ئه‌وانه‌ك كورد له‌ كورد دويره‌و خه‌ن

شفق نيوز

  خوداوه‌ند په‌روه‌ردگار له‌وه‌ختيگ ئاده‌ميزاد دروس كرد، گشت ياساو ده‌ستووريگ ئه‌ڕای وه‌ جوانی رازانه‌و تا بتويه‌نيد ژيان وه‌ شيوه‌ی خاسيگ وه‌پی بگوزه‌رنيد، هه‌ر له‌وه‌ر ئه‌وه‌يش ده‌ستوور خودايی چاره‌كه‌ر گشت كيشه‌و گرفتيگه‌ له‌بان بنه‌مای دروسيگ.

گشت ئاده‌ميزاد له‌ نه‌وه‌ی "ئاده‌م و حه‌وا"ن، گشتيشی له‌ خاك دروس كريانه‌و دويای ته‌واوبوين ئه‌و عومره‌ ك له‌لايه‌ن خوداوه‌ند ميهره‌بانه‌و ئه‌ڕاد دياری كرياگه‌، جاريگتر بويده‌ ئه‌و خاكه‌ ك له‌لی دروس كريايد، مانای ئه‌وه‌سه‌ له‌"خاك ئه‌را خاك"و هويچ جياوازييگيش نيه‌ له‌ناونی ئاده‌ميزاد له‌ڕوی دروسكردن و خولقاندنی، ته‌نيا ئه‌وه‌ نه‌ود ك وه‌گووره‌ی رووژگار نه‌ته‌وه‌يل جوراوجوور دروس بويه‌و زووان و داب و نه‌ريت ئی نه‌ته‌وه‌گه‌ له‌واكه‌ جياس.

به‌شيگيش له‌و جياييه‌ له‌ سوره‌ی ئه‌لحجه‌رات له‌ قورئان باس كرياگه‌ ك خودا له‌تی فه‌رمايش ئه‌كا((وجعلناكم شعوبا وقبائل لتعارفوا)). له‌يرا مه‌رام له‌ دروسكردن هووز و ملله‌ته‌يل جياجيا وه‌ گووره‌ی شيه‌وكردن زانايه‌يل و بڕيگ له‌ شيه‌وكه‌ره‌يل ئايينی ئه‌وه‌ ده‌ركه‌فت ك بنه‌چه‌ك و ريشگ ئی ملله‌ته‌يله‌ هه‌ر يه‌كيگه‌و ته‌نيا جياوازيه‌گه‌ی له‌ڕوی شماره‌و قه‌واره‌ی مه‌ردمه‌گه‌س، وه‌نا له‌ڕوی تايبه‌تمه‌ندی و خاسيه‌ته‌و هه‌ر جوور يه‌ك بوينه‌.

ئنجا له‌يرا باس له‌ مه‌سه‌له‌ی جياوازيكردن ئی سه‌رده‌مه‌ كه‌يم ك جيا له‌ سه‌رده‌مه‌يل تر ره‌نگه‌و داگه‌و شيوازيگ نازگتر وه‌ خوه‌يه‌و ديه‌، ئيمه‌ی كورد راسه‌ پيكهاتيمنه‌ له‌ ئايين و مه‌زه‌وه‌يل جياجيا، وه‌لی گشتمان جوور يه‌ك سه‌ر وه‌ يه‌ك نه‌ته‌وه‌يم و ناسنامه‌مان زووان كوردیه‌ وه‌ شيوه‌زار جياجيا، ك يه‌يش له‌ناو گشت نه‌ته‌وه‌يگ وجوود ديريد.

جی داخه‌ ئمڕوو مه‌ردمان فريه‌يگ هه‌ن وه‌ ئاشكرا جياوازی له‌ناونی پيكهاته‌يل كورد كه‌ن و ئاقبه‌ت ئی كاريشه‌ وه‌ره‌و خراوی مل نه‌يد، چوينكه‌ هه‌ر كه‌سيگ سه‌ر وه‌ هه‌ر نه‌ته‌وه‌يگ بوود مه‌حاڵه‌ كه‌سه‌يل تر سه‌ر وه‌ هه‌مان نه‌ته‌وه‌ بتويه‌نن زووان و ناسنامه‌ی كوره‌و بكه‌ن، هه‌ر له‌وه‌ر ئه‌وه‌يش هويچ هيزيگ نيه‌ له‌ دونيا ره‌گه‌ز نه‌ته‌وايه‌تی له‌ ريشه‌ بكه‌نيد.

