پرسیاره‌یلیگ هه‌وه‌جه‌ وه‌ جوواو دیرن

شفق نيوز

ساڵ گوزه‌یشته‌ ساڵ قه‌یرانه‌یل بوى له‌بان گشت ئاسته‌یل، هه‌ر له‌وه‌ر ئه‌وه‌یش گه‌شبینى وه‌ ئاسایش و سه‌قامگیرى له‌ساى رویداگه‌یل ئیسه‌ له‌ مه‌یدان عراقى كار فره‌ سته‌میگه‌.

 

ئاشكراش ك له‌ى نزیكه‌یله‌ ئومیدید نییه‌ ئه‌را ئاسایش و به‌رقه‌راوى و سوویش هویچ خزمه‌تگوزراییگ وه‌گووره‌ى خواست نایه‌یده‌ وجوود، به‌ڵكوو دیاره‌ ك هایمنه‌ چه‌وه‌ڕێ قه‌یرانه‌یل تر تازه‌ ك وه‌ل رووژه‌یل هه‌ڵوژاردن ئاینده‌ یه‌كه‌و گرن و دید و ئاره‌زووه‌یل فراكسیۆنه‌یل سیاسى ئه‌را ده‌سكه‌فتن ده‌نگه‌یل و ئه‌را وه‌ده‌سهاوردن پۆسته‌یل ده‌سه‌ڵات قه‌یران سه‌خت دروس كه‌ن. ئمجا له‌یره‌ یه‌كه‌مجار پرسیاریگ له‌ خوه‌م كه‌م و ئیجا له‌ گشت كورده‌یل فه‌یلى و ئویشم: ئه‌گه‌ر بارودوخه‌گه‌ وه‌ى جووره‌ بوود، ئایا چه‌ له‌ده‌سمان ئه‌یه‌ید بكه‌یم و بایه‌د مقه‌یه‌ت چه‌ بویمن؟

 

راسه‌ دۆسیه‌یل كێشه‌گه‌مان تا ڕاده‌یگ ڕێ خاسیگ بڕیه‌و  تاریف وه‌ له‌ناوبردن وه‌جه‌م(جینۆساید)كریا، ك یه‌یش بڕێگ كێشه‌یل سیاسى و نه‌ته‌وه‌یى و مه‌زه‌وى خریه‌یده‌ پاڵى، وه‌لى دۆسیه‌یل جوور قه‌ره‌بووكردن و هاوردنه‌وه‌ى ناسنامه‌ هێمان هه‌ر ها له‌شوون خوه‌ى و ته‌كان نه‌خواردگه‌، ئمجا ئایا هه‌ر بایه‌د وه‌رده‌وام بویمن له‌بان په‌یڕه‌و كویه‌ن یا بایه‌د شیوه‌ى مامڵه‌كردن و قسه‌و بڕیارمان وه‌ل لایه‌نه‌یل په‌یوه‌ندیدار ئاڵشت بكه‌یم؟

 

وه‌ڕاى من وه‌رجه‌ گشت چشتیگ بایه‌د كار له‌بان یه‌كه‌وخستن كورده‌یل فه‌یلى بكه‌یم له‌بان بنه‌ماى ئه‌و تایبه‌تمه‌ندیه‌یله‌ ك گردمانه‌و ئه‌كا، ك وه‌ ڕاسى بویشیم ئیمه‌ نیمنه‌ بیاوان ئه‌مان و بایه‌د گشتمان كار له‌بان لاوردن جیاوازیه‌یل ناونى ره‌فتار قسه‌كردنمان بكه‌یم و تاوتوێ و چه‌ودیرى كێشه‌یلمان بكه‌یم.

