ئه‌نفال تاوانێگ له‌ ناونى مه‌راسم و له‌يه‌كه‌ودانێ

شفق نيوز

قوروانى له‌ رێ ئازادى دايه‌. زوورم ئه‌و جنه‌گه‌يل و ناكووكيه‌يله‌ ك له‌ ناونى وڵاته‌يل روى ئه‌يان، خاك كوردستان بويه‌سه‌ شوون يه‌كلاو كردن هێزيه‌ليان. هه‌ ئه‌را يه‌ ئه‌تويه‌نيم بێژێم: مێژوو قوروانى دان كورد چوى كوشتن و بڕين و ده‌ركردن و وێران كردن، مێژووێ دويرودرێژ له‌ ناو ژيان گشت ئنسانيه‌ت ديرێد.

ئه‌نفال يه‌كێ له‌ ئه‌و تاوانيه‌يل بوى ك وه‌ سه‌ر ملله‌ت كورد هات و تويه‌نيم بويشيم، گه‌وراترين تاوانى ك تا ئيرنگه‌ له‌ يه‌ك وڵات زوورم ئنسانه‌يلێ له‌ ناوبرياوين. كاره‌ساته‌يل ئه‌ى تاوانه‌ هه‌ميشه‌و وه‌ردام ها له‌ ناو مه‌خز ئيمه‌، چوين ك ئنسان هه‌ ئه‌يادو ئه‌چێ و چوڵى له‌لێ مێنده‌ جى. هه‌ ئه‌رايه‌ ئه‌دێ بێژێم، له‌ روى ده‌روونى فره‌ترين كارگه‌رى له‌ بان پاشمه‌نه‌يل دوياى خوه‌ى ديرێد. وه‌ جوورێگ ك له‌ ساڵيادو ئه‌وهويرهاوردن، هه‌ميشه‌ ئيمه‌ چيمنه‌ ناو خه‌ياڵ تر و له‌يه‌كه‌ودانه‌يل تر ئه‌را ئه‌زيزه‌يلمان ئه‌كه‌يم ك زوورميان چوى ئه‌فسانه‌ ها له‌ ناو مه‌خزمان وهه‌ميشه‌ ئويشيمن خوه‌زه‌ وه‌لمانا بوياتان!.

ئه‌نفال جيا له‌ وه‌گ كه‌ليمه‌يگه‌ ك له‌ قورئان پيرۆز هاتيه‌ ك ئسلام له‌ وه‌رايوه‌ر كافره‌يل ك وه‌ل كار دينى هاتنه‌و‌ ده‌نگ، وه‌لى ملله‌ت كورد جيا له‌وه‌گ موسه‌ڵمانه‌و باوه‌ر ته‌مام وه‌ ئايين ئسلام ديرێد، ئه‌را يه ده‌سڵات به‌غداو به‌عسيه‌يل خوازين وه‌ى ده‌سپێچگه‌، ملله‌تێ له‌ روى خاك بسڕنه‌و. وه‌لى قوروانى دان و شوڕش كورده‌يل هه‌ميشه‌ له‌ مه‌يدان زينگ و گورج بوى.

ئه‌را يه‌سه‌ ك تويه‌نيم بێژيم، له‌ روى كۆمه‌ڵايه‌تيه‌و فره‌ترين كارگه‌رى له‌ ناو كۆمه‌ڵگا داشت. جيا له‌ بڕيان له‌ يه‌ك و له‌ يه‌ك ترازان له‌ ناونى ئنسانه‌يل، هه‌ ئيچنه‌يشه‌ له‌ روى ئابووريه‌و  فره‌ترين زيان دا له‌ كورد. بويه‌ مه‌مه‌ر وێران بوين سه‌دان ئاوايى و نه‌مه‌نن په‌سوپوڵه‌و‌، جيا له‌ زيان گيانى ك تا ئمڕوو كوردستان وه‌ ده‌سيه‌و ناڵنێد.

ئه‌دێ هويره‌كردنمان ئه‌را تاوان ئه‌نفال له‌ بان ملله‌تێ ك زووان و نه‌ته‌وه‌و هويره‌وكردنێ جياسه‌و له‌يه‌كه‌ودان و شيه‌وكردنێ زانست له‌ بواره‌يل(سياسى، كۆمه‌ڵايه‌تى، ئابوورى و په‌روه‌رده‌يى و رووشنهويرى) ئه‌راى ئه‌كريه‌يد له‌ لايه‌ن زانكۆو په‌يمانگايله‌و گرنگى فره‌تر وه‌پێ ئه‌دريه‌يد، ئه‌را ئه‌وه‌ ك له‌ ئاينده‌ نه‌وه‌يل و مێژوو و هه‌ ئيچنه‌يشه‌ ناوده‌وڵه‌تى بناسيه‌يد.

له‌ ئيچنه‌ نوڕسنێ، حكومه‌ت هه‌رێم ئه‌ركێ سازين و ئاوادان كردن ئه‌و ناوه‌چه‌يله‌سه‌ تا بتويه‌نێ ژيانێ تازه‌ دروس بكاو گرنگى فێشتر وه‌ كشتوكاڵ به‌يد، هه‌وه‌جه‌ وه‌ يه‌سه‌ ك ساڵياد ئه‌نفال بكه‌يمه‌ ئيزگاى ئه‌را ئاينده‌ى چوين ژيان كردن و يه‌گ تواناى ئه‌وسڕين ئه‌ى كاره‌سات يا يه‌گ بتويه‌نيم شوونه‌وارێ كه‌مه‌و بكه‌يم، ئه‌را وه‌گ نه‌وده‌ مه‌مه‌رێ كارگه‌رێ له‌ بان نه‌وه‌يل ئاينده‌.

هه‌ ئه‌وچنه‌ ك وتم، خاسترين كارێ ك ئيرنگه‌ تويه‌نيم ئه‌را ئه‌نفال به‌كه‌يم و بكه‌يمه‌ى تاوانێ ناوده‌وڵه‌تى، ئه‌وه‌يشه‌ يه‌سه‌ ك وه‌ هاوردن سه‌نته‌رو رێخريايل بواره‌يل شيه‌وكردن له‌يه‌كه‌ودان ك له‌ نه‌ته‌وه‌يل يه‌كگرتێ و ئه‌ورووپاو ئه‌مريكايش گرنگى وه‌پێ ئه‌ده‌ن، حكومه‌ت هه‌رێميش هاوكارى وه‌ليانا بكاو ئاماده‌كارى بكا ئه‌را وه‌ ك بتويه‌نێ ژيانێ تازه‌ له‌ ناوچه‌گه‌ وه‌ دى بارێد.

جەلال هۆرێنی