جه‌نگ جه‌هانى بويچگ و داواكارێ گه‌وراێ كورد

عه‌لى  حسێن فه‌يلى

شه‌فه‌ق نيوز/ جه‌هان ها ليوار جه‌نگ تر گه‌ورايگ له‌بان روێوه‌ر بويچگيگ و كورديش رووژگاريگه‌ تويش وه‌ موسيبه‌تيگ هاتنه‌ خوه‌ێ له‌وه‌ دوينێده‌و ك كۆمه‌ڵگاى ناوده‌وڵه‌تى گرينگى وه‌ خواسته‌يليان نايه‌ێد، ئه‌ويش وه‌ ئه‌وه‌گ ماف ملله‌ته‌يل سته‌مديده‌ له‌لايان نه‌دوينرياگه‌، ك جى داخه‌ هه‌رچه‌نى هاواريان ئه‌ياد له‌ مه‌سه‌له‌ێ په‌يوه‌س وه‌ مافه‌يل ئاده‌ميزاد، وه‌لێ ملله‌ته‌يل زوڵمليكرياێ هيمان ناڵنێد له‌ژير بار قورس وه‌خاتر وه‌ده‌سهاوردن سه‌روه‌خوه‌يى و ده‌سه‌وه‌ركردن مافه‌يلێ و له‌يوا له‌ ئه‌ركه‌يلێ هات موجازفه‌ بكا و روێ وه‌ڕوێ مه‌ترسه‌يل فره‌يگ بدێده‌و وه‌ بوونه‌ێ په‌يوه‌سبوێن چه‌ك و به‌رژه‌وه‌نديه‌يل، ك ئى ده‌رفه‌تيشه‌ له‌يوا ئه‌كاده‌ ريكخرياگه‌يل ديكتاتۆرێ داواكارێ ملله‌ته‌يل وه‌ تون وتيژى له‌بان ئاشتى چاره‌سه‌ر بكه‌ن. ئمجا مه‌حاڵه‌ت هه‌ر ملله‌تيگ تويش شۆك و دڵته‌نگى وه‌ختى ناێد هه‌ناێ ك داواكاريه‌گه‌ێ تويش ره‌ته‌وكردن ئه‌ياد له‌لايه‌ن كۆمه‌ڵگاى ناوده‌وڵه‌تيه‌و، هووكاره‌يليش فريه‌ن و خواست نيه‌ گشتى له‌ئاكام خوه‌نينه‌وه‌ێ هه‌ڵه‌و نه‌زانين سه‌ركرده‌يل ئه‌و ملله‌ته‌يله‌ يا جمشته‌يل رزگاريخوازه‌ بدێ و نموونه‌يش ئه‌را ئه‌وه‌‌:

 

نوڕستن هه‌ڵه‌ ئه‌را كۆمه‌ڵگاى سه‌رده‌م ك پڕ له‌ ريژيمه‌يل ئنتهازێ و ديكتاتۆرێ هويچ باوه‌ڕيگ وه‌ خواست و مافه‌يل ملله‌ته‌يل تر نه‌يرێد و ريه‌يل هويره‌وكردن ئى حكومه‌ته‌يليشه‌ له‌يوا ده‌ركه‌فێد جوور ئه‌وه‌گ بويشێد نيشانه‌يگ و ده‌ڵاڵه‌ت سياسيه‌و مافه‌يل ئاده‌ميزاديش تايبه‌ت وه‌پى له‌وه‌ ته‌واو ئه‌دێ ك هه‌ر ملله‌تيگ ناچار بدێ له‌بان سه‌رنه‌چه‌مانن و خود وه‌ده‌سه‌و نه‌داين، جوور ئه‌وه‌گ هيزه‌يل جه‌هانى و هه‌رێمى ئه‌نجامێ دان له‌بان كورد و باقى ملله‌ته‌يل تر زوڵمليكرياێ، ئمجا وه‌ جواو نه‌دانه‌وه‌ى خواسته‌يليانيش وه‌ره‌و دڵته‌نگى پاڵ نريه‌ن و له‌شوون دڵته‌نگييش به‌رنامه‌ێ تايبه‌تيان له‌بانيان چه‌سپنن.

 

هه‌ڵه‌يشه‌ ك بويشيه‌ێد كورد له‌ عراق له‌شوون راپرسى وه‌ بوونه‌ێ سياسه‌ته‌يليان و فشاره‌يل به‌غدا تويش قه‌يرانه‌يل هاتنه‌، به‌ڵكوو هووكاره‌گه‌ ئه‌چێده‌و ئه‌را جيوه‌جيكردن سياسه‌ته‌يليگ ك به‌غدا دژ وه‌ كورد له‌بانى مودمن بويه‌.

