دويا ده‌رفه‌ت عبادى ئه‌را جيوه‌جيكردن ئاشتى

عه‌لى  حسێن فه‌يلى

شه‌فه‌ق نيوز/ وه‌خاتر ئاشكراكردن سياسه‌ته‌يل به‌غدا، نێچيروان بارزانى سه‌رۆك حكومه‌ت هه‌رێم كوردستان، هه‌ميشه‌ ئه‌و قسه‌ ئويشێد ك سياسه‌ت عبادى دژ كورد ريڕه‌وه‌يل فريه‌ لايه‌نيگ ديرێد و هه‌رچه‌نى چوارچێوه‌يگ دياريكرياگيش نيه‌ ئه‌را چاره‌سه‌ر گشت كيشه‌يل، چاره‌سه‌ريش ئه‌را هويچ كيشه‌يگ نادێ، بارزانى ئويشێد: هه‌رێم فيشتر له‌ 10 هه‌زار شه‌هيد و زه‌خمدار داگه‌ له‌ جه‌نگ دژ داعش وه‌خاتر ئه‌وه‌گ گشتلايگ وه‌ ئاشتى بژيه‌ن.

 

هاووڵاتيه‌يلمان ژيانيگ سه‌قامگيره‌ و ئاينده‌يگ رووشن ئه‌خوازن ئه‌را رووڵه‌يليان، وه‌لێ وه‌ل زيايبوين مه‌رزه‌يل ئابڵوقه‌و ورسگكردن مه‌ردم و به‌رزه‌وبوين راده‌ێ هه‌ڕه‌شه‌يل و خوه‌يشاردنه‌وه‌ له‌ گفتگوو ئه‌و خواسته‌يله‌ جيوه‌جى نيه‌ون. بارزانى باوه‌ڕێ ئه‌وه‌سه‌ عرا ميراتگر ديد خراوه‌ ئه‌را دانيشتن و سياسه‌ت زوڵم وه‌رده‌وام وه‌رانوه‌ر مافه‌يل كورد و باقى پيكهاته‌يل تر نه‌ته‌وه‌يى و ئايينى و مه‌زه‌وى ئه‌گرێده‌ وه‌ر و هه‌ميشه‌ جه‌ختيش له‌وه‌ ئه‌كا ك ئاشتى وه‌ قسه‌ نيه‌ وه‌ته‌نياو ريككه‌فتنه‌يليش وه‌رده‌وام نيه‌ون وه‌بى پابه‌ندى وه‌پيه‌و، ئاشتى خه‌وه‌جه‌ وه‌ دادگه‌رێ گشتگيريگ ديرێد، چوينكه‌ ئيمه‌ وه‌ل به‌غدا وه‌شيوه‌يگ وه‌رده‌وام وه‌و خاتره‌ دانيشتيم، وه‌لێ كيشه‌گه‌ ها له‌ورا به‌غدا پابه‌ند نيه‌ وه‌ ئاكامه‌يل ئه‌و ريككه‌فتنه‌.

 

وه‌ گووره‌ى ئى جووره‌ هويره‌وكردنه‌، كورد وه‌شيوه‌يگ گشتى عراقيگ بى جه‌نگ و سه‌قامگير ئه‌خوازن وه‌شيوه‌يگ له‌ به‌رژه‌وه‌ندى خوه‌ى و گشت ناوچه‌گه‌ بدێ. له‌ڕاسى مه‌شقكردن سياسه‌ت ئابڵوقه‌ دژ كوردستان ئه‌چێده‌ خانه‌ى سياسه‌ته‌يليگ فيشتر ناشه‌رعى و دڕنده‌ترين سزايه‌يل له‌ سه‌رده‌م، وه‌ل تێبينى ك ئه‌را يه‌كه‌مجار نيه‌ ئيچنه‌ سياسه‌ته‌يليگ دژ كوردستان ئه‌نجام ئه‌ياد.

