حكوومه‌ت تازه‌ى عراق له‌ساڵ تازه‌

شفق نيوز

وڵاته‌یل عه‌ره‌بى و هه‌رێمى سه‌ركرده‌یل عراق نه‌ڕه‌سینه‌ ئه‌نجام و چاره‌سه‌ریگ  له‌باوه‌ت دامه‌زرانن و ئاشكراكردن حكوومه‌ت تازه‌، تا ئه‌وه‌ بوى دویاخر ده‌سپیشخه‌رى یا موبادره‌و هه‌وڵه‌ دبلۆماسیه‌گه‌ى سه‌رۆك هه‌رێم كوردستان كاك مه‌سعود بارزانى ئه‌نجام خه‌یریگ  له‌لى كه‌فته‌وه‌و دانیشتنیگ  وه‌رفراوان ئه‌را گشت لایه‌نه‌یل له‌ هه‌ولێر پایته‌خت كوردستان ئه‌نجام داو بویه‌ مایه‌ى ئه‌وه‌ك كووتایى وه‌و كیشمه‌كیشه‌ باریگ  له‌باوه‌ت چوینیه‌تى ره‌فتار و هه‌ڵسووكه‌فت و یه‌كلاكردنه‌وه‌ى وه‌زعه‌گه‌و په‌ڕینه‌وه‌ له‌قوناغ سه‌ختیگ  ئه‌را قوناغ ئارامى و دامه‌زرانن حكوومه‌ت. وه‌لى ئایا حكوومه‌ت تازه‌ له‌ساڵ تازه‌ ریڕه‌و خوه‌ى ئاڵشت ئه‌كا وه‌ره‌و پیشكه‌فتن و خزمه‌تگوزارى و ڕازیكردن گشت پیكهاته‌و چینه‌یل كوومه‌ڵگا، ك وه‌خته‌یل فره‌یگ  چه‌وه‌ڕى حكوومه‌تیگ  خزمه‌توگوزارى و راسه‌قینه‌ كه‌ن بایگه‌ ته‌نگیانه‌وه‌و گشت كه‌م و كوڕیه‌یلیان چاره‌سه‌ر بكا، یا هه‌ر قه‌وانه‌گه‌ى جارانه‌و هویچ تر؟

نزیكه‌ى هه‌یشت ساڵه‌ له‌عومر هاووڵاتیه‌یل وه‌ سه‌ختى گوزه‌ریگ  و ڕووژ وه‌ ڕووژ هانه‌ ته‌ماى ئه‌وه‌ك جویر ملله‌ته‌یل تر دونیا وه‌بى گرفت و كیشمه‌كیش بژیه‌ن و وڵاته‌گه‌یان له‌ڕوى پیشكه‌فتن و خزمه‌تگوزرایه‌وه‌ گام خاسیگ  بنه‌یگ  و ملله‌تیش ئاسووده‌و سه‌رفراز بوون و مه‌ردم بیتاوان ڕوى وه‌ڕوى ته‌قینه‌وه‌و كار تیرۆرستى نه‌ونه‌وه‌، هه‌ر له‌وه‌ر ئه‌وه‌یش دویا ئومید و ئاره‌زووه‌یلیان دامه‌زرانن حكوومه‌تیگ  راسه‌قینه‌و خه‌مخوه‌ر بوى ك بتویه‌نیگ  گشت ناكووكیه‌یل بنبڕ بكاو ده‌س ئاوه‌دانى و بنیاتناین شوونه‌واره‌یل ماڵویرانى دریژه‌و بكاو خوه‌شى بخه‌یگه‌ دڵ ملله‌ت.

ئمڕوو ملله‌ت عراق هه‌وه‌جه‌ وه‌یه‌كسانى و ته‌بایى و ژیان هاوبه‌ش دیرن، ك یه‌یش ئه‌رك حكوومه‌ت تازه‌س بتویه‌نیگ  وه‌ ئه‌قڵ حه‌كیمانه‌ى خوه‌ى ڕه‌فتار بكاو گشت تایفه‌و چینه‌یل كوومه‌ڵگا له‌بان یه‌ك سفره‌ گرده‌و بكاو ئاشتى و دووسى بخه‌یگه‌ ناونیان، چوینكه‌ ئى جووره‌ كاریگ  سه‌ركه‌فتنه‌ ئه‌را گشت لایگ  وه‌تایبه‌ت ئه‌را وه‌رده‌وامى ئه‌نجامداین كاره‌یل حكوومه‌ت وه‌بى كیشه‌و گرفت. وه‌ل ئه‌وه‌یشا حكوومه‌ت تازه‌ بایه‌سه‌ له‌بانى ئه‌ركه‌یل خوه‌ى وه‌جوانى ئه‌نجام به‌یگ  و نزیكترین په‌یوه‌ندى وه‌ل هاووڵاتیه‌یلیا باریگه‌ كار و بزانیگ  له‌وه‌رچه‌ فره‌یگ  له‌ ملله‌ت عراق بیزار و ناڕه‌حه‌ت بوین له‌ى دویاخره‌و ئومیدیان وه‌ حكوومه‌ت و سه‌ركرده‌یل نه‌مه‌ندو ناڕه‌زایى نیشاندان، گشت ئى چشته‌یله‌ بایه‌سه‌ له‌لایه‌ن حكوومه‌ت تازه‌وه‌ بخریه‌یگه‌ وه‌ر تاوتویكردن و شیه‌وكردن و دویاخریش ئه‌نجام كه‌م وكوڕیه‌یل به‌یگ  و نه‌یلیگ  زه‌نگى بزڕیه‌یگ . چوینكه‌ هاووڵاتى عراقى هه‌ق خوه‌یه‌ دویاى ئى هه‌مگه‌ سه‌بركردن و به‌دبه‌ختیه‌ بگه‌ردیگه‌ شوون ئاسووده‌یى و ئاوه‌دانى و به‌خته‌وه‌رى.

بیگومان تویه‌نیم بویشیم هه‌ر كیشه‌و گرفتیگ  له‌ناو كوومه‌ڵگا له‌به‌ند هه‌فتم و هه‌رچى قه‌رز ده‌وڵه‌ته‌یله‌ سه‌ختتره‌، هه‌ر له‌وه‌ر ئه‌وه‌یش داواكارى ملله‌ت له‌ حكوومه‌ت تازه‌ ئه‌وه‌سه‌ گویڕانكارى و پیشكه‌فتن و خزمه‌تگوزارى له‌ كارنامه‌ى بچه‌سپنیگ.