 

ئه‌گه‌ر به‌رژه‌وه‌نديه‌يل ئابوورى پێوه‌ريگ سه‌ره‌كێ بوياتاد ئه‌را سه‌روه‌خوه‌يى هه‌ر ملله‌تيگ، ئه‌وه‌ شايه‌ت ئه‌وه‌گ كورد ديرێده‌ى ناڕه‌سێده‌ ئه‌و پله‌ بخاده‌يانه‌ ڕزه‌يل يه‌كه‌مين، ئمجا دووسايه‌تييان وه‌ل ده‌وڵه‌ته‌يل بويچگ له‌وه‌ ئاكام ئه‌گرێد ك له‌لى ئه‌خوازنه‌ێ و ئامانجيانيش شارياگ نيه‌ له‌لاى كه‌س جوور ئه‌وه‌گ روێدا هه‌ناى ك هه‌وه‌جه‌ وه‌ كورد داشتن ئه‌را قورتاربوين له‌ ترۆر له‌ ناوچه‌گه‌.

 

كۆمه‌ڵگاى ناوده‌وڵه‌تى وه‌شيوه‌ێ ئاشكرايگ ئسپات ئه‌وه‌ كرد ك له‌و قوناغه‌ لايه‌نگر زينگه‌وكردن مافه‌يل نه‌ته‌وه‌يى ملله‌تتمان بوێ، وه‌لێ دوياخر مناى داواكارێ ئه‌و مافه‌يله‌ كرد، وه‌لحاسڵ يه‌يش پلانى بوێ و جوور خوه‌ێ په‌سه‌ن نه‌وێ. تاوه‌ختيگيش ملله‌ته‌يل له‌ى سه‌ختيه‌ گوزه‌ر بكه‌ن ك خوه‌ى له‌تى له‌ جه‌نگيگ جه‌هانى بويچگ دوينێده‌و له‌ ناوچه‌گه‌، زه‌حمه‌ته‌ ئه‌و ده‌وڵه‌ته‌يله‌ گرينگى بينه‌ داواكاريه‌يل گه‌وراى كورد! ئيمه‌يش دڵنيايم له‌وه‌گ دونيا ئاڵشت ئه‌دێ، وه‌لێ ئه‌قڵيه‌ت ده‌وڵه‌ته‌يل ناوچه‌گه‌ ك دژ مافه‌يلمان و نه‌ته‌وه‌يل تر هاوشيوه‌مانن ئاڵشت نادێ، كيشه‌گه‌يش ها له‌ورا ئيمه‌ هاوساێ ئه‌و ئه‌قڵياته‌يليمنه‌ و ژيه‌يم وه‌ليا، وه‌ل ئه‌وه‌يشا گه‌وراهيزه‌يليش وه‌ بوونه‌ێ كاريگه‌رى به‌رژه‌وه‌نديه‌يل سياسى و ئابوورى هه‌ميش وه‌ په‌يوه‌ندێ نادووسانه‌يگ وه‌ل زوڵمليكرياگه‌يل مينن، ئمجا ملله‌ته‌يل و ده‌وڵه‌ته‌يل ناسه‌روه‌خويى ك ئاهه‌نگ ئه‌را‌ جه‌شن نيشمانى ساز ئه‌كه‌ن و شانازى وه‌و رووژه‌ ئه‌كه‌ن ئشاره‌ێ سه‌وزيگ وه‌و مافه‌ نايه‌نه‌ ملله‌ت سته‌مديده‌، ك وه‌كورتى و له‌ دره‌وازه‌ێ نه‌وين چاره‌سه‌ر كورد باوه‌ڕ وه‌ ئه‌وه‌ نه‌يرێد روێ له‌ جه‌هان ده‌ره‌كى بكه‌ن ئه‌را چاره‌سه‌ر كيشه‌يليان، ئه‌را نموونه‌ به‌غدا له‌ وه‌رده‌وامى زوڵمكردن سياسى و ره‌گه‌زێ خوه‌ێ ده‌رهه‌ق وه‌ نه‌ته‌وه‌گه‌مان پاشگه‌زه‌و نادێ.

 

نيشانه‌يش ئه‌را ئه‌وه‌، رژيمه‌يل سياسى له‌ به‌غدا وه‌رده‌وام هه‌وه‌جه‌ وه‌ جيوه‌جيكردن سياسه‌ت هه‌ڵه‌يان داشتن ئه‌را تومه‌ت و دوشمنه‌يل ئاماده‌يگ ك كورد بوێ له‌لاێ، وه‌ى جووريشه‌ بايه‌سه‌ له‌بان كورد ديد و سياسه‌تيان ئاڵشت بكه‌ن و ئه‌زموون شكه‌ست و زوڵم بخه‌نه‌ ناو دوسيه‌ێ ئه‌زموونه‌يل و له‌ داواكاريه‌يل ره‌واو گه‌ورايان بويچگه‌و نه‌كه‌ن له‌ جه‌نگ ئاينده‌ ئه‌را به‌رژه‌وه‌ندى گه‌وراهيزه‌يل و گوزه‌ر بكه‌ن له‌ دوباره‌ پيشكه‌شكردن قوربانيه‌يل بى ئاكام.

عه‌لى حسێن فه‌يلى