 

ته‌نيا له‌وه‌ر وه‌هويرخستنيگ، ده‌وڵه‌ته‌يل جه‌هان له‌ساڵ 1914ه‌وه‌ وه‌ره‌و ژويه‌ر نزيكه‌ى 250 ئابڵوقه‌ وه‌خوه‌يانه‌و دينه‌، زوورميانيش له‌ناونى ساڵ 1970 تا ساڵ 2000 بوێ ك ره‌سيه‌ 110 ئابڵوقه‌، يه‌يش وه‌و مانا له‌ ماوه‌ى 30 ساڵ نيمه‌ى ئابڵوقه‌يل روێدا و ئه‌مريكايش وه‌ ته‌نيا 73 له‌لى هاورده‌ كار له‌ وه‌ختيگ ك ده‌وڵه‌ته‌يل ئۆرپى 28 ئابڵوقه‌ هاوردنه‌ كار دژ نه‌ياره‌يليان. سێ له‌و ئابڵوقه‌يله‌ هووكار جه‌نگ بوين، يه‌كيگيان كووتايى وه‌ رژيم به‌عس هاورد له‌ عراق و ئه‌و باقيه‌گه‌يشى زوورميان ويش شكه‌ست هات و مه‌ده‌نيه‌يليش زه‌ره‌دمه‌ن فيشتر بوين له‌ليان. ئمجا وه‌گووره‌ى له‌يه‌كه‌وداين ئه‌وه‌ ده‌ركه‌فت ك قورسايى ئابڵوقه‌يل ئه‌كه‌فێده‌ بان شان فه‌قيره‌يل و ژاره‌يل، له‌ناونى ئه‌و شماره‌يليشه‌ كوردستان شماره‌يگ دياريكرياگ نه‌ياشت وه‌ ئه‌وه‌گ ده‌وڵه‌تيگ سه‌روه‌خوه‌ى نيه‌، وه‌لێ ئه‌گه‌ر شماره‌ێ بكريه‌ێد به‌ش شێر ئه‌كه‌فێده‌ پى.

 

گشتمان زانيم ك عبادى وه‌خاتر شكانن ئيراده‌ى مله‌ت كورد، له‌ ئاشمان و له‌بان خاك وه‌ ده‌سميه‌ت ده‌وڵه‌ته‌يل هاوسا، كوردستان برده‌ ناو به‌رنامه‌گه‌ێ وه‌ چه‌سپانن ئابڵوقه‌ له‌بانى، ئاساييشه‌ خاڵيگ هاوبه‌شيش بدێ له‌ناونى رژيمه‌يل وه‌رين فه‌رمانڕه‌وا له‌ عراق و رژيم ئيسه‌، ئه‌ويش ئه‌وه‌سه‌ ك گيشتيان ئابڵوقه‌ێ سياسى و ئابوورى و سه‌ربازى چه‌سپنن وه‌ گووره‌ى قورسايى و وه‌ گووره‌ى وه‌خت و سه‌عاتيگ ك خوه‌يان بخوازن و هويچكاميگ له‌ليانيش دگان وه‌ ئه‌وه‌ نانه‌ن ك ك سزاێ ملله‌تيگ ئه‌يه‌ن له‌ مناڵ كورپه‌و پير و گه‌ورا ك كاريگه‌رى ئابڵوقه‌ له‌بانيان نيشێد و ئاشكرايشه‌ زوورم ئه‌و مه‌ردمانيشه‌ ك تويش زه‌ره‌د ئه‌يه‌ن ئه‌وانه‌ن ك حكومه‌ت به‌غدا وه‌ هاووڵاتيه‌يل خوه‌ى ناويان ئه‌يه‌رێد!!

