بڕیاریگ گرینگ

شفق نيوز

 

له‌ڕاسى هه‌رچه‌نى ئى بڕیار سعودیه‌ دویا كه‌فت و له‌وه‌خت خوه‌ى نه‌دریا، وه‌لى وه‌ل ئه‌وه‌یشا گرینگى خوه‌ى دیرید، چوینكه‌ له‌ وڵاتیگ جوور سعودیه‌ ده‌رچوود ك زوورم فریه‌ى موسڵمانه‌یل جه‌هان وه‌ مه‌رجه‌ع خوه‌یان زاننه‌ى.

گرینگى ئى بڕیاره‌ ته‌نیا له‌وه‌ نیه‌ ك ئه‌و ریكخریاگه‌یل ترۆریستیه‌ قه‌یه‌غه‌ كردگه‌، به‌ڵكوو ها له‌و بڕگه‌ ك ئویشید گشت ریكخریاگه‌یل هاوشیوه‌ى ئه‌وانه‌یش. یه‌یش ماناى فریه‌ گه‌ورایگ دیرید، چوینكه‌ دى وه‌گووره‌ى ئه‌و بڕیاره‌ تویه‌نریه‌ید گشت ئه‌و ریكخستنه‌یل هاوشیوه‌ بخریه‌یده‌ لیست قه‌یه‌غه‌كردن و یاساى ترۆر له‌بانى جیوه‌جى بكریه‌ید.

چوینكه‌ هه‌ر وه‌ گووره‌ى ئه‌و یاسایه‌یله‌ دى حزبوڵڵاى لوبنانیش چووده‌ لیست ئه‌و بڕیاره‌ جوور حزبه‌یل تر ئخوانیش كه‌ له‌ جه‌هان عه‌ره‌بى و ته‌نانه‌ت له‌ كوردستانیش ریشگ كوتانه‌و كه‌فنه‌ وه‌ر ئى بڕیاره‌و ئه‌وانیش چنه‌ لیست ترۆره‌و.

ئه‌یه‌ گام گه‌ورایگه‌ وه‌ره‌و پاكه‌وكردن مه‌یدان سیاسى وه‌تایبه‌ت له‌ خوه‌رهه‌ڵات ناوین و ژویه‌ر ئه‌فریقیا، چوینكه‌ ئه‌را ماوه‌یگه‌ رووژانه‌گرووپ ترۆریستى له‌ى ناوچه‌یله‌ په‌یا بوودو ده‌س ئه‌كه‌نه‌ چالاكى له‌ژیر په‌رده‌ى ئایین ئسلام.

ئیسه‌یش دى وه‌خت ئه‌وه‌ هاتگه‌ ك په‌رله‌مان كوردستانیش بڕیاریگ له‌و شیوه‌ وه‌ گووره‌ى یاسا ده‌ربكا ئه‌را قه‌یه‌غه‌كردن ئه‌و حزبه‌یله‌ ك هانه‌ بان هویر وباوه‌ڕ ترۆریسته‌یل.

ئه‌وه‌سه‌ خه‌ریكه‌ ریكخریاگ ترۆریستى داعش ك ناتویه‌نید وه‌ ته‌نیا بژیه‌ید، له‌ هه‌رێم كوردستان خه‌ریكه‌ چالاكى گیله‌شیونى و ترۆریستى خوه‌ى ئه‌خاده‌ جموجویل. گشت هه‌واڵ ده‌سگیركردن چه‌ن داعشیگ كوردیش له‌ هه‌ولێر ژنه‌فتیم ك ماناى ئه‌وه‌سه‌ خه‌ریك سه‌رهه‌ڵداین بوون له‌ هه‌رێم، وه‌لى گرینگ ئه‌وه‌سه‌ په‌رله‌مان خوه‌مانیش وه‌ بویرانه‌و بى هویره‌وكردن ئه‌و بڕیاره‌ بیه‌ید و ئه‌و حزبه‌یله‌و حزبه‌یل هاوڕه‌فتار و هاوڕیڕه‌و بخاده‌ لیست ترۆر تا دى كه‌س نه‌تویه‌نید له‌ژیر ناو جوراوجوور خوه‌ى بشاریده‌و. هویروڕاى ترۆریستى فریه‌ ئاشكراسه‌و دى ئیمه‌یش چه‌وه‌ڕى ده‌س و بازوو په‌رله‌مان ئه‌كه‌یم.

سه‌لام عه‌بدوڵڵا

ج . أ