بیده‌نگى له‌ئاست كێشه‌یل كوومه‌ڵایه‌تى

شفق نيوز

ده‌رخستن ناڕه‌زایى، وه‌لى فه‌یله‌سووفه‌یلمانیش له‌ ئاست كێشه‌یل كوومه‌ڵایه‌تى ده‌سه‌وسیان ناوسیه‌ن و ناتویه‌نن وه‌ ئاشكرا باس له‌رویدان كێشه‌گه‌ بكه‌ن، كێشه‌ى سێكسى ئه‌را گشت لایگ بڤه‌س، دیاره‌ وه‌ باسكردن ئى كێشه‌یله‌ كه‌سایه‌تیمان كزه‌و بوود و رووژانه‌ ده‌زگایه‌یل ره‌سانن میوانداریمان ناكه‌ن و نایژنه‌ پیمان چه‌ودێر سیاسى، هه‌ر له‌وه‌ر ئه‌وه‌یش گشتى مقه‌یه‌ت خوه‌یان له‌لى ئه‌كه‌ن، وه‌لى نووڕید كورد خه‌ریكه‌ كێشه‌ سیاسیه‌گه‌یشى ئه‌كاده‌ قوربانى كێشه‌یل كوومه‌ڵایه‌تى.

 

 

ئاده‌میزاد ئه‌گه‌ر ئاسووده‌یى روحى نه‌یاشتوود منیده‌ ئاژه‌ڵیگ دڕنده‌، كوومه‌ڵگایگ رووشنهویر و فامێده‌ ئه‌تویه‌نێد له‌پشت سه‌ركرده‌یلیه‌و بوود ئه‌را هه‌ر بڕیاریگ سیاسى، كوومه‌ڵگایگ نه‌خوه‌ش و دوڕوى ناتویه‌نێد مقه‌یه‌تى له‌ ده‌سكه‌فته‌یل سیاسى بكا، كوومه‌ڵگایگ تاكه‌یلى وه‌ دزى زیاتر وێڵ بوود له‌شوون تێركردن ئاره‌زووه‌یلى، بیگومان گشت رێیگ گرێده‌ وه‌ر ئه‌را ئه‌وه‌ك شكاریگ بكه‌فێده‌ ده‌سى و خوه‌ى له‌تى به‌تاڵه‌و بكا.

 

كام له‌ وه‌رپرسه‌یل ئى وڵاته‌ هویر له‌لایه‌ن ده‌روینى و جه‌سه‌یى جایه‌ڵ جوانه‌یل كوردستان كردنه‌، كام لایه‌ن سیاسى و كوومه‌ڵایه‌تى و دینى ده‌روازه‌یگ بویچگ هه‌ناسه‌داین ئه‌را جایه‌ڵه‌یل هیشتگه‌سه‌و. گشت ئازادیه‌یل جایه‌ڵه‌یلمان داگیر كردنه‌ وه‌ناو حه‌ڵاڵ و حه‌رام و داب ونه‌ریت كوومه‌ڵایه‌تى و جوانه‌یلمان كردنه‌سه‌ دڕنده‌یگ له‌ هه‌ر ده‌قه‌یگ بایه‌سه‌ چه‌وه‌ڕێ په‌لامار مه‌ترسیدار ئه‌وان بویمن.

 

وه‌رپرسه‌یل وڵاته‌گه‌ى من له‌جیاى خانگیگ 10 خانگ و ڤیلا دیرن و هه‌ر یه‌كیگ له‌لیان ئه‌را مه‌رامیگ ئه‌وریه‌ێده‌ كار، وه‌لى ته‌نیا خانگیگ وه‌ ره‌وا ناوینن ئه‌را به‌ش فره‌یگ له‌ كوومه‌ڵگا، نیگار ئه‌گه‌ر ته‌نیا ژویه‌ریگ بیاشتاد وه‌ئارامى له‌تى بخه‌فتیاد ئه‌وه‌ ئمڕوو له‌ ژیان ئاسایى ژیاو برایه‌یلیشى له‌ زندان نه‌وین، ئه‌گه‌ر كه‌ناڵه‌یل ره‌سانن ته‌نیا به‌رنامه‌یگ بیاشتان ئه‌را هووشیارى سێكسى و قسه‌كردن له‌بان كێشه‌یل كوومه‌ڵایه‌تى ئه‌وه‌ له‌كێشه‌یل فره‌یگ قورتار بویمن.

