نه‌خش زووان دايگ

شفق نيوز

زووان دايگ زووان كوومه‌ڵگايگه‌ ك دايگ و باوگ كه‌سيگ پابه‌ندن وه‌ ناوچه‌ی ره‌گه‌زی و فه‌رهه‌نگی ئه‌و كوومه‌ڵگاو ئويشنه‌پی زووان دايگ ئه‌و كه‌سه‌. زووان دايگ جوور يه‌كيگ له‌ لايه‌نه‌يل سه‌ره‌كی فه‌رهه‌نگ له‌ هه‌ر كوومه‌ڵگايگ نه‌خش گرينگ ئه‌گريده‌ خوه‌ی ك له‌ زوورم كوومه‌ڵگايه‌يل شاره‌زايی له‌بانی ديرن و جوور جموجويلده‌ر نه‌فداريگ ئه‌را پيشكه‌فتن كوومه‌ڵگاو په‌ره‌سه‌ندن فه‌رهه‌نگ كه‌ڵك له‌لی وه‌رگرن.

ئمجا ئه‌و نه‌خشه‌ مانای جيوازكردن فه‌رهه‌نگه‌ له‌ نه‌وه‌يگه‌و ئه‌را نه‌وه‌يگ تر له‌ناو كوومه‌ڵگا، ئه‌گه‌ريش وه‌و شيوه‌ نه‌وياتاد ئه‌وه‌ فه‌رهه‌نگيش وجوود نه‌ياشت و هويچ وه‌ختيگ وه‌ ته‌مامی شيوه‌ی خوه‌ی وه‌رنه‌گرت و ناته‌ دروسبوين.

ئمڕوو تاڕاده‌يگ له‌ گشت وڵاته‌يل جه‌هان، فه‌رهه‌نگ ريژه‌ی وه‌رچه‌ويگ له‌ بودجه‌ی ساڵانه‌ی وڵاته‌يل ئه‌را خوه‌ی ته‌رخان ئه‌كا، يه‌يش راسييگ حاشاهه‌ڵنه‌گره‌ ك فه‌رهه‌نگ له‌ كوومه‌ڵگايه‌يل وه‌ يه‌كيگ له‌ ئامێره‌يل پيشكه‌فتن شماريه‌يدو خه‌رج فريه‌يگ له‌بانی ئه‌كريه‌يد.

بيگومان له‌ناو كوومه‌ڵگايه‌يل هه‌وڵداين ئه‌را په‌ره‌داين و پيشكه‌فتن فه‌رهه‌نگ ئاكام خاس و رووشنيگ له‌لی كه‌فته‌سه‌و، ئمجا يه‌كيگ له‌ هووكاره‌يل يا ته‌نيا هووكار جيوازنه‌كردن فه‌رهه‌نگ له‌ناونی نه‌وه‌يل ئه‌را يه‌كتری له‌ كوومه‌ڵگايگ، ئاڵشتكردن زووانه‌.

وه‌ختی زووان دايگ ك قسه‌ی فه‌رهه‌نگ ئه‌و كوومه‌ڵگاس، وه‌ بوونه‌ی هوير نزمی تاكه‌يل كوومه‌ڵگاوه‌ فه‌رامووش ئه‌كريه‌يدو خريه‌يده‌ ژير خاك و زووانيگ ناڕووشن يا زووانيگ بيگانه‌ شوونی ئه‌گريد، دی ئه‌و وه‌خته‌ لپ و چڵه‌يل فه‌رهه‌نگ كويه‌ن و گه‌ورای نه‌ته‌وه‌يگ له‌ناو خراوه‌ی نه‌فامی نقوم ئه‌دێ و ئه‌دێده‌ هووكار په‌يابوين كيشه‌يل فريه‌يگ و يه‌كيگ له‌وانه‌يش كيشه‌ی كه‌سايه‌تی ك سه‌رچه‌وه‌ی زوورم سه‌ختيه‌يل كوومه‌ڵگاس.

سادق په‌رندی

ج . أ