شه‌هید "مشتباز" سامى ئبراهیم فه‌یلى

شفق نيوز

1944 هاته‌سه‌ دونیاو له‌تیره‌ى قه‌یتول موسیه‌.

خوه‌ندن سه‌ره‌تایى له‌خوه‌ندنگاى حسیه‌ینیه‌ له‌ده‌هانه‌و ناوه‌ندى له‌ خوه‌ندنگاى جه‌عفه‌ریه‌ى نزیك عه‌به‌خانه‌ى جاده‌ى وه‌سبه‌ ته‌واو كردگه‌. شه‌هید پاڵه‌وان ده‌ور باڵایگ داشتگه‌ له‌ راپه‌ڕین مللى و هه‌ر راپه‌ڕینیگ یا ته‌قه‌یگ بویاتاد شه‌هید سامى وه‌ل بڕیگ له‌ خوه‌ندكاره‌یلا كه‌فتیاگه‌ نواى كورد و عه‌ره‌ب، چوینكه‌ ئازاو چه‌ونه‌ترس بوى و هه‌رچه‌نى له‌و وه‌خته‌یلیشه‌ عومرى مناڵ بوى، وه‌لى وه‌بى ترس گشت كاریگ ئه‌نجام دا. وه‌ل ئه‌وه‌یشا هه‌میشه‌ دروشم دژ حكوومه‌ت بڵاوه‌و كردیاد تا ئه‌وه‌ بوى دویاخر له‌لایه‌ن پاكه‌وكه‌ر یا فه‌ڕاش مه‌دره‌سه‌گه‌ كاره‌گه‌ى ئاشكرا كریا و بریا ئه‌را ده‌زگاى ئاسایش و له‌ خوندن ده‌ركریا وه‌ یه‌كجارى.

دویاى ماوه‌یگ هه‌لیگ ئه‌راى هه‌ڵكه‌فت ئه‌را پیشكه‌شكردن به‌رنامه‌ى مه‌یلداره‌یل مشتبازى له‌ ته‌له‌فزیۆن به‌غداو به‌رنامه‌گه‌ ناودارى یا شوهره‌ت وه‌رگرت له‌گشت عراق. شه‌هید سامى مشتازیگ وه‌ جورئه‌ت بوى و پاڵه‌وانێتى عراق ئه‌را چه‌ن جاریگ هاورده‌ ده‌س و ناودارى په‌یا كرد.

خاوه‌ن كه‌سایه‌تى كه‌م وینه‌یگ بوى و نیشتمانپه‌روه‌ر بوى وه‌گشت مانایگ . چه‌نه‌ها جار زندانى كریا، بنه‌ماڵه‌گه‌ى تاریخ پاكیگ دیرن وه‌تایبه‌ت له‌ڕووژگار كوده‌تاى ساڵ 1963 ك پشتگیرى پیاوه‌یل وه‌رگیریكار كردیان وه‌پویل و خواردن و چه‌ك، سامى خوه‌یشكیگى خه‌باتكه‌ر و ئه‌ندام بوى له‌ یه‌كێتى ژنه‌یل كوردستان له‌وه‌ختیگ ك دادوه‌ر زه‌كیه‌ ئسماعیل سه‌رۆك یه‌كێتیه‌گه‌ بوى. شه‌هید سامى له‌لایه‌ن پیاوه‌یل حه‌ره‌س قه‌ومیه‌و وه‌ل باقى برایه‌یلیا گیریاو دویاخر ئازاد كریان. ئنجا له‌وه‌ختیگ تواسن بگرنه‌ى له‌ حه‌ى ئه‌لئه‌كراد بوى و پۆلیسیگ له‌ناوچه‌گه‌ له‌لى نزیكه‌و بوى و تواس بگریگه‌ى، شه‌هید سامییش یه‌ك مشت ئه‌ڕاى وه‌شان و خسته‌ى زه‌وى و ئه‌ویش له‌و شوونه‌ هه‌یواى ئه‌را شوونیگتر.

له‌وه‌ختیگ مه‌سه‌له‌ى ده‌ركردن كورده‌یل فه‌یلى ده‌س وه‌پیكردو ئه‌و به‌دبه‌ختى و ماڵویرانیه‌ هاته‌ بان كورده‌یل به‌غدا، ئه‌وه‌ بوى خیزانه‌گه‌ى ئه‌وانیش ده‌ركریا له‌ سه‌ره‌تاى ساڵه‌یل هه‌یشتاى سه‌ده‌ى وه‌رین، ئنجا شه‌هید سامى وه‌ل سالم برا بویچگى ده‌سگیر كریان و تائیسه‌یش جویر باقى جایه‌ڵ جوانه‌یل زوڵملیكریاى كورد فه‌یلى چاره‌نویسیان نادیاره‌و هویچ زانیارى یا مه‌علووماتیگ له‌باوتیانه‌و نیه‌و كه‌س نیه‌زانیگ له‌كوورا كوشیانه‌.

له‌شوون ئه‌وه‌یش خه‌لیل و جه‌لیل براى له‌وڵات غوربه‌ت له‌ سوید چینه‌ ره‌حمه‌ت خودا، وه‌و جووره‌ شه‌هید سامى له‌لایه‌ن داروده‌سه‌ى سه‌دام ده‌سگیر كریاو هویچ كه‌سیگ  له‌ بنه‌ماڵه‌گه‌یان نه‌مه‌ند.

 

ساحب هاشم خه‌تات