ئنجا له‌يرا ئه‌گه‌ر وه‌ گووره‌ی ده‌ستوور خودايی بوود يا ده‌ستوور نه‌ته‌وه‌يی، ئه‌وه‌ بيگومان ئی نه‌ته‌وه‌ی ئيمه‌ ته‌نيا موڵك كه‌سه‌يليگ نيه‌ ك هه‌ر خوه‌يان وه‌ كورد زانن و مه‌ردم تر سه‌ر وه‌ هه‌مان نه‌ته‌وه‌گه‌ وه‌ بيگانه‌و ناكه‌س ده‌نه‌ قه‌ڵه‌م.

فره‌جار قسه‌ قسه‌يليگ ژنه‌فيم له‌ده‌م ئه‌ی و ئه‌و، ك وه‌ ڕاسی مايه‌ی شه‌رمه‌زای و شووره‌ييه‌، چوينكه‌ هوير له‌وه‌ ناكه‌ن كورد هه‌ر يه‌كيگه‌ له‌ هه‌ر شوونيگ بوود له‌بان ئی گووشه‌ی زه‌ويه‌، وه‌لی قه‌ده‌ر له‌يوا كرد خاكی داگير بكريه‌يدو شماره‌ی فريه‌يگ له‌ليان له‌ گووشه‌ی شاره‌يل و له‌ غوربه‌ت بژيه‌ن و بنه‌و باوان خوه‌يان بيلنه‌جی و بڕيگيش له‌لی كووچ زووره‌ملی وه‌پی كرياو بڕيگيشی ئاواره‌ی شوونه‌يل تر كريان.

گرده‌وبوين كورد له‌ ده‌ور يه‌كتری مانای ره‌سينه‌ وه‌ ئاره‌زوو، ره‌سينه‌ وه‌ ئاسووده‌يی و سه‌روه‌خوه‌يی، ره‌سينه‌ وه‌ هه‌قه‌يل ره‌وا، وه‌لی جی داخه‌ نوڕيد ئه‌ياكه‌ دگان وه‌ ئه‌واكه‌ نيه‌نه‌يد و ئه‌واكه‌يش هه‌ر ها له‌هوير شكه‌ست ئه‌ياكه‌!!

جارجاريگ له‌ ده‌م كه‌سه‌يليگ كورد خوه‌مانی ژنه‌فم ئويشن فڵان پيكهاته‌ له‌ فڵان مه‌زه‌وه‌، يا سه‌ر وه‌ فڵان ئايينه‌، يا خه‌ڵك فڵان ناوچه‌س، ئنجا ئايا ئه‌گه‌ر گشت ئه‌يانه‌ له‌ژير له‌ يه‌ك ناسنامه‌ جه‌ميانه‌و بكه‌يد بوونه‌ چه‌؟ له‌ كام نه‌ته‌وه‌ن؟ ئه‌ی مه‌گه‌ر كورد نين و زووانيان كورديه،‌ ئه‌ی ئی هه‌مگه‌ جياوازيكردن و دويره‌وخستنه‌ ئه‌را؟ ئايا له‌وه‌رچه‌ گشتمان جوور يه‌ك وه‌رگری له‌ هه‌قه‌يل زه‌فتكرياگمان نه‌كه‌يم؟ ئه‌ی ئه‌راچه‌ من ئيوه‌ كورد زانم، وه‌لی ئيوه‌ من كورد نيه‌ينه‌ قه‌لَه‌م و جوور كورديگ له‌ نه‌ته‌وه‌ی كورد نيه‌ناسينه‌م؟ ئه‌راچه‌ بايه‌سه‌ له‌ خاڵه‌يل وشكانن"سه‌يته‌ره‌" وه‌ گومانه‌و ته‌ماشا بكريه‌م، جياوازی ناونی به‌يره‌يی و جه‌سانی و خانه‌قينی و مه‌نده‌لاوی و بازيانی و ده‌ربه‌نيخانی و سۆرانی و دهۆكی و بادينانی چه‌س؟ مه‌گه‌ر گشتمان هاوزه‌خم و هاو ده‌رد نييم، مه‌گه‌ر گشتمان روڵه‌يلمان نه‌ويه‌‌ قوربان ئی خاك و نيشتمانه‌؟ دی له‌يه‌ فيشتر چه‌ بويشم ئه‌را ئه‌وانه‌ك كورد له‌ كورد دويره‌و خه‌ن و ته‌نيا له‌وه‌خت هه‌وه‌جه‌ هويريان كه‌ن!!

جه‌ماڵ ئه‌ركه‌وازی