 

له‌لایگ تره‌و گرنگ ئه‌وه‌سه‌ خوه‌ندنه‌وه‌و ئاماریگ واقعى داشتویمن ئه‌را دیاریكردن سه‌رمایه‌ى سیاسى و ئابوورى و كوومه‌ڵایه‌تیمان له‌ژێر چه‌تر نه‌ته‌وه‌یى و مه‌زه‌وى و پایه‌مان له‌بان ئاست كوومه‌ڵگاى عراقى، تا بتویه‌نیم نه‌خشه‌ڕێ دانه‌یم له‌بان بنه‌ماى واقعى و دانایى نه‌ك له‌بان بنه‌ماى قسه‌ى به‌تاڵ و سووزدارى. ئمجا له‌جیاى ئه‌وه‌ك ئه‌یاكه‌مان تومه‌تبار ئه‌واكه‌مان بكا، بایه‌د په‌نجه‌ى تومه‌ت ئه‌را لایه‌نه‌یل په‌یوه‌ندیدار دریژ بكه‌یم له‌باوه‌ت كێشه‌كه‌مان تا وه‌رانوه‌ره‌گه‌مان ئاگاداره‌و بوون ك وه‌ختێگ  ئیمه‌ وه‌ زووان تون قسه‌ كه‌یم ئه‌و قسه‌ له‌ تونى و سه‌ختى ژانه‌یلمانه‌و ده‌رچوود.

 

له‌باوه‌ت كێشه‌گه‌مان بڕیاره‌یل حكوومى ده‌ركریاو پارته‌یل سیاسى و رێكخریاگه‌یل كوومه‌ڵگاى مه‌ده‌نى سووزدارى وه‌لیا نیشاندان، وه‌لى وه‌ گووره‌ى قه‌واره‌ى  مه‌ینه‌تیه‌لمان نه‌وى و بایه‌د جه‌خت له‌ هه‌قه‌یلمان بكه‌یم له‌وه‌ختێگ له‌ى خاكه‌ ژیه‌یم و به‌ڵكوو گشت رووڵه‌یل پێكهاته‌ى كورد فه‌یلى له‌هه‌ر كووره‌ بوون زه‌ره‌دمه‌ن بوینه‌و بایه‌د وه‌گشت جووریگ داواى هه‌قه‌یلیان بكه‌ن تا مه‌ردمان تر بنووڕنه‌ ئه‌و زوڵمه‌ ك له‌لیان كریا.

 

ساڵه‌یل بێده‌نگى و چه‌وه‌ڕێكردن شه‌رمه‌زارى گوزه‌یشته‌ ته‌واو بوى و خواست ئه‌وه‌سه‌ له‌ ساڵ تازه‌ هویر له‌ شێواز داواكارى هه‌قه‌یلمان بكه‌یم وه‌ ده‌سه‌جه‌مى، نه‌ك یه‌كه‌ یه‌كه‌، وه‌ل ئه‌وه‌یشا بایه‌د وتار كاریگه‌ر داشتویمن له‌بان بنه‌ماى رێز و حورمه‌ت و وه‌ده‌سهاوردن متمانه‌ى كه‌سان تر و له‌ ده‌روازه‌یل تره‌و بگه‌ردیمنه‌ شوون كێشمه‌گه‌مان و دۆسیه‌یل تریش بخه‌یمنه‌ بانى له‌باوه‌ت مه‌ینه‌تى كورده‌یل فه‌یلى ك ئه‌و مه‌ینه‌تیه‌ له‌شوون رمیان دیكتاتۆر سته‌مكاریش هه‌ر وه‌رده‌وام بوى و نه‌بایه‌د ناتوانایى باریمنه‌ كار و بایه‌د باوه‌ڕ  وه‌ كێشه‌گه‌مان داشتویمن و ته‌قالا ئه‌ڕاى بكه‌یمن.

 

وه‌ هه‌رحاڵ ئه‌گه‌ر ساڵ تازه‌ ساڵ ئاشتى و خوه‌شى بوود ئیمه‌ یه‌كه‌مین ئاشتیخوازیم، وه‌لى ئه‌گه‌ر قه‌یرانه‌یل هه‌ر وه‌رده‌وام بوین، ئى كاره‌ له‌لاى خوه‌مان مینێد و بایه‌د ئاماده‌ بویمن له‌وه‌ر خاتر وه‌رگریكردن له‌ مه‌ندنمان له‌و بنه‌مایه‌یل ئنسانى و نیشتمانیه‌ ك ده‌ریایه‌یلیگ قوربانى وه‌ خاترى دایم.

 

عه‌لى حسێن فه‌یلى

ج. ا