نه‌خش باوگ له‌ گرده‌وكردن روڵه‌يل

شفق نيوز

  بيگومان خوه‌شترين وه‌خته‌يليگ ئه‌وه‌سه‌ ك بنه‌ماڵه‌ يا خيزان و كه‌س وكار هه‌ميشه‌ گرد بوون له‌ ده‌ور يه‌ك و گشت وه‌خت و ساتيگ هه‌واڵ گه‌رمای گه‌رم يه‌كتری بزانن و چه‌وه‌يليان وه‌ ديدار يه‌كتری شاد بوودو ستوين ماڵ وه‌ جه‌م بته‌و بكه‌ن و له‌سای جه‌منيشتن و ژيان يه‌ك خيزانی و دوير له‌ ده‌رد دويری بژيه‌ن تا نه‌وه‌يليانيش بتويه‌نن په‌ره‌ بيه‌نه‌ ئه‌و ريڕه‌وه‌ ك وه‌رجه‌ خوه‌يان په‌يڕه‌وی كرياگه‌و په‌نا وه‌ ئاكامه‌يل خاسی برياگه‌.

مه‌سه‌له‌ی به‌شكردن ميرات و ماڵ و موڵك جار له‌يوا هه‌س ئاسووده‌يی و سه‌رفرازيه‌و جار له‌يوايش هه‌س ده‌رده‌سه‌ری و ڕه‌نج بيوه‌ريه‌. بيگومان نيشتن وه‌جه‌م و له‌ژير بنميچ شوونه‌وار پڕ له‌ يادگاريه‌يل خوه‌ش و له‌سای خشت ديواره‌يل باوان هه‌ميشه‌ هه‌ر وه‌و قه‌در و حورمه‌ت جارانه‌و ته‌ماشا كريه‌يد ك زويتر داڵگ وباوگيگ بنياتی نانه‌و خيزان له‌تی دروس كردنه‌و هه‌ناس ئوخه‌ی له‌سای روڵه‌يليان له‌تی هه‌ڵمژينه‌.

وه‌لی دوينيد دويای كوچكردن باوگ يا جارجاريگيش داڵگ، دی شيرازه‌ی ئه‌و خيزانه‌ شيويه‌يد و چويچيه‌ن، ئه‌ويش له‌ ئاكام جيايی و دويره‌وكه‌فتن له‌ يه‌كتری و هه‌ر يه‌كيگ له‌و روڵه‌يله‌ كه‌فيده‌ شوونيگ و ژيان دويری هه‌ڵوژنن.

كه‌سه‌يليگ له‌يرا ئاماژه‌ وه‌ ئه‌وه‌ كه‌ن ك گوايا ژن نه‌خش باڵايگ ديريد له‌ دويره‌وخستن برايه‌يل له‌ يه‌كتری و جه‌م ئه‌و خيزانه‌ كه‌فيده‌ ژير كۆنترۆڵ ژن بی به‌زه‌يی، يه‌يش وه‌و مانا ك ژن هه‌ميشه‌ مه‌يل وه‌ره‌و لای ته‌نيايی و جيايی ديريد له‌ڕوی ماڵداريه‌و، ك هه‌ر وه‌و خاتريشه‌ خوازياره‌ ماڵی جيا بوود.

مانای ئه‌وه‌سه‌ نه‌خش باوگ له‌يرا نه‌خش گه‌ورايگه‌ له‌ وه‌يه‌كه‌وناين و گرده‌وكردن روڵه‌يل تا خوه‌ی ها له‌دونيا، وه‌لی هه‌ر له‌شوون نه‌مه‌ندن و كوچكردن ئه‌و باوگه‌ فريه‌يگ له‌ خيزانه‌يل ته‌رفتوينه‌ بوون و چويچيه‌ن، چوينكه‌ روڵه‌يلی دڵ وه‌و ميرات و ماڵه‌ خوه‌شكردن ك له‌دويای باوگيان ئه‌رايان بمينيده‌ جی و هه‌ر يه‌كيگ له‌ليان به‌ش خوه‌ی وه‌ربگريد تا بتويه‌نيد وه‌ ته‌نيا گوزران بكاو بژيه‌يد دوير له‌ ژيان تيكه‌ڵ و خيزانی.

ئاسان ئه‌كره‌م

ج . أ