نه‌خش ژن له‌ بنه‌ماڵه‌

شفق نيوز

  ژن له‌ ژیان بنه‌ماڵه‌یى وه‌پرسیارێتى گه‌وراتر له‌ پیاو دیرید و ئه‌و پایه‌ى ئایینیه‌ ك ئسلام ئه‌راى دیارى كردگه‌ له‌ پایه‌ى سه‌رۆكى و وه‌رپرسیارێتى گشتى وه‌ڕیه‌وبه‌ره‌یل فریه‌یگ گه‌وراتره‌. ئه‌و له‌لایگه‌و وه‌رپرس وه‌ڕیه‌وبردن ماڵه‌و له‌لایگ تریشه‌و وه‌رپرس ئمایه‌تكرن مناڵه‌، ك وه‌ڕیه‌وبردن ئى هه‌ردوگ ئه‌ركه‌ فریه‌ قورسه‌.

ژن وه‌ڕیه‌وبه‌ر ماڵه‌، وه‌لى سستم ژنسالارى قه‌بول ناكریه‌ید، ژن نیه‌ود گومان بكا ك وه‌ڕیه‌وبه‌ر كاروبار ماڵ ئه‌را ئه‌و سووكایه‌تى ئه‌یه‌رید یا ئه‌را ئه‌وه‌ك هه‌ق وه‌رانوه‌رى داشتوود دى بایه‌سه‌ فه‌رمان بكا له‌ وه‌ڕیه‌وبه‌رایه‌تیه‌گه‌ى.

ژن له‌ ژیان بنه‌ماڵه‌یى وه‌رپرسیارێتییگ گه‌وراتر له‌پیاو دیرید جوور ئه‌وه‌ك له‌ سه‌ره‌تا ئاماژه‌ وه‌پى كردیم، ئنجا له‌ دید كه‌سه‌یل فریه‌یگه‌و كاركردن ژن له‌ ده‌یشت ماڵ ك ئه‌ركیگ شه‌رعیه‌، وه‌لى وه‌ نادروس تاریفى كه‌ن ، چوینكه‌ ئى كاره‌ نه‌ك هه‌ر ته‌نیا بووده‌ هووكار دویره‌وكه‌فتنى له‌ ئه‌رك سه‌ره‌كى خوه‌ى، به‌ڵكوو ژیان هاوسه‌رییش ئه‌خاده‌ مه‌ترسیه‌و، هه‌ر له‌وه‌ر ئه‌وه‌یش كه‌سه‌یلیگ باوه‌ڕیان ئه‌وه‌سه‌ ئه‌رك ژن ته‌نیا وه‌ڕیه‌وبردن ماڵ و مناڵ و ژیان بنه‌ماڵه‌س.

كه‌سه‌یلیگ هه‌ن زووان و هه‌ڵسووكه‌فتیان وه‌ل مه‌ردم خاسه‌، وه‌لى له‌ په‌یوه‌ندى وه‌ل هاوسه‌ره‌یلیان هه‌ڵسووكه‌فتیان خراوه‌و له‌یوا زانن ك بنه‌ماى ژیان ئه‌وه‌سه‌ ك ته‌نیا قسه‌ى خوه‌یان بچه‌سپنن له‌بان هاوسه‌ره‌یلیان، یه‌یش وه‌بى ئه‌وه‌ك بزانن ئه‌و كاره‌ چه‌نیگ شوونه‌وار خراو دیرید له‌بان ژیان هاوسه‌رى.

ئنجا نه‌خش ژن له‌ ژیان بنه‌ماڵه‌ فریه‌ وه‌ كه‌ڵكه‌ و بووده‌ هووكار هانداین هس سووز و مه‌یل هاوسه‌ر و مه‌یلدارى فیشتر وه‌ كار و ژیان هاوبه‌ش، هه‌ر له‌وه‌ر ئه‌وه‌یش هه‌وڵداینمان له‌ژیان بایه‌سه‌ ئه‌وه‌ بوود ك خاڵه‌یل خاس هاوسه‌ره‌یلیدان بوینین نه‌ك عه‌یبه‌یلى، له‌جیاى ئه‌وه‌ك قسه‌ وه‌پى بكه‌ید لبان كرده‌وه‌یلى، تاریفى بكه‌.

تاریفكردن هاوسه‌ر یا ستایشكردنى، شادى ئه‌خاده‌ دڵى و له‌یوا وه‌پى ئه‌كا فیشتر هه‌وڵ بیه‌یدو خوه‌ى خه‌ریك بكا ئه‌را سه‌ركه‌فتن فیشتر و له‌هه‌مان وه‌خت سه‌ركه‌فتنه‌یلى بته‌وتر ئه‌كا، ك یه‌یش ماناى وه‌رده‌وامى ژیانه‌و نه‌خشیگه‌ بنه‌مایى و كاریگه‌ر له‌ژیان هاوسه‌رى و په‌ره‌داین وه‌ هه‌وڵه‌یل وه‌رده‌وام.

عه‌لى قائمى

ج . أ