 

كورد وه‌ شيوه‌يگ ئاشكرا باس له‌وه‌ ئه‌كا ك وه‌رجه‌ روێداگ 16ى ئوكتۆبه‌ر/ ته‌شرين يه‌كه‌م و له‌شوون ئه‌وه‌يش ئامانجيان ئه‌وه‌سه‌ چاره‌سه‌ر ئاشتيانه‌ بدێ تا سه‌ركه‌فتن ئه‌را هه‌ردوگلا بدێ نه‌ك ئه‌را يه‌ك لايه‌ن، وه‌لێ تواناى چه‌سپانن ئاشتى نه‌يرن ئه‌گه‌ر عبادى ئاماده‌ نه‌دێ ئه‌را ئاشتى، ئمجا سه‌رۆك وه‌زيره‌يل ها پايته‌ختيگ هه‌زاران له‌تى سيه‌پووشن ئه‌را ئه‌زيزه‌يليان ك بوينه‌ قوربانى ترۆر و تون وتيژى، وه‌ل ئه‌وه‌يشا ئابڵوقه‌ چه‌سپنێد له‌بان ملله‌تيگ ك قوربانى ترۆره‌و له‌وه‌رخاتر جيوه‌جيكردن دادگه‌رى جه‌نگ ئه‌كا.

 

عبادى باس له‌وه‌ ئه‌كا ك بنه‌ڕه‌ت ئابڵوقه‌گه‌ێ و ناكوكيه‌يل دوژمنانه‌ێ دژ كوردستان شه‌رعى و ده‌ستووريه‌، وه‌لێ ده‌ستوور له‌وه‌ر ئاشتيه‌ و كه‌س ئابڵوقه‌ له‌بان هاووڵاتيه‌يل نه‌چه‌سپنێد، ده‌ستوور شه‌رعيه‌ت له‌ سياسه‌ت سزاى وه‌جه‌م نادوينێد، چوينكه‌ ئى سياسه‌ته‌ هه‌مان ئه‌و سياسه‌ته‌سه‌ ك به‌شدار بوى له‌ ده‌ركه‌فتن ترۆر و تون وتيژى و ناسه‌قاميرى كۆمه‌ڵايه‌تى و سياسى و هويچ په‌يوه‌ندييگ وه‌ خواسته‌يل هه‌ميشه‌يى ملله‌ت كورد نه‌يرێد و له‌يوايش نادێ.

 

عبادى به‌خت خوه‌ى تاقييه‌و كرد له‌ بوار سه‌ربازى دژ هه‌رێم ئاشتيخواز، به‌ڵكوو به‌شداريش بوێ له‌ گرژيه‌يل و ئاژاوه‌يليگ ك له‌ى دوياخره‌ له‌ كوردستان روێدا له‌ڕێ وتاره‌يل هانداين و پشتگيرى ناڕاسه‌وخۆ ئه‌نجامده‌ره‌يلێ، ئمجا له‌وه‌ر ئه‌وه‌يش ك زانيد سياسه‌ته‌گه‌ێ ئه‌وه‌ چه‌سپان ك سه‌ركه‌فتن ئه‌راى نانويسيه‌ێد له‌ پرووژه‌گه‌ێ ئه‌را شكانن ئيراده‌ى ملله‌ت، هه‌ر وه‌و خاتريشه‌ خاسيش زانێد ك ته‌وافق وه‌ل كورد و دگانناين وه‌ مافه‌يل ره‌وايان دويا ده‌رفه‌ته‌ ئه‌را ئاشتى و سه‌قامگيرى و پابه‌ندبوينى وه‌ ده‌ستوور، چوينكه‌ يه‌كێتى له‌ڕێ ورسگكردن و ئابڵوقه‌وه‌ جيوه‌جى نادێ، به‌ڵكوو له‌ڕێ ته‌وافق و گفتگوو ئه‌نجام ئه‌گرێد، ك يه‌يش قاپييگه‌ ك شايه‌ت تاسه‌ر وه‌ واز نه‌مينێد.

عه‌لى حسێن فه‌يلى