 

ئه‌را چه‌ وه‌ختى كێشه‌یگ سیاسى بوود له‌وڵات بڕێگ له‌ وێژه‌ر و كارمه‌نده‌یل ته‌له‌فزیۆن ته‌خت خه‌وه‌یلیان به‌نه‌ ستۆدیۆ ئه‌را ئه‌وه‌ك نزیك رویداگه‌گه‌ بوون، وه‌لى له‌ئاست كێشه‌یل كوومه‌ڵایه‌تى مه‌گه‌سیش میوانیان نییه‌. نیگار كوشیا، دوعا كوشیا، كى و كى گشتیان كوشیان و سزیان، له‌كوشتن ئه‌وان هویچ یاى نه‌گردیم، كوشتن و ده‌سدریژى وه‌رده‌وامه‌، كه‌س ناگه‌ردێده‌ شوون مه‌مه‌ره‌گه‌ى، ماوه‌ى هه‌فته‌یگ وه‌ قوربانى تازه‌یگ ئه‌واكانتر له‌هویرمانه‌و چوود، سه‌رم سڕ مینێد حكوومه‌ت كوردستان چه‌نه‌ها ده‌زگاو ئه‌نجوومه‌ن و وه‌ڕێه‌وبه‌رایه‌تى داناگه‌و پویل فره‌یگ خه‌رج ئه‌كا، وه‌لى نووڕید پرس وپرسكارى وه‌ل كه‌سا ناكاو نیه‌ویشید ئه‌رێ خانمه‌یل قه‌دردار شیوه‌ چه‌ن ساڵه‌ خه‌ریك چه‌ین، كووا به‌رهه‌م كاره‌یلدان، به‌رهه‌م كار ئیوه‌ رووژانه‌ قوربانى تازه‌یگه‌.

 

وه‌ حكوومه‌تیشه‌و كه‌س ناخوازێ له‌ى كێشه‌ خوه‌ى بكاده‌ خاوه‌نى و گشتى هانه‌ خه‌م به‌رژه‌وه‌ندیه‌یل تایبه‌ت خوه‌یان، دویه‌تیگ له‌ئاكام غه‌ڵه‌تیگه‌و په‌رده‌ى دویه‌تینى له‌ده‌س ئه‌یاد و چووده‌ لاى وه‌ناو چالاكوانیگ هه‌ق ژنه‌یل و باس كێشه‌گه‌ى ئه‌راى ئه‌كا، ئه‌و خانمیشه‌ له‌جیاى ئه‌وه‌ك له‌ كوشتن قورتارى بكا وه‌پێ ئویشید بایه‌د له‌سه‌ره‌تاوه‌ بزانستاى ئى كێشه‌ چاره‌سه‌ر ئه‌خوازێد، هه‌ر له‌وه‌ر ئه‌وه‌یش بایه‌د چه‌وه‌ڕێ مه‌رگ ئه‌واكان تریش بویمن، چوینكه‌ حكوومه‌ت وه‌خاتر حزب ئه‌وانه‌ له‌ى شوونه‌یله‌ داناگه‌ نه‌ك له‌وه‌ر هه‌ڵگه‌فتگى، هه‌ر وه‌وخاتریشه‌ ئى كێشه‌یله‌ چاره‌سه‌ر نادۆن و حزبیش وه‌رپرسیاریه‌تى گه‌ورایگ ها بان شانى ك ته‌نیا ئه‌را رازیكردن و به‌شكردن پله‌و پۆست نازانێد چه‌ ئه‌كا.

 

حكوومه‌ت تویه‌نستیاد وه‌و پویله‌ ك ئه‌یاده‌ى حزبه‌یل و پله‌ى كارییان و دویاخریش دژى وسیه‌ن، هه‌زاران خانگ ئه‌را هاووڵاتیه‌یل دروس بكاو ژیانیگ خاستر وه‌پیان بوه‌خشێد. ئى كێشه‌یله‌ ك رووژانه‌ روی ئه‌یه‌ن هه‌ڵوێست حكوومه‌ت و ده‌سه‌ڵات كوردى كزه‌و كه‌ن و دید و ئه‌راى چوین كوومه‌ڵگاى ناوده‌وڵه‌تى وه‌رانوه‌ر وه‌ كورد ئاڵشت كه‌ن. هاوردن كۆمپانیایه‌یل گه‌وراى نه‌فت نادۆنه‌ هێزیگ كارا ئه‌را ده‌سه‌ڵات كوردى و كوومه‌ڵگایگ ئازادو تاكیگ ئازاد هێز سه‌ره‌كى گشت سه‌ركرده‌یگه‌، ئمجا خاستر ئه‌وه‌سه‌ وه‌رجه‌ چاره‌سه‌ر بتویه‌نن كێشه‌یل سیاسى و كێشه‌یل كوومه‌ڵایه‌تى چاره‌سه‌ر بكه‌ن و دى به‌سه‌ كوشتن نیگاره‌یل.

 

تامان شاكر

 

ج. ا