شێخ كه‌ریم عه‌بابه‌یلی

شفق نيوز

شێخ كه‌ريم پياويگ فريه‌ له‌ خوداترس و ديندار و نان بده‌و سه‌خی بوی، وه‌بی جاوازی له‌ناونی مه‌ردم عه‌بابه‌يلی حوكم كردياد، ته‌نانه‌ت له‌ ده‌م بڕيگ له‌ پياوه‌يل وه‌ساڵاچگ راسگوو ئه‌و سه‌رده‌مه‌ ژنه‌فياگه‌ ك جارجاريگ ئه‌گه‌ر كوڕه‌گه‌ی خوه‌ی وه‌ل كه‌سيگ نه‌دار و فه‌قير كيشه‌يگ بياشتاد پشتگيری له‌ فه‌قيره‌گه‌ كردياد و سزای كوڕه‌گه‌ی خوه‌ی داگه‌، ك هه‌ر وه‌و خاتريشه‌ ناسناو كه‌ريم دادگه‌ر ئه‌رای نرياگه‌.

ئی زاته‌ په‌ره‌وه‌پيده‌ر ره‌فتار جوان و خيشايه‌تی بوی، فريه‌ هه‌وڵ يه‌كڕزی هاووڵاتيه‌يل عه‌بابه‌يلی و ناوچه‌گه‌و هه‌ر له‌وه‌ر ئه‌وه‌يش وه‌ سه‌دان و هه‌زاران ئاگر جه‌نگ و ئاشوو كوشانه‌سه‌وه‌و ئاشتی ئه‌نجام داگه‌ له‌ زوورم ناوچه‌يل كوردستان و گرينگی فريه‌يگيش داسه‌ خوه‌ندن و خوه‌نه‌واری و مزگفت و حوجره‌يش له‌ عه‌بابه‌يلی دروس كردگه‌و زانای پايه‌به‌رز جوور مامۆستا شێخ بابه‌ ره‌سول بيده‌نی هاورده‌سه‌ عه‌بابه‌يلی و ده‌يه‌ها فه‌قێ له‌بان خه‌رج خوه‌ی هاوردگه‌ تا ناسناو(دارالعلم) وه‌ عه‌بابه‌يلی به‌خشرياگه‌.

زوورم وه‌خته‌يلی له‌ مه‌جڵس زانايه‌يل گه‌ورا و شێخه‌يل بياره‌و ته‌وێڵه‌ برده‌سه‌ سه‌ر، وه‌ل ئه‌وه‌يشا شێخ كه‌ريم فريه‌يش نيشتمانپه‌روه‌ر و كوردپه‌روه‌ر و ئازاو چه‌ونترس بويه‌و له‌ شووڕش شێخ مه‌حموود نه‌مر وه‌ل شێخ ره‌شيد برای پشتگيری له‌ شووڕش شێخ مه‌حموود حه‌فيد كردنه‌و سه‌ركردايه‌تی گشت چه‌كداره‌يل شووڕشكار ناوچه‌ی هه‌ڵه‌بجه‌و هه‌ورامان و شاره‌زوور كردنه‌و جه‌نگ دژ سوپای داگيركه‌ر ئنگليز كردنه‌، ك ئيسه‌يش مه‌ردم ناوچه‌گه‌ هه‌ر باس داستان قاره‌مانێتی ده‌ربه‌ند ئه‌شكه‌وڵه‌ ئه‌كه‌ن وه‌ سه‌ركردايه‌تی شێخ كه‌ريم و شێخ ره‌شيد برای و تويه‌نستنه‌ گورز جه‌رگبڕ بيه‌ن له‌ سوپای ئنگليز و فيشتر له‌ ٧٠ سه‌رباز له‌ليان بكوشن و ته‌نانه‌ت ئه‌سپ كۆنۆليۆن قاسم بكه‌فيده‌ ده‌سيان و بدێده‌ موڵك شێخ ره‌سيد براگه‌ورای شێخ كه‌ريم و مه‌ردم عه‌بابه‌يلی وه‌پی وتيان ئه‌سپه‌ قاسم.

ئمجا سوپای ئنگليز له‌ وه‌رانوه‌ر ئه‌و شكه‌سته‌ ك هاته‌ تويشيان وه‌ ته‌ياره‌ ئاوايی عه‌بابه‌يلی بوردمان كردن و نزيكه‌ی چوار كه‌س له‌ هاووڵاتيه‌يل شه‌هيد بوين ك يه‌كيگيان هاوسه‌ر شێخ كه‌ريم بوی.

حه‌سه‌ن حه‌ميد

ج . أ