گه‌ قويلتره‌و كرد و گشت هه‌وڵه‌يليگ دايشتن و گفتگوو له‌ ناونى هه‌ولێر و به‌غدا سه‌ختتره‌و كرد.

 

له‌لايگه‌و راپرسێ كوردستان هووكار بوى له‌ گرده‌وكردن گشت لايه‌نه‌يل ناكووك له‌ جه‌هان له‌بان يه‌ك راێ و هه‌ر لايه‌نيگ قسه‌ێ خوه‌ێ داشت، ئه‌وه‌سه‌ ئيران و ئه‌مريكا گشت ناكووكيه‌يل و كيشمه‌كيشه‌يليان خستنه‌ كنار و يه‌كه‌و گرتن له‌بان زاڵبوين له‌بان راپرسێ، لايه‌نه‌يليگ هه‌ن ريككفه‌تنه‌ له‌بان راپرسێ له‌ ناوچه‌يل تر، وه‌لێ دژ وه‌ راپرسێ كوردستانن و ئويشنه‌ پيمان راپرسێ ماف خوه‌دانه‌ وه‌لێ وه‌خته‌گه‌ێ گونجياگ نيه‌، له‌لايگ تريشه‌و به‌شييگ تر هه‌ن جوور ئيران و توركيا و عراق هه‌ڕه‌شه‌ له‌ هه‌رێم ئه‌كه‌ن و ئويشن ماف ئه‌وه‌ نه‌يرين له‌ هه‌ر وه‌ختيگ ئه‌نجامى بيه‌ين.

 

هه‌رچه‌نى ك راپرسێ له‌وه‌ر خاتر ئعلانكردن جه‌نگيش نيه‌، به‌ڵكوو پرووسه‌يگ ژياريه‌ ئه‌را گوزارشكردن له‌ راێ، وه‌لێ جوور ئه‌وه‌گ ك دوينين ده‌وڵه‌ته‌يل هاوسا فيشتر له‌ عراق نگه‌رانن له‌ ئه‌نجامداين راپرسێ و هه‌ر ك واده‌ێ ئه‌نجامداينى نزيكه‌و بدێ هه‌ڕه‌شه‌يل فيشتره‌و بوون و مه‌رز بڕن.

 

له‌ سه‌ره‌تاێ ئعلانكردن له‌بان ئه‌نجامداين راپرسێ، قسه‌يليگ كه‌فته‌و له‌بان مه‌ترسيه‌يل، ئمجا وه‌ل نزيكه‌وبوين سه‌عات سفر راده‌ێ هه‌ڕه‌شه‌يل فيشتره‌و بوێن، زويتر ته‌نيا هوير له‌ ئابڵوقه‌ێ ئابوورێ كرديان، وه‌لێ ئيسه‌ ره‌سيه‌ راده‌ێ به‌سانن مه‌رز و ته‌نانه‌ت په‌لامار سه‌ربازێ و گشتيان وه‌و مه‌ينه‌تيه‌يل وه‌رينه‌ باسمان ئه‌كه‌ن ك هاته‌ تويش ملله‌ت كورد.

 

كورد ره‌سينه‌سه‌و له‌وه‌گ ئه‌كه‌فێده‌ ده‌سيان له‌ڕێ ئاشتى و گفتگوو فريه‌ خاستر و فيشتره‌ له‌وه‌گ وه‌ جه‌نگ ئه‌كه‌فێده‌ ده‌س، وه‌لێ سه‌بر كورد له‌ سه‌د ساڵ خويناوێ په‌ڕيه‌وه‌و مه‌ردمان تريش هيمان داواێ سه‌بر له‌ليمان ئه‌كه‌ن!! كورد رازيين وه‌ وساته‌و زه‌مانه‌ته‌يل ناوده‌وڵه‌تى، وه‌لێ هه‌ناى به‌غدا گوزارش له‌ ناڕه‌زايى ئه‌كا له‌بان ئه‌وه‌و ئويشيده‌ كورد هويچ هويچ مافيگ نه‌يرين! ئايا چ چشتيگ بكريه‌ێد؟

 

خوه‌يگرتن و سه‌بر كورد له‌ ئه‌وسا گشت تاوانه‌يليگ هاورده‌ تويشێ و چه‌وه‌ڕيكردنيان ئه‌را ماوه‌ێ سه‌د ساأ ئسپا ئه‌وه‌ ئه‌كا ئى بارودوخيشه‌ گوزه‌ر ئه‌كه‌ن، ئمجا ئى سه‌بريشه‌ هه‌مان سه‌بره‌و ئويشيد: ئه‌گه‌ر زه‌مانه‌ت پيشكه‌ش كريا ئه‌را ئه‌نجامداين راپرسێ و سه‌روه‌خوه‌يى ته‌نانه‌ت له‌ ئايده‌يش، ئه‌وه‌ كورد ئاماده‌س ئه‌را سه‌بر!! با يه‌يش له‌ هوير نه‌وه‌يم ك ئه‌گه‌ر راپرسێ له‌ واده‌ێ خوه‌يشى ئه‌نجام گرن يا ته‌نانه‌ت له‌ واده‌يگ تر، ئه‌وه‌ په‌يام كورد ره‌سيه‌سه‌ گشت جه‌هان وه‌ ئه‌وه‌گ ئوميده‌وارن مافه‌يليان وه‌ شيوه‌يگ فه‌رمى بارنه‌ ده‌س و گشت عراقيه‌يل به‌شدار بوون له‌ جه‌شن سه‌روه‌خوه‌يى كوردستان، له‌ وه‌رانوه‌ر ئه‌وه‌يش هاوسايى خاس و موحبه‌تيگ هه‌تاهه‌تايى وه‌ليانا دروس ئه‌كه‌يم.

 عه‌لى حسێن فه‌يلى