وه‌كاربردن وشه‌یل بیگانه‌ له‌نویسانن كوردى

شفق نيوز

له‌و باوه‌ڕه‌ نییم هویچ نه‌ته‌وه‌یگیش حاشا له‌وجوود زووان خوه‌ى بكا، زووانیش ناسنامه‌ى هه‌ر ملله‌ت و نه‌ته‌وه‌یگه‌ وه‌رجه‌ ئه‌وه‌ك جوور كلتووریگ تاریفى بكه‌یم، ئنجا كه‌سیگ ئه‌گه‌ر نه‌گبه‌تى ڕیشى نه‌گریگ  له‌وه‌رچه‌ بایه‌سه‌ هه‌وڵ و ته‌قلاى له‌ناوبردن زووان و كلتووریگ به‌ێد ك وه‌پیه‌و ناسریه‌ید!! جى داخه‌ ئمڕوو سه‌ر بكیشه‌ ناو هه‌ر گووڤار و رووژنامه‌یگ فره‌یگ له‌ نویسه‌ره‌یل كوردمان له‌جیاى ئه‌وه‌ك وشه‌یل كوردى وه‌ پاك وپرچ بارنه‌ كار له‌باوه‌ته‌یلیان، دوینید وشه‌یل بیگانه‌ پڕ كردنه‌ له‌ نویساننه‌یلیان.

راسه‌ زانستن و په‌یبردن وه‌ زووانه‌یل تر بیگانه‌ جووریگه‌ له‌ پیشكه‌فتن ئه‌قڵى و جوور چه‌كیگه‌ له‌وه‌خت ته‌نگى یا چراخیگه‌ ئه‌را تیه‌ریكى یا جویر ئه‌وه‌ك عه‌ره‌ب ئویشێد"من عرف لغه‌ قوم امن شرهم"، وه‌لى ئه‌یه‌ رووشنهویرى نیه‌ له‌جیاى وشه‌ى كوردى باریده‌ى كار و كوردیه‌گه‌ بخه‌یده‌ چاڵ!

ئه‌را نموونه‌: فره‌جار دوینیم وشه‌ى پرێنسیپPrincipal ئه‌یه‌رنه‌ كار، شایه‌ت فره‌یگ له‌خوه‌نه‌واره‌یل نه‌زانن ماناى ئى وشه‌ چه‌س، ك وه‌ماناى بنه‌ما ئه‌یه‌ێد، نووڕید ماناگه‌یشى ئاشكرا ناكه‌ن تا خوه‌نه‌وار له‌لى بڕه‌سێده‌و یا دوینید دویاخر له‌كووتایى باوه‌ته‌گه‌ شیه‌و نه‌كریاگه‌ له‌وه‌ر خاتر فامستن زیاتر. بیگومان یه‌یش مایه‌ى ره‌خنه‌ گرتنه‌ له‌و نویسه‌ره‌یله‌ ك ئى جووره‌ پیشبینیه‌یله‌ پشتگووش خه‌ن له‌وه‌ر هه‌ر هووكاریگ بوود. جار له‌یوا هه‌س له‌وه‌ر خاتر وشه‌یگ بایه‌سه‌ فه‌رهه‌نگ تایبه‌ت وه‌كار بارید تا بتویه‌نید له‌مه‌رام باوه‌ته‌گه‌ بڕه‌سیده‌و ، چوینكه‌ فره‌جار جوور هه‌ڵه‌ڕزگه‌ وشه‌یل فره‌یگ بیگانه‌ له‌ناو ته‌نیا باوه‌تیگ وه‌كار بریاگه‌و ڕى سه‌ختیگ خسته‌سه‌ وه‌رده‌مدو بایه‌سه‌ بوڕیده‌ى، هه‌ر له‌وه‌ر ئه‌وه‌یش جار له‌یوا هه‌س بیتاقه‌ت ئه‌و كه‌سه‌ ئه‌كا ك خوه‌نیده‌ى و ناچاره‌ واز له‌خوه‌نستنى بارید.

وه‌ هه‌ر حاڵ ئومیده‌واریم له‌گشت نویسه‌ره‌یل كوردمان یه‌كه‌مجار مقه‌یه‌تى له‌وشه‌یل ره‌سه‌ن كوردى خوه‌مان بكه‌ن و دویاخر هه‌ر وشه‌یگ بیگانه‌یش هاوردنه‌ كار یه‌كه‌مجار وشه‌ كوردیه‌گه‌ بخه‌نه‌ نواى وشه‌ بیگانه‌گه‌ یا له‌ناو دو كه‌وان بنویسننه‌ى وه‌مه‌رجیگ  كوردیه‌گه‌ له‌كیس نه‌دریه‌ى.

ئه‌گه‌ریش بخوازیم مینه‌ى رووشنهویرى بكه‌یم، سه‌ره‌تا بایه‌سه‌ غه‌در له‌ وشه‌و زووان و كلتوور خوه‌مان نه‌كه‌یم و نه‌كه‌یمنه‌یانه‌ قوربان كاڵاى بیگانه‌.